သျှမ်းမြောက် ကျောက်မဲမြို့နယ် မိုင်းငေါ့မြို့တွင် ရောက်ရှိခိုလုံနေကြပြီး မှတ်ပုံတင်မရှိသည့် စစ်ရှောင်များ ကိုဗစ်ကာကွယ်ဆေးထိုးရန် အခက်ခဲ ကြုံနေကြောင်း သတင်းရရှိသည်။
မိုင်းငေါ့တွင် စစ်ရှောင် (၂၀၀)ကျော် ရှိနေပြီး မှတ်ပုံတင် မရှိသည့်အတွက် ကာကွယ်ဆေးထိုးရန် အခက်ခဲ ကြုံနေတာဖြစ်ကြောင်း စစ်ရှောင်ကူညီသူများက ပြောသည်။
“သူတို့တွေ စစ်ရှောင်လာတော့ စာရွက်စာတမ်းတွေ ဘာမှ မပါလာဘူး၊ တချို့က အသက်ပြည့်ပေမယ့် မှတ်ပုံတင်တွေ မရှိထားဘူး၊ အဲ့တော့ မှတ်ပုံတင်ရဖို့ လျှောက်ထားပေးတယ်၊ မရသေးလို့ မထိုးရသေးဘူး” ဟု မိုင်းငေါ့စစ်ရှောင်များကို ကူညီနေသည့် ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
လက်ရှိတွင် ကျန်းမာရေးဦးစီးဌာနက အသက် (၁၈)နှစ်အထက်ရှိသူများအား ကိုဗစ်ကာကွယ်ဆေး ထိုးနှံ ပေးလျက်ရှိသော်လည်း စစ်ရှောင်များတွင် မှတ်ပုံတင် မရှိသူများ ရှိနေသည့်အတွက် ကိုဗစ်ကာကွယ်ဆေး ထိုးနှံရခြင်း မရှိသေးတာဖြစ်ကြောင်း သိရသည်။
ပြီးခဲ့သည့် စက်တင်ဘာလတွင် ကျောက်မဲမြို့နယ်အတွင်း ကိုဗစ်ကူးစက်ခံရသည့် စစ်ရှောင် (၂၀၀)ဝန်းကျင်ထိ ရှိခဲ့ကြောင်း ဒေသခံများထံမှ သိရသည်။
ကျောက်မဲမြို့နယ်အတွင်းရှိ စစ်ရှောင်စခန်းများတွင် အစားအသောက်များ ခက်ခဲမှုတွေ ရှိနေကြောင်း စစ်ရှောင်ကူညီသူများက ပြောသည်။
“သူတို့က နေရပ် ပြန်ချင်ပေမယ့် မပြန်ရဲသေးဘူး၊ ခုချိန်က အားလုံး ခက်ခဲနေကြတာဆိုတော့ အလှူရှင်တွေလည်း လျော့နည်းသွားတယ်၊ အဓိက က ဟင်းသီးဟင်းရွက်နဲ့ ဆီတွေ၊ ထင်းတွေ လိုအပ်နေတာ” ဟု မိုင်းငေါ့ စစ်ရှောင်ကူညီသူ ဦးထွန်းတင်က ဆိုသည်။
ကျောက်မဲ မြို့နယ်တွင် ယနေ့အချိန်ထိ စစ်ရှောင်စခန်းများတွင် ခိုလှုံနေရသူများ၊ မြို့ပေါ် ရပ်ကွက်နှင့် ကျေးရွာများရှိ ဆွေမျိုးနေအိမ်များတွင် နေထိုင်သူများအပါအဝင် နေရပ်မပြန်နိုင်သေးသည့် စစ်ရှောင် (၄၀၀၀)ဝန်းကျင်ထိ ရှိနေကြောင်း ကျောက်မဲစစ်ရှောင်ကူညီသူများထံမှ သိရသည်။
