သျှမ်းပြည်တောင်ပိုင်း ဟိုပုံးမြို့တွင် စစ်အာဏာရှင် ဖမ်းဆီးထားသည့် အပြစ်မဲ့ ပြည်သူ (၁၁)ဦးထဲမှ (၂)ဦးသာ ပြန်လွှတ်သေးကြောင်း စုံစမ်းသိရှိရသည်။
အောက်တိုဘာ (၁၈)ရက်နေ့က နိုင်ငံတော် စီမံအုပ်ချုပ်ရေးကောင်စီမှ ဆန္ဒပြ ပြည်သူများနှင့် စပ်လျဉ်း ကြားနာစစ်ဆေးဆဲ ပြစ်မှုဆိုင်ရာ အမှုများကို ပိတ်သိမ်းလိုက်သည့် အပြစ်မဲ့ ပြည်သူ (၄၃၂၀)ဦး အထဲမှ ဟိုပုံးလူငယ် (၂)ဦးသာ လွတ်မြောက်လာကြောင်း စုံစမ်းသိရှိရသည်။
“သူတို့ဖမ်းထားတဲ့ (၁၁)ဦးက အမျိုးသမီး (၂)ဦးပဲ လွတ်လာသေးတယ်။ ကျန်တဲ့ (၉)ဦးတော့ မလွှတ်သေးဘူး။ တောင်လေးလုံးအကျဉ်းထောင်မှာ ရှိနေသေးတယ်” ဟု ဟိုပုံးဒေသခံ အမျိုးသမီး တစ်ဦးက သျှမ်းသံတော်ဆင့်ကို ပြောသည်။
ကျန်ရှိသည့် (၉)ဦးမှာ NLD အမတ် ဦးကျော်အေး၊ ကမ္ဘောဇတိုင်းသတင်းဌာနမှ (၄)ဦးနှင့် ဟိုပုံးလူငယ် အမျိုးသား (၄)ဦး ကျန်ရှိနေသေးတာဖြစ်ကြောင်း သိရှိရသည်။
“ကျန်တဲ့သူတွေလည်း လွှတ်ပေးဖို့ မိသားစုတွေက မျှော်လင့်နေကြတယ်။ အပြစ်မရှိပဲ မတရားဖမ်းဆီးခံထားရတဲ့သူတွေ အကုန်လွတ်လာဖို့ မြို့နေပြည်သူတွေလည်း ဝိုင်းဆုတောင်းနေကြတယ်” ဟု ဟိုပုံးဒေသခံ အသက် (၄၀)ဝန်းကျင် အမျိုးသား တစ်ဦးက ပြောသည်။
အောက်တိုဘာ (၁၈)ရက်က အကျဉ်းထောင်၊ အချုပ်ထောင်နှင့် စခန်းအသီးသီးမှာရှိသည့် အကျဉ်းကျခံနေရသူ (၁၃၁၆)ဦးကို လွှတ်ပေးရန်နှင့် အမှုရင်ဆိုင်နေရသူ (၄၃၂၀)ဦးကိုလည်း အမှုပိတ်သိမ်းပေးပြီး အမှုက လွှတ်ပေးခဲ့ကြောင်း စစ်ကောင်စီက ထုတ်ပြန်ခဲ့သည်။
စစ်ကောင်စီမှ အမှုရှုပ်သိမ်းပေးသော်လည်း ပြန်လည်လွတ်မြောက်လာသူ အချို့ကို ထပ်မံအမှုဖွင့်ပြီး ပြန်လည် ဖမ်းဆီးသွားသည့်သူများလည်း ရှိသည့်အတွက် လွတ်မြောက်လာသူတချို့က စိုးရိမ်နေကြရကြောင်း သိရှိရသည်။
Leave a Comments