သီပေါမြို့တွင် ပြောင်းအဝယ်ဒိုင် ရွာသားတဦး ပစ်ခတ်ခံရ

0

သျှမ်းပြည်မြောက်ပိုင်း သီပေါမြို့နယ်တွင် စံဖိတ်ရွာသားတဦးအား အမည်မသိလက်နက်ကိုင်အဖွဲ့မှ ၀င်ရောက် ပစ်ခတ်သောကြောင့် သေဆုံးသွားရကြောင်းသိရသည်။

ပစ်ခတ်ခံရသူ ဦးစိန်ဝင်း၏နေအိမ်

ဂျူလိုင်လ ၂၆ ရက် ည ၁၀ နာရီခန့်က သီပေါမြို့နယ် စံဖိတ်အုပ်စု စံဖိတ်ရွာသား ဦးစိန်ဝင်း (အသက် ၄၄ နှစ်) အား မျက်နှာဖုံးစွပ်ထားသော သေနတ်သမားတဦးက နေအိမ်အတွင်း ၀င်ရောက်ပစ်ခတ်ရာ ကျည်ဆန် ၃ ချက် ထိမှန်ကာ သေဆုံးသွားကြောင်းသိရသည်။

သီပေါမြို့သားစိုင်းဆိုင်က – “ကျနော်တို့သီပေါမှာ အခုတလော လုံခြုံရေးလုံးဝ မရှိတဲ့အနေ အထား ဖြစ်နေပါတယ်။ အခု လုံးစိန်ဝင်းပစ်ခတ်ခံရမှုမှာလည်း ပစ်ခတ်မှုလက်သည်က ၂ ယောက်လာတယ် ဆိုင်ကယ်နဲ့။ တယောက်ကဝင်ပစ်ပြီး နောက်တယောက်က ဆိုင်ကယ်မှာစောင့်တယ်။ လက်သည်တွေကို ရဲတပ်ဖွဲ့က မဖမ်းမိသေးတော့ ဘယ်သူမှန်းမသိရသေးဘူး ”- ဟု သျှမ်းသံတော်ဆင့်အားပြောသည်။

ပစ်ခတ်ခံရသူ ဦးစိန်ဝင်းမှာ တအာင်းအမျိုးသားတဦးဖြစ်ကြောင်းသိရသည်။ ၄င်းသည် သီပေါမြို့နှင့် ၁ မိုင်ခန့် အကွာရှိ ၀မ့်စံဖိတ်ရွာတွင် ပြောင်းဖူးအဝယ်ဒိုင်လုပ်ငန်းလုပ်ကိုင်နေပြီး နေအိမ်တွင်လည်း ကုန်စုံဆိုင်ဖွင့်လှစ် ထား ကြောင်းသိရသည်။

လုပ်ကြံပစ်သတ်မှုများ ဆက်တိုက်ဖြစ်ပေါ်နေသော သီပေါမြို့နယ်တွင် ယခုနှစ် ရ လတာကာလအတွင်း လူ ၁၀ ဦးထက်မနဲ ပစ်သတ်ခံခဲ့ရကြောင်း   နာရေးကူညီမှုအသင်း၏ ဖေ့စ်ဘုစာမျက်နှာ တွင်ဖော်ပြထားချက်အရသိရသည်။

သီပေါမြို့နယ်အတွင်း တရားဥပဒေမဲ့ ပစ်ခတ်မှုများ ရပ်တန့်နိုင်ရေးအတွက် တရားဥပဒေ စိုးမိုးမှုလိုအပ် နေသည်ဟုဆိုသော်လည်း အစိုးရ တပ်မတော်စစ်ကြောင်းများ ရှိနေသော်လည်း ပစ်ခတ်ခံရမှုရှိနေကြောင်း၊ လက်ရှိအနေအထားတွင် မည်သည့်လက်နက်ကိုင်အဖွဲ့အစည်းမှ အားထား၍ မရတော့ကြောင်း ပစ်ခတ်ခံရမှု အနီးနေထိုင်သည့် စိုင်းဆိုင်က ပြောသည်။

Leave a Comments

SHARE

LEAVE A REPLY

Please enter your comment!
Please enter your name here