သျှမ်းတောင် ပင်လောင်းမြို့နယ်တွင် သီတင်းကျွတ်ကာလ အခါကြီးစျေးနေ့ရောင်းဝယ်ကြပြီး နောက်ပိုင်း ကိုဗစ် ကူးစက်မှု ပိုမိုမြင့်တက်လာကြောင်း စုံစမ်းသိရသည်။

သီတင်းကျွတ်နောက်ပိုင်း ကျေးရွာများမှ ကိုဗစ်ကူစက်မှု ပိုမိုမြင့်တက်လာခဲ့ပြီး မြို့ပေါ်ရပ်ကွက်များတွင်လည်း ကူးစက်မှုတွေ များလာကြောင်း သိရသည်။

“သီတင်းကျွတ် အခါကြီးစျေးနေ့နောက်ပိုင်း ပိုးကူးတာ ပိုများလာတယ်၊ ရွာဘက် ပိုများတယ်၊ မြို့ပေါ်က အနောက်ရပ်ကွက်မှာလည်း များတယ်” ဟု ပင်လောင်းဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ယမန်နေ့ အောက်တိုဘာ (၂၈)ရက်တွင် အတည်ပြုလူနာ သေဆုံးသူ (၁)ဦးနှင့် ကိုဗစ်ကူးစက်ခံရသူ (၄၁)ဦးထိ တွေ့ရှိခဲ့ပြီး ပင်လောင်းမြို့ပေါ်ရပ်ကွက်အပြင် တီကျစ်၊ နောင်တရား၊ ပေါင်းလောင်းနှင့် အခြားကျေးရွာများတွင်လည်း ပိုးတွေ့လူနာများ တွေ့ရှိခဲ့ရတာဖြစ်ကြောင်း သိရသည်။

“တီကျစ်မှာလည်း ကူးတာများတယ်၊ စျေးတောင် ပြန်ပိတ်ထားရပြီ၊ လူရောင်းတဲ့လူလား၊ ဒေသခံလားတော့ သေခြာမသိဘူး၊ ပိုးကူးတဲ့သူ များလာတာတော့ ဟုတ်တယ်၊ စျေးနေ့တွေတုန်းက လူအရမ်းများတယ်လေ” ဟု တီကျစ်ဒေသခံ လူငယ်တစ်ဦးက ပြောသည်။

ပင်လောင်းမြို့နယ်တွင် ယမန်နေ့အထိ ကိုဗစ်အတည်ပြုလူနာ (၂၁၆၄)ဦး ရှိပြီး သေဆုံးသူ (၂၁)ဦးနှင့် ဆေးရုံဆင်းခွင့်ရသူ (၁၈၆၀)ကျော်ရှိနေကြောင်း သိရသည်။