သျှမ်းပြည်မြောက်ပိုင်း လားရှိုးမြို့ တအာင်းကျောင်းသားနှင့် လူငယ်များအဖွဲ့ (TSYU)နှင့် တအာင်းပရဟိတ ပညာရေးဘော်ဒါဆောင် (TEC) မှ ဆရာများကို စစ်ကောင်စီ မှ ဖမ်းဆီးခေါ်ဆောင်သွားကြောင်းသိရသည်။
လာရှိုးမြို့ အခြေစိုက် TSYU မှ ရုံးဝန်ထမ်း တစ်ဦး နှင့် TEC မှ ဆရာ (၅)ဦးကို စက်တင်ဘာ ၂၅ရက် ည (၁)နာရီတွင် စစ်ကောင်စီ တပ်ဖွဲ့ မှ ဖမ်းဆီးခေါ်ဆောင်သွားကြောင်း သတင်းရရှိသည်။
“ သူတို့ (၆) ယောက်ကို တခါထဲဖမ်းမိတာမဟုတ်ဘူး။ မိုင်းအောင်သက်ဦးက သူငယ်ချင်းအိမ်လိုက်သွားတာ။ သူကို အဲ့အိမ်မှာ နာမည်တပ်ခေါ်ပြီးတော့ ဖမ်းသွားတာ။ သေနတ်နဲ့ချိန်ပြီးတော့ ဖမ်းဆီးသွားတယ်လို့ပြောတယ်။ သူကို ဘာကြောင့်ဖမ်းဆီးသွားလဲ တော့ ကျနော်တို့ မသိရသေးဘူး” ဟု တအောင်းဥပဒေ အထောက်ကူပြုအဖွဲ့ဝင် တစ်ဦး က သျှမ်းသံတော်ဆင့် ကို ပြောသည်။
အဆိုပါ တအောင်းပရဟိတ ပညာရေးဘော်ဒါဆောင် ဆရာ (၅) ဦးကို စရဖ၊ ဆယ်အိမ်မှူး၊ရာအိမ်မှူး တို့မှ ကား(၅)စီးဖြင့် ကျောင်းသို့လာပြီး ဖမ်းဆီးခံရကြောင်း၊ ဖမ်းဆီးခံရ ပြီးနောက် ကျောင်းတွင်းရှိ ဆိုင်ကယ်များပါ ပျောက်ဆုံးသွားကြောင်း သိရသည်။
“ သူတို့ (၅) ယောက်ကို ကျောင်းစောင့်အဖြစ်ထားထားတာ။ သူတို့ကိုဖမ်းပြီးသွားတဲ့နောက် ကျနော်ကျောင်းမှ ာသွားကြည့်တာ ဆိုင်ကယ်တွေတော့ မရှိတော့ဘူး။ ပြီးတော့ ကျောင်းတံခါးတွေလည်း အကုန်ဖွင့်ထားတယ်။ ဆိုင်ကယ်ကို ဘယ်သူတွေ ယူသွားလဲ ဆိုတော့ ကျနော်တို့လည်း အတိကျမပြောနိုင်ဘူး။ စရဖ အဖွဲ့က လာဖမ်းသွားတာ။ စစ်တပ်တွေလည်း ပါမှာပေါ့။ ။ကား (၅) စီးလောက်ပါလာတယ်” ဟု ဖမ်းဆီးခံရသည့် ကျောင်းဆရာ(၅)ဦး နှင့် နီးစပ်သူ တစ်ဦးက ပြောသည်။
ထို တအောင်းလူငယ် (၆) ဦးကို စစ်ကောင်စီတပ်ဖွဲ့က ဖမ်းဆီးသွားပြီးနောက်ပိုင်း အဆက်သွယ်ပြန်မရရှိသေးကြောင်း၊ မည့်သည် အကြောင်းပြချက်ဖြင့် ဖမ်းဆီးသွားကြောင်း ကို လည်း ယနေ့ အချိန်ထိ မသိရှိရသေးကြောင်း အထက်ပါ လူက ပြောသည်။
ဖမ်းဆီးခံရသော တအောင်းပရဟိတ ကျောင်းဆရာ (၅) ဦးသည် မိုင်းကျော်ဝင်၊ မိုင်းနိုင်ဝင်း၊ မိုင်းညီလွယ်၊ မိုင်းအောင်သန်းဌေး၊ မိုင်းဘဦးတို့ ဖြစ်ကြောင်းသိရသည်။
ဖေဖော်ဝါရီ ၁ ရက်နေ့ စစ်အာဏာသိမ်းယူပြီးနောက်ပိုင်း စစ်ကောင်စီတပ်ဖွဲ့မှ ပြည်သူများကို အကြောင်းမဲ့ နေ့စဉ်ဖမ်းဆီးနေလျက်ရှိကြောင်းသိရသည်။
Leave a Comments