အမျိုးသား ညီညွှတ်ရေး အစိုးရ (NUG) မှ ပြည်သူ့ ကာကွယ်ရေးတပ် (PDF) တွေကို လက်နက်တပ်ဆင်ပေးနိုင်ရန်အတွက် စီစဉ်ပေးနေပြီဖြစ်ကြောင်း အမျိုးသားညီညွတ်ရေးအစိုးရ သယံဇာတ နှင့် သဘာဝပတ်ဝန်းကျင် ထိန်းသိမ်းရေးဝန်ကြီး ဒေါက်တာတူးခေါင် ကပြောဆိုလိုက်သည်။
မြန်မာနိုင်ငံအတွင်း ရှိ ပြည်သူ့ကာကွယ်ရေးတပ်(PDF) အနေဖြင့် လိုအပ်ချက်များစွာရှိကြောင်း၊ မြို့နယ်အားလုံး ပေးနိုင်ရန် စောင့်ဆိုင်းရမည် ဟု ဒေါက်တာ တူးခေါင် က ယမန်နေ့ (စက်တင်ဘာ ၂၁)ရက်တွင် ၎င်း၏ လူမှုကွန်ရက်စာမျက်နှာတွင် ရေးသားထားသည်။
“ မြို့နယ် (၃၃၀) အားလုံး နှံ့အောင်တော့ စောင့်ရမှာပေါ့။ တနိုင်ငံလုံးမှာ ရှိတဲ့ သိန်းချီသော PDF တွေ အတွက် လိုအပ်ချက်တွေတော့ အများကြီးပါ။ တမြို့နယ် အလက် (၁၀၀) ပေးဖို့ ဆိုရင်တောင် (၃၀၀၀၀) လိုအပ်တယ် လက်ရှိ အလှူခံထားတဲ့ ဒေါ်လာ (၁၇) သန်းဖိုး ဝယ်ရင်တောင် အလက် (၅၀၀၀)လောက်ပဲ ရမယ်။ အံ့သြဖို့ကောင်းတာက အဲ့ထက်မက တော့ဘူး”ဟု ဒေါက်တာတူးခေါင် က ပြောဆိုထားသည်။
လက်ရှိမှာတော့ PDFတပ်ဖွဲ့အနေဖြင့် လက်နက် အလုံအလောက်မရှိသေးကြောင်း၊ NUG အနေဖြင့် ထောက်ပံ့ပေးမည့် ဟုလည်းကြားသိရကြောင်း သျှမ်းပြည်တောင်ပိုင်း ဖယ်ခုံ PDF တစ်ဦးက သျှမ်းသံတော်ဆင့် ကို ပြောသည်။
“သတင်းကြားပါတယ်။ လက်ရှိ PDF တွေ လက်ထဲ လက်နက်တွေ အလုံအလောက် ရောက်ပြီလားဆိုတာ မရောက်သေးပါ။ ထောက်ပံ့မယ်လို့ပဲ ကြားထားတာပါ” ဟု မြေပြင် ဖယ်ခုံ PDF တစ်ဦးက ပြောသည်။
လက်ရှိမှာတော့ စစ်ကောင်စီ နဲ့ ဒေသကာကွယ်ရေးအဖွဲ့တွေကြား တိုက်ပွဲပြင်းထန်နေပြီး ချင်းပြည်နယ်၊ ကယားပြည်နယ်၊ စစ်ကိုင်းတိုင်း နဲ့ မကွေးတိုင်း ယောနယ်ဘက်မှာ တိုက်ပွဲတွေ ဖြစ်ပွားနေကြောင်းသိရသည်။
Leave a Comments