သျှမ်းပြည် တောင်ပိုင်း မြို့ရွာများရှိ Non CDM ဆရာ၊ ဆရာမ (၄၂)ဦးကို ဇီးပင်ကြီး ဗဟိုဝန်ထမ်း တက္ကသိုလ်တွင် အခြေခံပညာ ဆရာ၊ ဆရာမ အထူးမွမ်းမံသင်တန်း တက်ရောက်ရန်အတွက် စစ်ကောင်စီလက်အောက်ခံ ပြည်နယ် ပညာရေးဝန်ကြီးက ညွှန်ကြားလိုက်ကြောင်း သိရသည်။
လာမည့် အောက်တိုဘာလ (၂၁)ရက်နေ့တွင် သျှမ်းပြည် တောင်ပိုင်းမှ CDM မလုပ်ဆောင်သည့် Non CDM ဆရာ၊ ဆရာမ (၄၂) ဦးတို့သည် ဇီးပင်ကြီး ဗဟိုဝန်ထမ်းတက္ကသိုလ် သတ်မှတ်နေရာများတွင် အရောက်လာကြရန် ပြည်နယ်ပညာရေးမှူးရုံး (တောင်ကြီး)က ညွှန်ကြားခဲ့သည်။
သျှမ်းပြည်တောင်ပိုင်းမှ Non CDM များအနက် ဆရာ၊ ဆရာမ (၄၂)ဦးသည် ဇီးပင်ကြီး ဗဟိုဝန်ထမ်းတက္ကသိုလ်သို့ (၂၀၂၁)ခုနှစ် အောက်တိုဘာလ (၂၂)ရက် မနက်ပိုင်းတွင် ပြည်နယ်ပညာရေးမှူးရုံးမှ တာဝန်ခံနှင့်အတူ သွားရောက်ရန်အတွက် စုရပ်များတွင် အောက်တိုဘာလ (၂၁)ရက်နေ့မှာ ရောက်ရှိထားရမည်ဖြစ်ကြောင်းလည်း အသိပေးထားသည်။
သင်တန်းတက်ရောက်ရမည့် ဆရာ၊ ဆရာမများကို အောက်တိုဘာလ (၂၁)ရက်နေ့ ညနေ(၃)နာရီအချိန်တွင် တောင်ကြီး အထက(၅) စိန်မြင်းမိုရ်ခန်းမတွင် ပြည်နယ်ပညာရေးမှ လမ်းညွှန်မှာကြားမည်ဟုလည်း အသိပေးထားကြောင်း သိရသည်။
