သျှမ်းပြည် တောင်ပိုင်း တောင်ကြီးမြို့နယ် ညောင်ရွှေမြို့ရှိ ထောင်လေးလုံး အကျဉ်းထောင်တွင် ဖမ်းဆီးခံထားရသူများကို လာမည့် စက်တင်ဘာလ ၂၂ ရက်နေ့တွင် ရုံးထုတ်စစ်ဆေး မည် ဖြစ်ကြောင်း သတင်းသိရသည်။
“လာမယ့် ၂၂ ရက်နေ့ ဗုဒ္ဓဟူးနေ့မှာ အောက်(တောင်လေးလုံး)ဆင်းစစ်ရမယ်လို့တော့ သိရပါတယ်၊ အခုမှာ ထောင်တွင်း ကိုဗစ် – ၁၉ ကူးစက်မှုက ငြိမ်သွားပြီလို့တော့ ပြောတယ်၊ အဲ့ကြောင့် ထောင် တွင်းတရားရုံး မှာ အမှုတွေကို စတင်စစ်ဆေးတော့မယ်” ဟု မတရားဖမ်းဆီးခံနေရသူများကို ကူညီပေးနေသူ တစ်ဦးက သျှမ်းသံတော်ဆင့်ကို ပြောသည်။
ညောင်ရွှေအကျဉ်းထောင် အတွင်း၌ COVID-19 ကူးစက် ပျံ့နှံမှုသည် ယခုမှ တည်ငြိမ်စ အခြေအနေသာ ရှိနေသော်လည်း ယခုလို ရုံးချိန်းမှုများရှိခြင်းများ အပေါ်က နားမလည်နိုင်ကြောင်းနှင့် လက်ရှိ တောင်လေး လုံး ထောင်အတွင်းမှာလည်း ကိုဗစ် – ၁၉ ကြောင့် သေဆုံးခဲ့ရသူ၊ အနံ့ပျောက်သူ၊ ဖျားနာသူများလည်း ဆက်လက်ရှိနေကြောင်း ၎င်းထံမှ သိရသည်။
“အောက်ထောင် (တောင်လေးလုံး) က အမှုစစ်ဆေးတာတွေက ပြီးတဲ့ဇွန်လ တတိယပတ်ကတည်းက ရုံးထုတ်စစ်ဆေးမှုတွေကို ကိုဗစ်ကြောင့် သူတို့ပိတ်သွားခဲ့ပါတယ်၊ အခုဆိုတော့ သုံးလလောက်ရှိပြီပေါ့၊ ပြန်ဖွင့်တယ်ဆိုတာလည်း ရောဂါပိုးတွေ မရှိတော့ဘူးလို့ပြောတယ်၊ ဖျားနာတဲ့သူတွေ အနံပျောက်တဲ့ သူတွေရှိနေတယ်လို့လည်း ကြားတယ်၊ ဘယ်လို ထိန်းချုပ်မလဲတော့ မသိဘူး” ဟု ၎င်းက ပြောသည်။
ညောင်ရွှေအကျဉ်းထောင် (တောင်လေးလုံးထောင်) ၌ သျှမ်းပြည် တောင်ပိုင်းရှိ မြို့နယ် အသီးသီးမှ အာဏာရှင်တော်လှန်ရေးလှုပ်ရှားသူ ၂၀၀ ကျော်ကို ထိန်းသိမ်းချုပ်နှောင်ထားခြင်း ဖြစ်ပြီး တောင်ကြီးမြို့ နယ်မှ အများဆုံး ဖမ်းဆီးခံထားရကြောင်း သိရသည်။
