သျှမ်းပြည် တောင်ကြီးမြို့နယ် ညောင်ရွှေအကျဉ်းထောင် (တောင်လေးလုံး)မှ ကိုဗစ်-၁၉ သံသယရှိ အကျဉ်းသားများကို ထောင်နေရာ ရွှေ့ပြောင်းမှုများ ပြုလုပ်ပေးစဉ် ဆန္ဒပြကြွေးကြော်မှုများ ပြလုပ်ခဲ့ကြောင်း သတင်းသိရသည်။
စက်တင်ဘာ ၁၇ရက် တွင် PDF အပါအဝင် နိုင်ငံရေး ဆက်စပ်သူများထဲမှ ကိုဗစ်-၁၉ သံသယ ရှိသူများကို ထောင်နေရာပြောင်းရွှေ့ချိန် အချုပ်ကားပေါ်တွင် “ အရေးတော်ပုံအောင်ရမည်” ဟု ကြွေးကြော်ဆန္ဒပြခဲ့သည့်အတွက် ထိုနေ့တွင် တောင်ကြီးအချုပ်ခန်းထဲ တရက်လုံး ထမင်းမစားခဲ့ရကြောင်း ဖမ်းခံရသူများကို ကူညီပေးနေသည့် တောင်ကြီး ဒေသခံ တစ်ဦးက သျှမ်းသံတော်ဆင့်ကို ပြောသည်။
“၁၇ ရက်နေ့မှာပါ၊ တောင်လေးလုံးကနေ တောင်ကြီးက အမှတ် ၁ ရဲစခန်းကို ကိုဗစ်သံသယနဲ့ ကိုဗစ် ပိုးတွေ့ တဲ့ အကျဉ်းသားတွေကို သယ်လာတယ်။ အေးသာယာမရောက်ခင် ကားပေါ်က သူတို့(ဖမ်းဆီးခံရသူများ) လေးတွေက “အရေးတော်ပုံအောင်ရမည်” ဆိုပြီးတော့ ကြွေးကြော်ဆန္ဒပြတာတဲ့။ ဆန္ဒပြတဲ့အတွက် အဲ့နေ့မှာ သူတို့တနေကုန် ထမင်းမကျွေးဘူးတဲ့” ဟု ဖမ်းဆီးခံရသူများကို ကူညီပေးနေသူ တောင်ကြီးမြို့ခံတစ်ဦးက သျှမ်းသံတော်ဆင့်ကို ပြောသည်။
တောင်ကြီးမြို့ အမှတ် ၁ ရဲစခန်းသို့ အပို့ခံလိုက်ရသော အကျဉ်းသားများ တွင် အသက် ၁၅ နှစ်သာ ရှိသည့် အမျိုးသမီးငယ် တစ်ဦးလည်းပါဝင်နေပြီး စုစုပေါင်း ၂၀ ခန့်ရှိနေကြောင်း နှင့် ၎င်းတို့ကို ထမင်းမကျွေးပဲ အငတ်ခံထားကြောင်း သိရသည်။
“သူတို့က စုစုပေါင်း ၂၀ ယောက်လောက်ရှိမယ်၊ မိန်းခလေးတွေလည်း ပါတယ်၊ တချို့ဆို ၁၅ နှစ်လောက်ပဲရှိ တယ်လို့ ကြားတယ်၊ သူတို့ကို သယ်လာတဲ့ လမ်းမှာ ကြွေးကြော်ဆန္ဒပြခဲ့လို့ ဆိုပြီး တောင်ကြီးက အချုပ်ခန်း ရောက်တော့ သူတို့တွေကို တစ်နေကုန် ထမင်းမကျွေးပဲ ထားတယ်တဲ့” ဟု အထက်ပါ ပုဂ္ဂိုလ်က ပြောသည်။
ညောင်ရွှေအကျဉ်းထောင် (တောင်လေးလုံးထောင်) ၌ သျှမ်းပြည် တောင်ပိုင်းရှိ မြို့နယ် အသီးသီးမှ အာဏာ ရှင်တော်လှန်ရေးလှုပ်ရှားသူ ၂၀၀ ကျော်ကို ထိန်းသိမ်းချုပ်နှောင်ထားခြင်း ဖြစ်ပြီး တောင်ကြီးမြို့ နယ်မှ အများဆုံး ဖမ်းဆီးခံထားရကြောင်း သိရသည်။
Leave a Comments