သျှမ်းပြည်တောင်ပိုင်း ပင်လုံမြို့တွင် ယနေ့ (စက်တင်ဘာ ၂၁) ရက် ည ၉ နာရီအချိန်မှ စကာ ဧည့်စာရင်းစစ်မည် ဟု အုပ်ချုပ်ရေးမှူးများက အသိပေးလိုက်ကြောင်း သတင်းရရှိသည်။
ဧည့်စာရင်းဆင်း စစ်ဆေးရာတွင် ပင်လုံမြို့ရှိ ဌာန ဆိုင်ရာပေါင်းစုံက ပူးပေါင်းဆောင်ရွက်ပြီး စစ်ဆေးသွားမည်ဖြစ်ကြောင်း သိရသည်။
“ ကျနော်တို့ ဌာနဆိုင်ရာ အကုန်ုလုံးပူးပေါင်းပြီးတော့ဆင်းစစ်မှာပါ။ ဒီနေ့ စပြီးစစ်မှာပါ။ လဝက၊ မီးသတ်၊ထွေအုပ်၊ ရဲတွေ၊ ပြီးတော့ ရပ်ကွက်အုပ်ချုပ်ရေးမှုတွေပါတယ်။ ကျနော်တို့လည်း လိုက်ဆင်းသွားမှာပါ။ ဘာလို့လည်းဆို သူတို့ ပြည်သူတွေကို လျောက်လုပ်မိမှာကြောက်ရတယ်လေ” ဟု အမည်နှင့် ရာထူးကို မဖော်ပြလိုသည့် အမျိုးသားတဦးက ပြောသည်။
ပင်လုံမြို့တွင် စစ်အာဏာရှင်ကို ဆန့်ကျင်မည်သူများ၊ PDF များရောက်ရှိလာမည်ကို စိုးရိမ်သဖြင့် စစ်ကောင်စီ လက်အောက်ခံ အဖွဲ့များက ဧည့်စာရင်း စတင်စစ်မည်ဖြစ်ကြောင်းသိရသည်။
“ သူတို့ တော်လှန်ရေးသမားတွေရောက်နေမှာကို စိုးရိမ်လို့ထင်တယ်။ အဲကြောင့် သူတို့ ဧည့်စာရင်း စစ်မှာထင်တယ်။ ပင်လုံမှာက ပုံမှန်ပါပဲ။ ဘာမှတော့ မရှိဘူး။ သူတို့ တော်လှန်ရေးသမားတွေကို ကြောက်လို့ လိုက်စစ်ဆေးတာပဲ” ဟု ပင်လုံမြို့ ဒေသခံတဦးက ပြောသည်။
ထိုသို့ ဧည့်စာရင်းစစ်ဆေးမှုကို အကြောင်းပြပြီး လူငယ်များကို ဖမ်းဆီးမှု ပြုလုပ်နေသည့် သတင်းကိုနေ့စဉ်နှင့်အမျှ ကြားရသဖြင့် ပြည်သူများတချို့က စိုးရိမ်မှုရှိကြောင်း သိရသည်။
“ ကျမတို့က မကြောက်ပါဘူး။ ဒါပေမယ့်စိုးရိမ်တာတော့ရှိတာပေါ့။ တခါမှ ဧည့်စရင်းစစ်တာမျိုး မခံဖူးဘူး။ သူတို့ မကောင်းတာလာလုပ်မှာဘဲ စိုးရိမ်ရတယ်။” ဟု ပင်လုံမြို့ ဒေသခံအမျိုးသမီးတဦးက ပြောသည်။
မြန်မာနိုင်ငံတွင် စစ်အာဏာသိမ်းယူပြီးနောက်ပိုင်း ညမထွက်ရ အမိန့် ကိုထုတ်ပြန်ခဲ့ပြီးနောက် ဧည့်စာရင်းများကို ပါစစ်ဆေးလာခဲ့ကြောင်းသိရသည်။
ပင်လုံမြို့တွင် အာဏာသိမ်းပြီး (၇) လအကြာတွင် ယခု ပထမဆုံးအကြိမ် ဧည့်စာရင်း စစ်ဆေးသွားမည်ဖြစ်ကြောင်း သိရသည်။
သျှမ်းပြည်တွင် ညအချိန်မတော် ဧည့်စာရင်း ဝင်ရောက်စစ်ဆေးမှုကြောင့် ဖမ်းဆီးခံရသည့် လူငယ်(၃၀)ကျော်ရှိကြောင်း သတင်းရရှိသည်။
Leave a Comments