သျှမ်းပြည် မြောက်ပိုင်း မူဆယ်ခရိုင် ပန်ဆိုင်းမြို့အတွင်းတွင် ကိုးကန့်တပ်မတော် MNDAA နှင့် စစ်ကောင်စီတပ်တို့ တိုက်ပွဲဖြစ်နေစဥ် စစ်ကောင်စီမှ မြို့ထဲသို့ ရမ်းပစ်သည့်အတွက် ပြည်သူအိမ်များ ထိခိုက်ပျက်စီးရကြောင်း သတင်းသိရသည်။
ယမန်နေ့ အောက်တိုဘာလ ၂၅ ရက် ည ၉ နာရီကျော်မှ စတင်ကာ ပန်ဆိုင်းမြို့ရှိ ရပ်ကွက် (၈) နမ့်ပါတက်နှင့် ရွာသစ်လေးအနီးတွင် MNDAA နှင့် စစ်ကောင်စီတို့ ထိပ်တိုက်တွေ့ဆုံ တိုက်ပွဲဖြစ်ပွားပြီးနောက် စစ်ကောင်စီသည် ရွာသစ်လေးမှ နေအိမ်များကို ရမ်းသမ်းပစ်ခတ်သည့်အတွက် နေအိမ်များ ကျည်ဆံထိကာ ပျက်စီးခဲ့ရကြောင်း ဒေသခံ များက ပြောသည်။
“မနေ့ညက ၉ နာရီ ၅၀ မိနစ်လောက်မှာ တိုက်ပွဲဖြစ်ပွားခဲ့တယ်၊ ၁၀ နာရီကျော်တဲ့အထိ ပစ်ကြတယ်၊ အိမ်ခေါင်မိုးနဲ့ မှန်ပြတင်းပေါက်တွေကို သေနတ်ကျည်ဆံရော၊ လက်နက်ကြီး ယမ်းစတွေရော ထိလို့ ပျက်စီးတယ်၊ လူအထိအခိုက်တော့ မရှိဘူး” ဟု ပန်ဆိုင်းမြို့နေ ဒေသခံတစ်ဦးက သျှမ်းသံတော်ဆင့်ကို ပြောသည်။
ယခုလအတွင်း ပန်ဆိုင်း (ကြူကုတ်)မြို့မှာ နေ့စဉ်နီးပါး စစ်ကောင်စီနဲ့ ကိုးကန့် MNDAA တို့အကြား တိုက်ပွဲ ဖြစ်ပွားနေကြောင်း ယမန်နေ့ညက ဖြစ်ပွားသည့် ပစ်ခတ်မှုများကြောင့် ပန်ဆိုင်းမြို့၊ ရွာသစ်လေးဘက်မှ ဒေသခံပြည်သူ နေအိမ် ၅ လုံးခန့် ထိခိုက်ပျက်စီးရပြီး လူနှင့် တိရိစ္ဆာန် ထိခိုက်မှုမရှိကြောင်း သိရသည်။
“မနေ့ညက ၁၀ နာရီလောက်မှာ တိုက်ပွဲ ငြိမ်သွားတယ်၊ ဒါပေမဲ့ အဲ့ဘက်မှာက ကိုးကန့်တပ်သားတွေက လုံခြုံရေးချထားတုန်းပဲ၊ ဒီနေ့လည်း တပ်သားတွေ ထပ်ဖြည့်ထားတာ တွေ့ရတယ်” ဟု ပန်းဆိုင်းဒေသခံ တစ်ဦးက ပြောသည်။
ပန်ဆိုင်းမြို့နယ်ခွဲအတွင်းတွင် ဩဂုတ်လ ၄ ရက်မှ စတင်ကာ ယနေ့အထိ စစ်ကောင်စီတပ်နှင့် ကိုးကန့်တပ်တို့အကြား တိုက်ပွဲဖြစ်ပွားခဲ့ကြောင်း၊ ထိုတိုက်ပွဲကြောင့် လက်နက်ထိမှန် သေဆုံးခဲ့သူ (၃)ဦးအထက်ရှိပြီး လက်နက်ထိမှန်မှုကြောင့် ပြင်းထန်ဒဏ်ရာ ရရှိခဲ့သူ အမျိုးသမီး ၁ ဦး ရှိခဲ့ကြောင်း သိရသည်။
ထို့ပြင် တိုက်ပွဲကြောင့် ကားနှင့် ဘုရားကျောင်း အပါအဝင် အရပ်သားပြည်သူတွေရဲ့ နေအိမ်အချို့ ထိခိုက်ပျက်စီးခဲ့ကြောင်းလည်း သိရသည်။
Leave a Comments