သျှမ်းပြည်မြောက်ပိုင်း လားရှိုးမြို့တွင် စစ်ကောင်စီက ဖမ်းဆီးခေါ်ဆောင်သွားသည့် တအာင်းကျောင်းသားနှင့် လူငယ်များအဖွဲ့ (TSYU)နှင့် တအာင်းပရဟိတ ပညာရေးဘော်ဒါဆောင် (TEC) မှ ဆရာများကို ယနေ့ အောက်တိုဘာ ၆ ရက်နေ့ထိ အဆက်သွယ်မရရှိသေးကြောင်း စုံစမ်းသိရှိရသည်။
ထိုဖမ်းဆီးခံထားရသည့် သူများကို လက်ရှိတွင် စစ်ကြောရေးစခန်းတွင် တည်ရှိနေပြီး မည်သည် စစ်ကြောရေးစခန်းတွင် ရှိနေသည်ကို မသိရှိသေးကာ ယနေ့ချိန်ထိ အဆက်သွယ်မရရှိသေးကြောင်းကို (TEC) မှ ကျောင်းဆရာတဦး က သျှမ်းသံတော်ဆင့် ကို ပြောသည်။
“ ခုချိန်ထိ အဆက်သွယ်မရသေးဘူး။ ဘယ်နားရှိနေလဲမသိရဘူး။ စစ်ကြောရေးစခန်းမှာ ရှိနေတာတော့ သိတယ်။ ဘယ်စစ်ကြောရေးစခန်း ရှိနေလဲဆိုတာမသိဘူး။ အဆက်သွယ် လည်းမရဘူး။ ဘာအမှုနဲ့ ဖမ်းထားလည်းမသိရဘူး။” ဟု (TEC)မှ ကျောင်းဆရာတဦး က ပြောသည်။
ထိုအပြင် ဖမ်းဆီးခံထားရသည့် လူငယ် (၆) ဦးကို လာရှိုးမြို့ ရဲစခန်းများ စသည့်နေရာများတွင် စုံစမ်းကြည့်သော်လည်း မည်သည်နေရာတွင် ရှိနေကြောင်းကိုမသိရသေးကြောင်း သိရသည်။
ဖမ်းဆီးခံရသည့် လူငယ်များသည် စစ်ကောင်စီ၊ နွေဦးတော်လှန်ရေးနှင့် ပတ်သတ်သည့် သူများမဟုတ်ကြောင်း၊ ပညာရေးလုပ်ငန်းများကို အဓိကလုပ်ကိုင်နေသည့် သူများသာ ဖြစ်ကြောင်း သိရသည်။
“ သူတို့က စစ်ကောင်စီတွေနဲ့ ဒီတော်လှန်ရေးတွေနဲ့ ဘာမှ ပတ်သတ်တာမရှိဘူး။ ဘာကြောင့်ဖမ်းသွားတာလဲ ခုချိန်ထိမသိရသေးဘူး။ သူတို့က ပညာရေးနဲ့ ပတ်သတ်ပြီးတော့ဘဲ လုပ်တာ။ သူတို့ကို အမြန်ဆုံး ပြန်လွှတ်လာပေး စေချင်တယ်” ဟု အထက်ပါ ကျောင်းဆရာက ဆိုသည်။
ထိုလူငယ်များကို ဖမ်းဆီးသွားသောကြောင့် ကျေးလက်ဒေသ ပညာရေးအတွက် ထိခိုက်လာနိုင်သောကြောင့် အမြန်ဆုံးပြန်လွတ်လာပေးရန် အတွက် (TEC) ကျောင်းသားအဖွဲ့က တောင်းဆိုလိုက်သည်။
“ ကျနော်တို့ လူက ဘာအပြစ်မှ မရှိဘူး။ သန့်သန့်ရှင်းရှင်းနေတဲ့သူတွေဖြစ်တယ်။ ပညာရေးပိုင်းကိုပဲလုပ်တာ။ သူတို့ဒီလို ဖမ်းသွားတာ ကကျနော်တို့ ကျေးလက်ဒေသတွေမှာ အတွက် ပညာရေးက ထိခိုက်လာနိုင်တယ်။ အမြန်ဆုံး ပြန်လွှတ်ပးဖို့ လိုအပ်တယ်” ဟု (TEC) ကျောင်းသား အဖွဲ့က ပြောသည်။
အလားတူ တအာင်းနိုင်ငံရေးအတိုင်ပင်ခံကော်မတီ (TEC) ကလည်း ထိုဖမ်းဆီးထားသည့် တအာင်း ကျောင်းသား နှင့် လူငယ်များအဖွဲ့ (TSYU) ရုံးဝန်ထမ်း တဦး၊ တအာင်းပရဟိတပညာရေးဘော်ဒါဆောင် (TEC) ကျောင်းဆရာ (၅) ဦး နှင့်အတူ ရွှေဖီမြေသတင်း အေဂျင်စီ ရုပ်သံသတင်းထောက်တို့ကို ချွင်းချက် မရှိ အမြန်ဆုံးပြန်လွှတ်လာပေးရန်အတွက် အောက်တိုဘာ (၅) ရက်နေ့က ထုတ်ပြန်ခဲ့ကြောင်းသိရသည်။
