သျှမ်းပြည်တောင်ပိုင်း ဖယ်ခုံမြို့နယ်အတွင်းတွင် ပြီးခဲ့သည့် စက်တင်ဘာလနှောင်းပိုင်းနှင့် ယခု အောက်တိုဘာ လဆန်းပိုင်းအတွင်း စစ်ကောင်စီတို့၏ မတရားဖမ်းဆီးမှုကို ခံရသည့် လူငယ်များသည် ထောင်ဝင်စာတွေ့ခွင့် မရှိကြောင်း စုံစမ်းသိရှိရသည်။

ပြီးခဲ့သည့် စက်တင်ဘာလ ၃၀ ရက်နေ့တွင် ဖြစ်ပွားခဲ့သည့် ကုန်းသာတိုက်ပွဲအပြီးတွင် စစ်ကောင်စီတို့သည် ဖယ်ခုံမြို့နယ်အတွင်း ခြေကျင်လှည့်လည်ပြီး အပြစ်မဲ့ လူငယ် ၇ ဦးထက်မနည်းကို PDF ဟု စွပ်စွဲပြီး ဖမ်းဆီး ခေါ်ဆောင်သွားကြောင်း ဖယ်ခုံမြို့နေဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

“အရင်ကလည်း ကျနော်တို့နယ်ထဲမှာ အဲ့လို အဖမ်းခံရတဲ့ လူငယ်တွေရှိနေပါတယ်၊ ကုန်းသာတိုက်ပွဲအပြီးမှာ တော့ သူတို့က လူငယ် ၇ လောက်ကို ဖမ်းခေါ်သွားတယ်၊ တချို့က ခုမှ ၁၈နှစ်၊ ၁၉နှစ် အရွယ်လေးပဲရှိသေးတယ်၊ သူတို့ (စစ်ကောင်စီ)ကို လာတိုက်တဲ့ PDF တွေလို့ ထင်ပြီး ဖမ်းသွားတာ၊ ကျနော်တို့နယ်ထဲမှာ အဖမ်းခံရတဲ့ လူငယ်တွေ က ၅၀ နီးနီးရှိနေပြီ” ဟု အထက်ပါ အမျိုးသား ပုဂ္ဂိုလ်က ပြောသည်။

အဆိုပါ လူငယ်များကို ညောင်ရွှေမြို့ရှိ ညောင်ရွှေအကျဉ်းထောင် (တောင်လေးလုံးထောင်) တွင် ဖမ်းဆီးထိန်း သိမ်းထားသည်ဟုသာ သိရပြီး မည်သည့် အဆက်အသွယ်မှ မရရှိသည့် အပြင် ထောင်ဝင်စာပေးခွင့်လည်း မရှိ သည့် အတွက် မိသားစုဝင်များက စိုးရိမ်ပူပန်နေကြကြောင်း တောင်လေးလုံးအကျဉ်းသားများကို ကူညီမှုပေး နေသည့် ပရဟိတ တစ်ဦးကလည်း သျှမ်းသံတော်ဆင့်ကို ပြောသည်။

“ကျနော်တို့ ရရှိထားတဲ့ စာရင်းအရတော့ ဖယ်ခုံက ၅၁ ယောက် တောင်လေးလုံးထောင်ထဲမှာ ရှိနေတယ်လို့ သတင်းကြားမိပါတယ်၊ သူတို့လေးတွေအတွက် ထောင်ဝင်စာလဲလာတွေ့ခွင့်မရှိ စောင်တွေဘာတွေလဲ မရှိတော့ တတ်နိုင်သလောက်ကူပေးပါလို့ပြောလာတယ်” ဟု အဆိုပါ ပရဟိတ အမျိုးသားက ပြောသည်။

လက်ရှိတွင် အာဏာသိမ်း စစ်ကောင်စီတို့သည် သျှမ်း – ကယား (ကရင်နီ)နယ်စပ် သျှမ်းတောင် ဖယ်ခုံမြို့ အပါအဝင် မိုးဗြဲ နှင့် လွိုင်ကော်မြို့တို့တွင်လည်း အင်အားအများအပြားတိုးချဲ့ကာ ဌာနေပြည်သူ့ကာကွယ်ရေးတပ်ဖွဲ့နှင့် KNDF ပူးပေါင်းတပ်ဖွဲတို့ကို ထိုးစစ်ဆင် တိုက်ခိုက်နေလျက်ရှိပြီး ဒေသခံ ကျေးရွာနေပြည်သူများစွာလည်း စစ်ဘေးတိမ်းရှောင်နေကြရကြောင်းသိရသည်။