သျှမ်းပြည်အရှေ့ပိုင်း ကျိုင်းတုံမြို့နယ် နှင့် မိုင်းလားမြို့နယ်အစပ်ရှိ တာပင်းစစ်ဆေးရေးဂိတ်ကို စစ်ကောင်စီဘက်မှ ပြန်လည်ဖွင့်ပေးခဲ့ကြောင်း စုံစမ်းသိရှိရသည်။
ထိုစစ်ဆေးရေးဂိတ်ကို စစ်ကောင်စီဖက်မှ (၄) နှစ်ကြာပိတ်ထားခဲ့ပြီး အာဏာသိမ်းပြီး (၇) လအကြာ ယမန့်နေ စက်တင်ဘာ (၁၆) ရက်တွင် ပြန်လည်ဖွင့်ပေးခဲ့ကြောင်း ကျိုင်းတုံမြို့ ဒေသခံ ပြည်သူတဦးက ပြောသည်။
“ ဟုတ်ပါတယ်။ မနေ့က ပြန်ဖွင့်ပေးခဲ့တာ။ ဖွင့်ပေးတယ်ဆိုပေမဲ့ သွားလာလို့ရမလားတော့မသိသေးဘူး။ အခုက ကိုဗစ် ကာလဆိုတော့ မိုင်းလားဘက် က ပေးဝင်မလာတော့မသိဘူး။ ကုန်တင်ကားတွေဆိုရင်တော့ အဲမှာ ကုန်ပစ္စည်းကိုလှဲ ပြီးတော့ပဲ မိုင်းလားဘက် ပေးသွားတယ်” ဟု ကျိုင်းတုံမြို့ ဒေသခံ တဦးက ပြောသည်။
တာပင်းဂိတ်ပိတ်ထားစဉ် ကျိုင်းတုံမှ မိုင်းလားကို သွားချင်ပါက မိုင်းခတ်၊ မိုင်းယန်း ဘက်မှ ပတ်ပြီး သွားရပြီး ကားစရိတ်၊ ခရီးစရိတ် အချိန်ကုန်ကြောင်း၊ တာပင်းဂိတ်ကို ပိတ်ထားခြင်းသည် ကျိုင်းတုံမြို့ ဒေသခံပြည်သူများ၏ ရှာဖွေစားသောက်ရာတွင် ခက်ခဲမှုများစွာရှိခဲ့ကြောင်း ကျိုင်းတုံမြို့ ကုန်သွယ်ရေးသမားတဦးက ပြောသည်။
“သူတို့အခု ကျိုင်းတုံ – မိုင်းလား တာပင်းဂိတ်ကို ပြန်ဖွင့်ပေးလိုက်တာ အရင်ကထက် ကုန်ကျစရိတ်တွေသက်သာလာမယ်။ ကုန်သွယ်သွားလာမှုလည်း အရင်ထက်ပိုကောင်းလာနိုင်တာပေါ့။ ကုန်သွယ်ပစ္စည်းပို့ခလည်း အများကြီးမကုန်တော့ဘူး။” ဟု ကျိုင်းတုံ -မိုင်းလား ကုန်သွယ်ရေးပြုလုပ်နေသည့် အမျိုးသားတဦးက ပြောသည်။
ထို တာပင်းစစ်ဆေးရေးဂိတ်ကို စစ်ကောင်စီမှ အကြောင်းမဲ့ ပိတ်ပင်ခဲ့ပြီး လက်ရှိ စစ်အာဏာသိမ်းပြီး (၇) လကြာမှ ပြန်လည်ဖွင့်ပေးခဲ့ခြင်းသည် စဉ်းစားစရာဖြစ်ကြောင်း ကျိုင်းတုံမြို့ ဒေသခံတစ်ဦးက ပြောသည်။
“ သူတို့ပြန်ဖွင့်ပေးတာတော့ ကောင်းပါတယ်။ ကြည့်မယ်ဆိုရင် စစ်ကောင်စီဘက်ကနေ မျက်နှာသာ၊ အမှတ်လိုချင်လို့ ပြန်ဖွင့်ပေးတာလည်းဖြစ်နိုင်တယ်။ သူတို့ ၂၀၁၇ ကတည်းက ပိတ်ထားတာ။ ဘာပြသာနာမှ မရှိဘူး။ NLD အစိုးရလက်ထက်လည်း ဘာပြသာနာမှမရှိဘူး။ အရင်ကတည်းက သူတို့မဖွင့်ပေးချင်တာ။ သူတို့အခုပြန်ဖွင့်ပေးတာ မျက်နှာသာလိုချင်လို့ ပြန်ဖွင့်ပေးတာပဲ”ဟု ကျိုင်းတုံမြို့တွင်း လှုပ်ရှားနေသည့် အမျိုးသားတဦးက ပြောသည်။
၂၀၁၇ ခုနှစ် စက်တင်ဘာ ၂၈ ရက်နေ့ ဝ တပ်ဖွဲ့ UWSA မှ စစ်အင်းအာအပြည့်ဖြင့် မိုင်းလား ကျိုင်းတုံ နယ်စပ်ဖက်တွင် လုံခြုံရေးအရ တပ်စခန်းများကို ချခဲ့ပြီး ထိုနောက် အောက်တိုဘာ ၂၅ ရက်နေ့တွင် စစ်ကောင်စီတပ်ဖွဲ့မှ တာပင်း စစ်ဆေးရေးဂိတ်ကို ပိတ်ချခဲ့ကြောင်း သိရသည်။
