သျှမ်းပြည် မြောက်ပိုင်း သိန္နီမြို့ စီးပွားရေးဘဏ်စောင့် စစ်သား မှ ယမန်နေ့ (စက်တင်ဘာ ၂၈)ရက် မနက်ပိုင်းတွင် လူငယ်တစ်ဦးကို အကြောင်းမဲ့ စစ်ဖိနပ်ဖြင့်ကန်ပြီး အကြိမ်ကြိမ်ရိုက်နှက်မှု ပြုလုပ်ခဲ့ကြောင်း စုံစမ်းသိရသည်။
သိန္နီမြို့ စီးပွားရေးဘဏ်စောင့် အရက်မူးနေသည့် စစ်သား မှ ဘဏ်ရှေ့တွင် ဆံပင်ညှပ်ဆိုင်ဖွင့်ထားသည့် လူငယ်တစ်ဦး၏ ဆိုင်ကို အရက်မူးပြီး ဝင်သွားကာ၊ ဆံပင်ညှပ်ဆိုင်ဖွင့်လှစ်ထားသည့် လူငယ်ကို စစ်ဖိနစ်ဖြင့် နင်းပြီး၊ အကြိမ်ကြိမ်ရိုက်နှက်မှု၊ ပါးချမှုတို့ပြုလုပ်ခဲ့ကြောင်း မျက်မြင်တွေ့ရှိသည့် သိန္နီဒေသခံ တစ်ဦးက သျှမ်းသံတော်ဆင့်ကို ပြောသည်။
“ စစ်သားက အရက်မူးပြီး အဲ့ဆိုင်ကိုဝင်သွားတယ်။ အဲ့ကလေးရဲ့ ခေါင်းကို ထိုးကြိတ်တယ်။ စစ်ဖိနပ်နဲ့ ထပ်ခါထပ်ခါ ပိတ်ကန်နင်းချတယ်။ သူ့နားတွေ ယောင်သွားတယ်။ လမ်းတောင် မလျှောက် နိုင်တော့ဘူး ” ဟု မျက်မြင်တွေ့ရှိသူ က ဆိုသည်။
အဆိုပါ စစ်သားသည် ဆံပင်ညှပ်ဆိုင်ဖွင့်ထားသည့် လူငယ်ကို ထိုးနှက်ပြီး ခြေထောက်ဖြင့် ကန်သည့် အပြင် သေနတ်ကို မောင်းတင်ပြီး ခြိမ်းခြောက်သေးကြောင်း မျက်မြင်တွေ့ရှိသူ က ပြန်ပြောပြသည်။
ထိုရိုက်နှက်ခံရသည့်ဖြစ်စဉ်နှင့်ပတ်သက်ပြီး ၎င်း၏ လူမှုကွန်ရက် စာမျက်နှာပေါ်တွင် ရေးသားခဲ့ သော်လည်း သက်ဆိုင်ရာမှ လာရောက်ပြီး ၎င်းရေးသားထားသည့် စာကို ပြန်ဖြုတ်ခိုင်းကြောင်း သိရသည်။
“ ဒီနေ့ နေ့လည်ခင်းမှာလည်း အဲ့ကလေး အိမ်ကို သက်ဆိုင်ရာ ဗိုလ်မှူးတွေ အုပ်ချုပ်ရေးမှူးတွေနဲ့ မြို့မိ၊ မြိုဖက လူတွေလာပြီးတောင်းပန်တယ်။တင်ထားတဲ့ ပိုစ့်ပြန်ဖျက်ခိုင်းတယ်။ လျော်ကြေးပေး မယ်ဆိုပြီး ခုထိတော့ ဘာမှ မရသေးဘူး” ဟု သိန္နီ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောပြသည်။
စစ်ကောင်စီ တပ်မှ ရိုက်နှက်ခဲ့သည့် လူငယ်သည် မိသားစုဝင်များကို ဆံပင်ညှပ်သည့် ပညာဖြင့် ရိုးသားစွာ ရှာဖွေကျွေးမွေးနေသည့် လူငယ်ဖြစ်ကြောင်း၊ ထိုကဲ့သို့ အပြစ်မဲ့ လူငယ်ကို အကြောင်းမဲ့ ရိုက်နှက်နေသည့် သတင်းကြားရသည့်အတွက် စိတ်မကောင်းကြောင်း၊ နောက်နောင် ထိုကဲ့သို့ မဖြစ်စေလိုကြောင်းလည်း သိန္နီပြည်သူများက ပြောဆိုလိုက်သည်။
