စစ်အာဏာသိမ်းမှုကို လက်မခံသည့် အာခါတိုင်းရင်းသားရေးရာဝန်ကြီးဟောင်း ဦးယာကုပ် ကို စစ်ကောင်စီမှ အကြမ်းဖက်ဥပဒေဖြင့် အမှုဖွင့်ထားကြောင်း စုံစမ်းသိရသည်။

သျှမ်းပြည် အာခါတိုင်းရင်း သားရေးရာ ဝန်ကြီးအဖြစ် ရွေးချယ်ခံရသည့် NLD ပါတီမှ ဦးယာကုပ်အား အာဏာသိမ်းစစ်ကောင်စီ လက်အောက်ခံ စရဖ(စရတ)က စက်တင်ဘာလ ၂၀ ရက်တွင် အကြမ်းဖက်တိုက်ဖျက်ရေး ဥပဒေဖြင့် အမှုဖွင့်ထားကြောင်း သိရသည်။

“ဝန်ကြီးတွေ၊ လွှတ်တော်ကိုယ်စားလှယ်တွေ အပါအဝင် သာမာန်အရပ်သား ရိုးရိုးအပါအဝင်ကို သူတို့က အမှုတွေ လျှောက်တပ်ပြီး တရားစွဲနေတာပဲ၊ ခုဆိုလည်း CRPH နဲ့ NUG တို့ကို ထောက်ခံလို့ဆိုပြီး ဦးယာကုတ် ကို တာချီလိတ် စအဖက တပ်ကြပ် နန်းဝင်းဌေးက တရားလိုပြုပြီး တရားစွဲနေတာတဲ့” ဟု တာချီလိတ်မြို့နေ NLD ပါတီဝင် တစ်ဦးက သျှမ်းသံတော်ဆင့်ကို ပြောသည်။

အာခါတိုင်းရင်းသားဝန်ကြီးအဖြစ် ရွေးချယ်ခံရသည့် ဦးယာကုတ်အား CRPH၊ NUG PDF တို့နှင့် ချိတ်ဆက် ပက်သက်မှုရှိသည်ဟုဆိုကာ စစ်ဖက်ရေးရာလုံခြုံရေးတပ်ဖွဲ့(တာချီလိတ်)မှ တပ်ကြပ် နန်းဝင်းဌေး က တရား လိုပြုလုပ်ကာ ဟောင်လိတ်နယ်မြေရဲစခန်းတွင် (ပ)၁၁၂/၂၀၂၁အကြမ်းဖက်တိုက်ဖျက်ရေးဥပဒေပုဒ်မ ၅၂(က) ဖြင့် ၂၀၂၁ခုနှစ် စက်တင်ဘာလ(၂၀)ရက်နေ့က အမှုဖွင့်ထားခြင်း ဖြစ်ကြောင်း သိရသည်။

စစ်တပ်မှ နိုင်ငံတော် အာဏာသိမ်းပြီးနောက်ပိုင်းတွင် ပြည်ခိုင်ဖြိုးပါတီမှလွှဲပြီး ၂၀၂၀ ရွေးကောက်ပွဲက အနိုင် ရပါတီများထဲမှ စစ်ကောင်စီ အာဏာသိမ်းမှုကို လက်မခံရသည့်အပြင် တိမ်းရှောင် လွတ်မြောက်နေသည့် အနိုင်ရ ကိုယ်စားလှယ်များကို အကြမ်းဖက်မှုတိုက်ဖျက်ရေးဥပဒေဖြင့် အမှုဖွင့်အရေးယူနေကြောင်း သိရသည်။

လက်ရှိတွင် သျှမ်းပြည် အရှေ့ပိုင်းအနေဖြင့် အကြမ်းဖက်မှုတိုက်ဖျက်ရေးဥပဒေဖြင့် အမှုဖွင့်ခံရပြီး ဖမ်းဆီးရန် ဝရမ်းထုတ်ခံထားရသူများမှာ အမျိုးသားဒီမိုကရေစီအဖွဲ့ချုပ်ပါတီ(NLD) ဝင်များ ဖြစ်ကြသည့် တာချီလိတ်မြို့မှ ဦးစိုင်းဆိုင်တွီ၊ ဦးယာကုပ်၊ မိုင်းယောင်းမြို့မှ ဦးစိုင်းရှဲန်တစ်လုံ၊ ကျိုင်းတုံမြို့မှ ဒေါက်တာ ဝဏ္ဏစိုး အပြင် “ဝ”အမျိုးသားပါတီ(WNP)မှ မိုင်းတုံမြို့တွင် ဒေါက်တာ အမ်ဇော်လတ် (ခ)ဆမ်မားကို့(စ်)တို့ ဖြစ်ကြောင်း သိရသည်။