စစ်ကောင်စီတို့ မတရားဖမ်းဆီး ခေါ်ဆောင်သွားသည့် သျှမ်းနီအဆိုတော် လူငယ်တစ်ဦးဖြစ်သည့် စိုင်းဝေယံအောင်သည် ယနေ့အထိ အဆက်အသွယ်မရရှိသေးသဖြင့် မိသားစုဝင်များနှင့် ဆက်စပ် ပက်သက်သူများက စိုးရိမ်နေကြောင်း စုံစမ်းသိရှိရသည်။
သျှမ်းနီအဆိုတော် လူငယ်တစ်ဦးဖြစ်သည် စိုင်းဝေယံအောင်ကို ၎င်း၏ဖေ့ဘုတ် Facebook လူမှုကွန်ယက်စာမျက်နှာတွင် စစ်ကောင်စီ လက်အောက်ခံအဖြစ် လက်ခံသည့် စစ်ကိုင်းတိုင်းအတွင်းမှ တိုင်းရင်းသားရေးရာဝန်ကြီး တစ်ဦးကို ဝေဖန် ရေးသားသည်ဆိုသည့် အကြောင်းပြချက်ဖြင့် လာရောက်ဖမ်းဆီးခြင်းဖြစ်ကြောင်း စိုင်းဝေယံအောင်နှင့် နီးစပ်သူ ဟုမ္မလင်းဒေသခံ စိုင်းလုံက သျှမ်းသံတော်ဆင့်ကို ပြောသည်။
“သူ့ကို လာဖမ်းတုန်းက ရဲထက် စစ်သားက ပိုများပါတယ်၊ စကစနဲ့ပေါင်းတဲ့ စစ်ကိုင်းတိုင်းက တိုင်းရင်းသား ရေးရာ ဝန်ကြီး ကို ဝေဖန်လို့ ဆိုပြီး လာဖမ်းတာတဲ့၊ အခုလည်း စိုင်းဝေယံအောင်ကို ဟုမ္မလင်းက စစ်တပ်ထဲမှာပဲ ဖမ်းထားတယ်လို့ ကြား ရတယ်” ဟု စိုင်းလုံက ပြောသည်။
ဟုမ္မလင်းမြို့ရှိ ကတ်သားရွာသား သျှမ်းနီအဆိုတော်ကို အနောက်မြောက်ပိုင်း တိုင်းစစ်ဌာချုပ်လက်အောက်ခံ ဟုမ္မလင်းရှိ တပ်ရင်းမှ စစ်သားများစွာဖြင့် လာရောက်ဖမ်းဆီးခြင်းဖြစ်ပြီး ဖမ်းဆီးသွားသည့်အချိန်မှ ယခုအချိန် အထိ မိသားစုဝင်များနှင့် တွေ့ခွင့်မပေးသဖြင့် မိဘဆွေမျိုးများက စိုးရိမ်ပူပန်နေရကြောင်းလည်း သိရသည်။
“သူတို့ ဖမ်းခေါ်သွားကတည်းက ဘာမှ အဆက်အသွယ်မှ မရသေးဘူး၊ သူနေကောင်းလား ဘယ်လိုရှိနေမလဲ ဆိုတာလည်း မသိရဘူး၊ ပိုပြီးဆိုးတာက လက်ရှိ ဟုမ္မလင်းထဲ ရှိနေတဲ့ ပျူစောထီးတွေက သူ့ကို SNA အဖွဲ့ဝင် ဖြစ်တယ်ဆိုပြီး သတင်းလွင့်နေတာလည်းရှိတော့ သူ့အတွက်ပိုပြီးတော့ စိတ်ပူရတယ်၊ ကျနော်တို့ကတော့ သူ့ကို အဆိုတော်တစ်ဦး၊တက်ကြွလှုပ်ရှားသူတစ်ဦးလို့ပဲ သိထားတယ်” ဟု စိုင်းလုံက ပြောသည်။
စစ်တပ်နှင့် ပူးပေါင်းသွားသည့် စစ်ကိုင်းတိုင်းမှ တိုင်းရင်းသားရေးရာဝန်ကြီးကို ဝေဖန်ရေးသားသည့်အတွက် ကြောင့် ဖမ်းဆီးခံရသည့် စိုင်းဝေယံအောင်သည် ပြီးခဲ့သည့် ၂၀၂၀ အထွေထွေရွေးကောက်ပွဲတွင် ရှမ်းနီပါတီ အတွက် တက်ကြွစွာ ပါဝင်ကူညီပေးသူ တစ်ဦးဖြစ်သည့် အပြင် လူမှုရေးကိစ္စများတွင်လည်း ပါဝင်လုပ်ရှားသူ ဖြစ်ကြောင်းလည်း သိရသည်။
ပြီးခဲ့သည့် အောက်တိုဘာလ ၁ ရက်နေ့တွင် စိုင်းဝေယံအောင် နှင့်အတူ ဟုမ္မလင်းမြို့နေ ကိုဖြိုးသက်တင်၊ ကိုစွမ်းထက်တို့ကိုလည်း ၎င်းတို့၏ နေအိမ်တွင် စစ်ကောင်စီတပ်များက စီးနင်းဝင်ရောက် ဖမ်းဆီးခဲ့ပြီး လက်ရှိတွင် သျှမ်းနီနယ်မြေ ဟုမ္မလင်းမြို့နယ်ထဲတွင် စစ်ကောင်စီအဖွဲ့က ဖမ်းဆီးထားသည့် သံဃာတော်များ အပါအဝင် စုစုပေါင်း (၁၂) ဦးထိ ရှိနေပြီဖြစ်ကြောင်းလည်း သိရသည်။
