သျှမ်းပြည် အရှေ့ပိုင်း ရွှေတြိဂံစစ်ဌာနချုပ် မှ အာဏာသိမ်း စစ်ကောင်စီအတွက် လုပ်ဆောင် ပေးနိုင်မည့် ဌာနေပြည်သူ့စစ် တပ်သားများ စာရင်းကောက်ယူပြီး အင်အားတောင်းဆိုနေကြောင်း သတင်းရရှိသည်။
ယမန်နေ့ စက်တင်ဘာလ ၁၉ ရက်တွင် တာချီလိတ်မြို့နယ်အတွင်းရှိ ပြည်သူ့စစ်အင်အားများကို လိုက်လံ စုဆောင်းကောက်ခံမှုများ ပြုလုပ်ရာ တာချီလိတ် ပြည်သူ့စစ်တပ်ဖွဲ့ဝင်အင်အားသည် ရဲတပ်ဖွဲ့ ဝင်များထက် နှစ်ဆခန့် များပြားနေကြောင်း သိရသည်။
ထို့ကြောင့် တာချီလိတ်ခရိုင် စစ်ကောင်စီ လက်အောက်ခံ ရွှေတြိဂံဒေသ တိုင်းစစ် ဌာနချုပ်မှ တာချီလိတ်မြို့ နယ်ရှိ ပြည်သူ့စစ်အင်အား တဖွဲ့လျှင် ၁၀ဦး မှ ၂၀ဦး ကြား ပေးရန်အတွက် တောင်းခံကြောင်း သတင်းရရှိသည်။
“ တာချီလိတ်မှာ ပြည်သူ့စစ်အင်အားတွေက များတယ်။ မနေ့က စစ်တပ်က ပြောလာတယ်။ သူတို့ (စစ်ကောင်စီ)ဘက်က ခေါ်လာရင်ပြည်သူ့ဘက်က ဘယ်သူလိုက်နိုင်မလဲဆိုတာ စာရင်းတောင်းလာတယ်။ ဒါပေမယ့် ကျနော်တို့ အဖွဲ့က လောဆယ်တော့ စာရင်းအတိအကျမတင်ရသေးဘူး” ဟု တာချီလိတ်မြို့ခံ ပြည်သူ့ စစ်ခေါင်း ဆောင်တစ်ဦးက သျှမ်းသံတော်ဆင့်ကို ပြောသည်။
တာချီလိတ်မြို့နယ်အတွင်းတွင် ဒေသတွင်း အထူးလှုပ်ရှားသည့် ပြည်သူ့စစ်တပ်ဖွဲ့၊ မဲခေါင်မြစ်ကြော တစ် လျှောက် လှုပ်ရှားသည့် ပြည်သူ့စစ်တပ်ဖွဲ့နှင့် ရပ်ကွက်လုံခြုံရေးအတွက်နှင့် လက်နက်ကိုင်ချင်သောကြောင့် ပြည်သူ့စစ်သို့ အဖွဲ့ဝင်လာသည့် အရပ်သားများပြည်သူ့စစ်အဖွဲ့ စသဖြင့်အဖွဲ့များမှ အင်အားပေါင်း ၁၅၀၀ ခန့် ရှိနေကြောင်း သိရသည်။
“ စစ်တပ်က ဘယ်လိုမဆို လည်ပြီးသားပဲလေ။ အခု စစ်တပ်က ပြည်သူ့စစ်တွေကို ရိက္ခာထောက်ပံ့ နေတာတွေရှိတယ်။ စစ်တပ်က အကျိုးရှိမှ လုပ်မှာပဲလေ” ဟု တာချီလိတ်မှ နိုင်ငံရေး တက်ကြွလှုပ်ရှားသူ အမျိုးသား တစ်ဦးက သျှမ်းသံတော်ဆင့်ကိုပြောသည်။
တိုင်းရင်းသား ခေါင်းဆောင်များအနေဖြင့် စစ်ကောင်စီ ၏ လှည့်ကွက်ပေါ် မလိုက်စေချင်ကြောင်း၊ တိုင်းရင်းသားလူမျိုးများအပေါ် ပြန်ကြည့်စေချင်ကြောင်းလည်း ၎င်း ကဆိုသည်။
ယနေ့ စက်တင်ဘာလ(၁၉)ရက်နေ့တွင် တာချီလိတ်တပ်နယ်ခန်းမ၌ တာချီလိတ်မြို့ရှိ ပြည်သူ့စစ် (ဌာနေ) တပ်ဖွဲဝင်များအားလုံးကိုယ်စား လွယ်တော်ခမ်း ပြည်သူ့စစ်အဖွဲမှ ဦးလောတာအား တြိဂံဒေသ တိုင်းစစ် ဌာနချုပ် တိုင်းမှူး ဗိုလ်မှူးချုပ် မျိုးမင်းထွန်း စားနပ်ရိက္ခာများထောက်ပံ့ပေးကြောင်း သိရသည်။
တာချီလိတ်မြိုနယ်တစ်ခုလုံးအနေဖြင့် တာချီလိတ် – မိုင်းဆတ် နယ်နိမိတ်အစ တာချီလိတ်မြိုနယ်အတွင်းမှ တာလေမြိုအထိ ပြည်သူ့စစ်တပ်ဖွဲပေါင်း (၃၅)ဖွဲ့ ဝန်းကျင်ခန့်ရှိနေပြီး ၎င်းတို့ အနက် ကျေးရွာအုပ်စုများတွင် အင်အားပိုများကြောင်းလည်း သတင်းသိရသည်။
Leave a Comments