သျှမ်းမြောက် ကျောက်မဲမြို့နယ် တောင်ခြေကျေးရွာအနီးရှိ အထက်ရဲရွာရေအားလျှစ်စစ်စက်ရုံမှ ဝန်ထမ်း (၅၅)ဦးကိုဗစ်ပိုး စစ်ဆေးတွေ့ရှိခဲ့ကြောင်း စုံစမ်းသိရသည်။
အောက်တိုဘာလ (၁၁)ရက် ယမန်နေ့က အထက်ရဲရွာရေအားလျှပ်စစ်စက်ရုံမှ ဝန်ထမ်း (၂၅၀)ကျော်အား RDT Test Kit ဖြင့် စစ်ဆေးရာ ကိုယ်ဝန်သည်တစ်ဦးအပါအဝင် ဝန်ထမ်း (၅၅)ဦးထံမှ ကိုဗစ်ပိုး တွေ့ရှိခဲ့ကြောင်း သိရသည်။
“မနေ့က ဝန်ထမ်းအားလုံး ကို စစ်လိုက်တာ၊ ပိုးတွေ့တာက (၅၅)ယောက်ရှိတယ်၊ အဲ့ထဲမှာ ကိုယ်ဝန်သည် တစ်ယောက်ပါတယ်၊ သူ့ကို လားရှိုးပို့ပေးလိုက်ပြီ” ဟု နောင်ပိန်ကျေးရွာမှ ပရဟိတအသင်းဝင်တစ်ဦးက သျှမ်းသံတော်ဆင့်ကို ပြောသည်။
ထိုကူးစက်လူနာများအား နောင်ပိန်ကျေးရွာရှိ တိုက်နယ်ဆေးရုံနှင့် ဓမ္မာရုံသို့တွင် သယ်ဆောင် ထားရှိခဲ့တာဖြစ်ကြောင်း၊ ယနေ့ (အောက်တိုဘာ ၁၂) ညနေပိုင်းတွင် ပိုးတွေ့လူနာ (၄၉)ဦးအား ကျောက်မဲပြည်သူ့ဆေးရုံသို့ ထပ်မံပို့ဆောင် ပေးခဲ့ကြောင်း သိရသည်။
“သူတို့ကို နောင်ပိန်တိုက်နယ်ဆေးရုံကို သယ်လာတာ၊ ဒီမှာက နေရာမဆံ့တော့ ဓမ္မာရုံမှာ သွားထားရတယ်၊ အဲ့မှာက လူနေအိမ်နဲ့ နီးတော့ အဆင်ပြေတာတွေရှိလို့ ဒီနေ့ နေ့လည်မှာ ကျောက်မဲဆေးရုံကို ပြန်ပို့လိုက်တယ်” ဟု အထက်ပါ ပရဟိတအသင်းဝင်က ပြောသည်။
ကျောက်မဲမြို့နယ်တွင် ကိုဗစ်ကူးစက်လူနာ မြင့်တက်နေဆဲဖြစ်ပြီး ယခုလအတွင်း ကျေးရွာများတွင် ဒေသခံအစုလိုက် ကိုဗစ်ကူးစက်ခံရမှု ပိုမိုများလာကြောင်း ဒေသခံများထံမှ သိရသည်။
ထိုသို့ အစုလိုက် ကူးစက်ခံရခြင်းသည် ကိုဗစ်စည်းကမ်းလိုက်နာမှု အားနည်းခြင်းကြောင့် ဖြစ်ကြောင်း ဒေသခံတစ်ဦးက ဆိုသည်။
“ရွာတွေမှာက စည်းကမ်းလိုက်နာမှု အရမ်းကို အားနည်းတာ၊ ဘယ်လိုပြောပြော လိုက်မလုပ်ကျဘူး၊ ကျနော်တို့တွေ ရွာထိ သွားပြီး အသိပညာပေးတယ်၊ ပြောပြတယ်၊ ဒါပေမယ့် လိုက်မလုပ်ကြဘူး၊ ပြီးခဲ့တဲ့ ရက်ပိုင်းကပဲ ပုံဝိုးကျေးရွာမှာလည်း (၁၀၀)ကျော် ပိုးတွေ့ခဲ့တယ်” ဟု နောင်ပိန်ကျေးရွာမှ ဒေသခံ အမျိုးသားတစ်ဦးက ပြောသည်။
ကျောက်မဲမြို့နယ်တွင် ကိုဗစ်တတိယလှိုင်းအတွင်း ယနေ့(အောက်တိုဘာ ၁၂)အထိ ကိုဗစ်ကူးစက်ခံရသူ (၁၆၀၀)ကျော်ထိ ရှိနေပြီး၊ ဆေးရုံဆင်းခွင့်ရသူ (၁၄၀၀)ကျော်နှင့် သေဆုံးသူ (၈၆)ဦး ရှိနေကြောင်း သိရသည်။
