အောင်ပန်းမြို့ ဒေသခံများကို စစ်ကောင်စီမှ ဖမ်းဆီးပြီး လူသားဒိုင်းအဖြစ်အသုံးပြု

0

သျှမ်းပြည်တောင်ပိုင်းအောင်ပန်းမြို့တွင် စစ်ကောင်စီတို့သည် အရပ်သားများကို ဖမ်းဆီးခေါ်ဆောင်ပြီး လူသားဒိုင်းအဖြစ်အသုံးပြုမှုရှိနေကြောင်း ဒေသခံများ ပြောပြချက်အရသိရသည်။

အောင်ပန်းမြို့ နောင်ရဲကျေးရွာ တွင် အောင်ပန်း ပြည်သူ့ကာကွယ်ရေးတပ် ( ASDF) နှင့် စစ်ကောင်စီ တပ်ဖွဲ့ နှင့် ၎င်းတို့၏ လက်အောက်ခံ တပ်ဖွဲ့ဖြစ်သည့် အသွင်းပြောင်း ပအိုဝ်းပြည်သူ့စစ်(PNO)တို့ ယနေ့ (စက်တင်ဘာ ၁၈)ရက် မနက်ပိုင်းတွင် တိုက်ပွဲဖြစ်ပွားကာ အရပ်သား(၂)ဦးကို ဒိုင်းကာအဖြစ် အသုံးပြုရန် ဖမ်းဆီးခေါ်ဆောင်သွားပြီး၊ လယ်တောထဲတွင် နွားကျောင်းနေသည့် (၅)ဦးကိုလည်း ဖမ်းဆီးခေါ်ဆောင်သွားကြောင်း သတင်းရရှိသည်။

“ မနက်ကတော့ သေနတ်သံတွေ အကျယ်ကြီးပဲကြားရတယ်။ နောက်စေတီကုန်းဖက်မှာ လူ(၂)ဦးကို ဒိုင်းကာအဖြစ် စကစ က ခေါ်သွားတယ်။နောက် နောင်ရဲရွာ က နွားကျောင်းနေတဲ့ လူငယ် (၅)ဦးကိုလည်း ဖမ်းခေါ်သွားတယ်” ဟု အောင်ပန်းမြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ယနေ့ (စက်တင်ဘာလ ၁၈ ရက်နေ့) နံနက်ပိုင်း အချိန် နောင်ရဲရွာ အနောက်ဘက်ရှိ တောင်ကြားများတွင် စစ်ကောင်စီတပ်မှ လက်နက်ကြီးများဖြင့် အဆက်မပြတ်ပစ်ခတ်သံများကြားနေရပြီး နောင်ရဲရွာ နားစပ်အထိ လက်နက်ကြီးများ ကျရောက်ပေါက်ကွဲသဖြင့် ဒေသံများ တချို့ ထွက်ပြေးနေရကြောင်းလည်း သိရသည်။

“ကြားရသလောက်တော့ အောင်ပန်း PDF (အောင်ပန်းပြည်သူ့ကာကွယ်ရေးတပ်) တွေနဲ့ တိုက်ခိုက်တာတဲ့၊ PNO စစ်သားတွေကလည်း ဝင်ကူတာပေါ့၊ လက်နက်ကြီးတွေနဲ့သေနတ်သံတွေကတော့ တစ်နာရီကျော် ကြားရတယ်၊ နောင်ရဲရွာရဲ့ အစပ်နားကိုလည်း လက်နက်ကြီးက သုံးလုံးကျလို့ တချို့ရွာသားတွေက ထွက် ပြေးနေကြရတယ်” ဟုအောင်ပန်းဒေသခံ အမျိုးသား က ဆိုသည်။

ထို့အပြင် ကျေးရွာ အတွင်းလှည့်ပြီး ဈေးရောင်းနေသည့် အမျိုးသမီး တစ်ဦးလည်း စစ်ကောင်စီ ပစ်ခတ်ခဲ့သည့် ကျည်ထိမှန်ခဲ့ကြောင်း ကြားသိရသော်လည်း လက်ရှိမှာ အတည်မပြုနိုင်သေးပေ။

ယမန်နေ့ (စက်တင်ဘာ ၁၇) ရက် ညပိုင်းတွင်လည်း သရဲကျေးရွာနဲ့ နောင်ရဲရွာ နှစ်ရွာကြားမှ ‘ရတောင်’ ‘တောင်နီ’ နဲ့ ဟောင်းတပ်ခြေရေထွက် ဂနိုင်အထိလမ်းပြပေးနိုင်ရန် ဟုဆိုကာ ရွာသားနှစ်ဦးအား စစ်ကောင် စီတပ်ဖွဲ့ဝင်များမှ အတင်း အဓမ္မ ဖမ်းခေါ်သွားကြောင်းလည်း သတင်းသိရသည်။
လက်ရှိတွင် အောင်ပန်းမြို့ပေါ်နှင့် အနီးတစ်ဝိုက်ရှိ ကျေးရွာများအထိ စစ်ကောင်စီအင်အား ၂၀၀ ထက်မနည်း လုံခြုံရေး ချထားသည့် အပြင် ၎င်းတို့၏ ကင်းလှည့်ကားများလည်း ၅ စီးခန့် ရှိနေကြောင်း ဒေသခံများ၏ ပြောကြားချက်အရ သိရသည်။

Leave a Comments