သျှမ်းပြည်တောင်ပိုင်း ပင်လောင်းမြို့နယ် ဆည်ခေါင်းကျေးရွာတွင် စစ်ကောင်စီမှ (၁၀)ရက်ကြာ ဖမ်းဆီးသွားသည့် တောင်ရိုးအထောက်ကူပြု ကိုအောင်ဆန်ကို ယနေ့ထိ အမှုဖွင့်ထားခြင်း မရှိသေးကြောင်း စုံစမ်းသိရသည်။
တောင်ရိုးအထောက်အကူပြု ကိုအောင်ဆန်းကို ဖမ်းဆီးသွားပြီးနောက် လက်ရှိတွင် ပင်လောင်းမြို့ ရဲစခန်းတွင် ရှိနေပြီး မည်သည် အမှုကြောင့် ဖမ်းဆီးထားသည်ကို မသိရှိရသေးကြောင်း ကိုအောင်ဆန်းနှင့် နီးစပ်သူ က သျှမ်းသံတော်ဆင့်ကို ပြောသည်။
“ အခုက ပင်လောင်း ရဲစခန်းမှာရောက်သွားပြီး။ ဘာကြောင့် ဖမ်းတာလည်း မသိသေးဘူး။ ဘာအမှုနဲ့ဖမ်းတာလည်း မသိရသေးဘူး။ ကျနော်တို့လည်း ခုချိန်ထိ ဘာမှ အသေးစိတ်မသိရသေးဘူး” ဟု ကိုအောင်ဆန်းနှင့် နီးစပ်သူက သျှမ်းသံတော်ဆင့်ကို ပြောသည်။
လက်ရှိတွင် ကိုအောင်ဆန်းကို ဖုန်းဖြင့် အဆက်သွယ်ရရှိပြီး အပြင်မှာတွေ့ခွင့်မရသေးကြောင်း သိရသည်။
“ ဖုန်းပြောရတယ်။ အဆက်သွယ်ရတာပေါ့။ ကျန်းကျန်းမာမာရှိနေပါတယ်။ အပြင်မှာတော့ မတွေ့ရသေးဘူး။ အခုက သူကို ဘာအမှုနဲ့ဖွင့်တာပဲ မသိရသေးတာ။ အဆက်သွယ်ရတော့ စိတ်နဲနဲအေးတာပေါ့” ဟု အထက်ပါ နီးစပ်သူက ပြောသည်။
ကိုအောင်ဆန်းကို စက်တင်ဘာ ၂၄ ရက်နေ့က ဖမ်းဆီးသွားပြီး ၎င်းအိမ်တွင်းရှိသည့် ပစ္စည်းများကိုပါ စစ်ကောင်စီတပ်များ က သိမ်းယူသွားကြောင်းသိရသည်။
ကိုအောင်ဆန်းကို လာရောက်ဖမ်းဆီးခြင်းသည် စက်တင်ဘာ (၂၄) ရက် မနက်ပိုင်းတွင် တောင်ရိုးပြည်သူကာကွယ်ရေး တပ်ဖွဲ့ PDF က အဖွဲ့ကို ဖွဲ့စည်းပြီးကြောင်း နှင့် စစ်ကောင်စီနှင့် အလုပ်တွဲလုပ်သူများကို တိုက်ခိုက်သွားမည် ဟု ထုတ်ပြန်ခဲ့သောကြောင့် လာရောက်ဖမ်းဆီးသွားကြောင်းသိရသည်။
