သျှမ်းပြည် လျှပ်စစ်နှင့် စွမ်းအင်ဝန်ကြီးဟောင်း စိုင်းရှဲန်တစ်လုံကို အကြမ်းဖက် တိုက်ဖျက်ရေး ပုဒ်မ ၅၂(က) ဖြင့် အာဏာသိမ်းစစ်ကောင်စီ အဖွဲ့က အမှုဖွင့် အရေးယူရန်ထားကြောင်း သတင်းရရှိသည်။

ယမန်နေ့ စက်တင်ဘာလ ၂၀ ရက်နေ့တွင် အရပ်သား အစိုးရလက်ထက်က သျှမ်းပြည်အစိုးရ အဖွဲ့ဝင် ပြည်နယ်လျှပ်စစ် နှင့် စွမ်းအင်ဝန်ကြီး စိုင်းရှဲန်တစ်လုံကို CRPH နှင့် NUG နှင့် ချိတ်ဆက်မှု ရှိသည်ဟု ဆိုကာ မိုင်းယုနယ်မြေရဲစခန်းတွင် အကြမ်းဖက်တိုက်ဖျက်ရေးဥပဒေပုဒ်မ ၅၂(က)ဖြင့် အမှုဖွင့် ခံထားရခြင်း ဖြစ်ကြောင်း သိရသည်။

“စစ်ကောင်စီလက်အောက်ခံ မိုင်းယုက စစ်ဗိုလ်တစ်ယောက်က တရားလိုပြုပြီးတော့ မိုင်းယုမြို့နယ်က ရဲစခန်းမှာ အမှုဖွင့် အရေးယူထားတယ်တဲ့၊ CRPH နဲ့ NUG ကို အားပေးထောက်ခံမှု ပြုလုပ်တယ်၊ ပြည်သူ တွေကို အကြမ်းဖက်အောင် စည်းရုံးမှု ပြုလုပ်နေတဲ့ အဖွဲ့အစည်းဖြစ်နေတယ်ဆိုပြီး အကြမ်းဖက် တိုက် ဖျက်ရေး ဥပဒေနဲ့ အမှုဖွင့် အရေးယူထားတယ်” ဟု တောင်ကြီးမြို့နေ NLD ပါတီဝင် တစ်ဦးက ပြောသည်။

ဦးစိုင်းရှဲန်တစ်လုံသည် ပြီးခဲ့သည့် ၂၀၂၀ ရွေးကောက်ပွဲတွင် အမျိုးသားဒီမိုကရေစီအဖွဲ့ချုပ် (NLD) ပါတီမှ သျှမ်းပြည် လွှတ်တော်၊ မိုင်းယောင်းမြို့နယ် မဲဆန္ဒနယ်အမှတ်(၂)၌ အနိုင်ရရှိခဲ့သူ ဖြစ်သည့်အပြင် ၂၀၁၅ ရွေးကောက်ပွဲ တွင်လည်း သျှမ်းပြည်လွှတ်တော် ကိုယ်စားလှယ်အဖြစ် ရွေးကောက်တင်မြှောက်ခံရသူ ဖြစ်သည်။

လက်ရှိတွင် သျှမ်းပြည်နယ် အစိုးရ အဖွဲ့ဝင်များဖြစ်သည့် ဦးစိုင်းရှဲန်တစ်လုံ အပါအဝင် သျှမ်းပြည် ဝန်ကြီး ချုပ် ဒေါက်တာလင်းထွဋ်၊ ပြည်နယ် စီမံကိန်းနှင့် ဘဏ္ဍာရေးဝန်ကြီး ဦးစိုးညွန့်လွင်၊ အင်းတိုင်းရင်းသားလူ မျိုးရေးရာ ဝန်ကြီး ဒေါက်တာ ထွန်းလှိုင် တို့သည်လည်း အဂတိလိုက်စားမှု တိုက်ဖျက်ရေးဥပဒေဖြင့် အမှုဖွင့် ခံထားရကြောင်း သိရသည်။