သျှမ်းပြည်မြောက်ပိုင်း နမ္မတူမြို့နယ်ရှိ အမျိုးသမီး တစ်ဦးသည် စုကြေးငွေ ကျပ်သိန်း ၂၀၀၀ ကို လိမ်လည်ပြီး ထွက်ပြေးနေကြောင်း သိရသည်။
နမ္မတူမြို့နယ်တွင် စုကြေးငွေ အများအပြားပြုလုပ်ကြပြီး ထိုစုကြေးငွေကို လိမ်သွားသည် ဒေါ်စန်းစန်းထွေးသည် ထွက်ပြေးလွှတ်မြောက်နေကြောင်း ၊ ထိုလိမ်မှုကြောင့် ငွေကြေး ဆုံးရှုံးသည့် အမျိုးသား တစ်ဦး သေဆုံးသွားကြောင်း နမ္မတူမြို့နယ် ငွေလိမ်ခံရသည့် အမျိုးသမီး တစ်ဦး က သျှမ်းသံတော်ဆင့် ကို ပြောသည်။
“ နမ္မတူက ပိုက်ဆံစုစုပေါင်း ကျပ်သိန်း ၂၀၀၀ လောက် ပါသွားတယ်။ ငွေလိမ်ခံရတဲ့ ဦးလေးတယောက် ကျပ်သိန်း (၆၀) ဆုံးရှုံးတယ်။ ကျမလည်း (၁၅)သိန်းလောက်ပါသွားတယ်လေ။ နှစ်နှစ်ခါခါ မစားရက်ဘဲ စုထားတဲ့ ပိုက်ဆံလေ။ သူက သွေးတိုးရောဂါရှိတော့ အဲလူက ထွက်ပြေးသွားပြီး လို့သိလိုက်တာနဲ့ သွေးတက်ပြီး တစ်ရက်၊ နှစ်ရက်လောက်နေပြီး သေသွားတာ” ဟု ၎င်းအမျိုးသမီး က ဆိုသည်။
စုကြေးငွေ ကျပ်သိန်း ၂၀၀၀ လိမ်ညာသွားသည့် အမျိုးသမီးသည် လက်ရှိမှာ မည်သည့်နေရာ ရှောင်ပြေးနေသည် မသိရှိကြောင်း ရဲများကို တိုင်ကြားအကြောင်းကြားထားသော်လည်း ဖမ်းဆီးနိုင်ခြင်းမရှိသေးပေ။
လက်ရှိကာလသည် ကိုဗစ်-၁၉ ကူးစက်မှုနှုန်းမြင့်တက်မှုနှင့် နိုင်ငံရေး ရှုပ်ထွေးမှုကြား စီးပွားရေး အဆင်မပြေမှုကြောင့် စားဝတ်နေရေး ခက်ခဲနေကြောင်း သိရသည်။
“အခုကာလနဲ့ က ဘာအလုပ်မှမရှိဘူး။ ယောင်္ကျားလည်း အလုပ်နား၊ ရဲကိုသွားတိုင်လည်း ရဲတွေက မဖမ်းပေးနိုင်ဘူး။ အမှုဖွင့်တာမျိုးလည်းမရှိဘူး” ဟု အထက်ပါ အမျိုးသမီးတဦးက ပြောသည်။
နမ္မတူမြို့နယ်တွင် စုကြေးငွေကြောင့် လိမ်ပြီး ထွက်ပြေးသွားသည့် အကြိမ်ရေ (၄) ကြိမ်ရှိပြီးဖြစ်ကြောင်းသိရသည်။
