မြန်မာ- တရုတ်နယ်စပ် မူဆယ်မြို့ ရှိ ကျယ်ဂေါင် ကုန်သွယ်ရေးဂိတ်ကို ပြန်လှည်ဖွင့်လှစ်သွားမည်ဖြစ်ကြောင်း အောက်တိုဘာ ၃ ရက်နေ့က မူဆယ်-နမ့်ခမ်းနယ်စပ်ကုန်သွယ်ရေး ကုန်သည်များ အသင်း ထုတ်ပြန်ခဲ့ကြောင်း သိရသည်။
ထိုကုန်သွယ်ရေးဂိတ်ကို ပြန်လှည်ဖွင့်ပေးသော်လည်း တရုတ်နိုင်ငံတွင်းတွင် ကျန်ရှိနေသည့် ကုန်ပစ္စည်းများကိုသာ တင်းထုတ်ခွင့်ပြုသွားမည်ဖြစ်ကြောင်း သိရသည်။
“ တရုတ်ဘက်က ကျန်နေသေးတဲ့ ပစ္စည်းတွေကိုပဲ မြန်မာဘက်ကိုတင်သွင်းလာခိုင်းတာ။ မြန်မာဘက်ကနေ တင်သွင်းဖို့မရဘူးလို့ ပြောတယ်” ဟု မူဆယ်မြို့ကျယ်ဂေါင်တွင် နေထိုင်သည့် သူက ပြောသည်။
မြန်မာနိုင်ငံဘက်မှ ကုန်ပစ္စည်းများကို တင်သွင်းခွင့်မရရှိဘဲ တရုတ်နိုင်ငံဘက်မှ ကုန်များကို ဝယ်ယူရမည်ဆိုပါက ပြည်သူများ စားဝတ်နေရေးအတွက် ခက်ခဲမှုများစွာရှိလာနိုင်ကြောင်းသိရသည်။
ထိုအပြင် တရုတ်ငွေဈေးနှုန်း(ယွမ်) လည်း ဈေးထက်မြင့်တက်လာမှာကို ပြည်သူများက စိုးရိမ်နေကြသည်။
“ ကျမတို့လည်း တရုတ်ပြည်ဖက်ကကျန်နေတဲ့ ကုန်ပစ္စည်းတွေကိုဘဲ ယူဆောင်လာရမယ်လို့ကြားတယ်။ ဒီဘက်က တင်သွင်းလို့မရဘူး ဆိုတော့ ခက်တာပေါ့။ စားဝတ်နေရေးအတွက်လည်း ပိုခက်လာတယ်။ သူတို့ဘက်ပစ္စည်း ကိုပဲ တင်သွင်း လာရင်လည်း ကျမတို့ဘက်ကတော့ အဆင်မပြေဘူး။ အဲလိုလုပ်ရင် သူတို့တရုတ်ငွေဈေးလည်း ပိုပြီးဈေးတက် လာမှာကို စိုးရိမ်ရတယ်” ဟု မူဆယ်မြို့ ကုန်စုံဆိုင် အမျိုးသမီးတဦးက ပြောသည်။
ထိုသို့ တရုတ်နိုင်ငံတွင် ရှိသည့် ကုန်ပစ္စည်းများကိုသာ တင်သွင်းသွားမည်ကို အသေးစိတ် မသိရှိရသေးကြောင်း မူဆယ် -နမ့်ခမ်း ကုန်သည်ရေးကုန်သည်အသင်းက ပြောသည်။
“ ကျမတို့လည်း ဒီကိစ္စနဲ့ပတ်သတ်ပြီးတော့ အသေးစိတ်မသိရသေးဘူး။ ကျမတို့လည်း ထုတ်ပြန်စာထဲကအတိုင်းဘဲ သိရတယ်။ ဘယ်နေ့ဘယ်ချိန်ဖွင့်မလဲဆိုတာမသိရသေးဘူး” ဟု မူဆယ်-နမ့်ခမ်း နယ်စပ်ကုန်သည်ရေးကုန်သည် အသင်းက ပြောသည်။
မြန်မာနိုင်ငံတွင် စစ်အာဏာသိမ်းယူပြီးနောက်ပိုင်း ကိုဗစ် ၁၉ တတိယလှိုင်းနှင့်အတူ မြန်မာ တရုတ်နယ်စပ် ကုန်သွယ်ရေးလမ်းနယ်စပ်ဂိတ်ကို ပိတ်ထားခဲ့ကြောင်းသိရသည်။
အလားတူ မြန်မာ-တရုတ် နယ်စပ် ကုန်သွယ်ရေးဂိတ် ချင်းရွှေဟော် ဂိတ်ကိုလည်း လာမည့် အောက်တိုဘာ ၆ ရက်နေ့မှစတင်ပြီး ပိတ်သွားမည်ဖြစ်ကြောင်းသိရသည်။
Leave a Comments