သျှမ်းမြောက် ကျောက်မဲမြို့နယ် ဟူးကွက်ကျေးရွာတွင် ယမန်နေ့ (စက်တင်ဘာလ (၁၆)ရက်) မွန်းလွဲ(၃)နာရီခွဲဝန်းကျင်က မိုင်းထိလူနာကို ဆေးရုံပို့ပြီး ဟူကျေးရွာသို့ ပြန်လာသည့် လူမှုရေးအသင်းကား ပစ်ခတ်ခံရကြောင်း သတင်းရရှိသည်။
မိုင်းထိဒဏ်ရာရရှိခဲ့သည့် ဟူးကွက်ဒေသခံ(၂)ဦးအား ဂရုဏာလူမှုကူညီရေးအသင်းကားဖြင့် ကျောက်မဲဆေးရုံသို့ ပို့ဆောင်ပေးခဲ့ပြီးနောက် စက်တင်ဘာ (၁၆)ရက်နေ့ မွန်းလွဲပိုင်းက ဟူးကွက်ကျေးရွာသို့ ပြန်လာစဉ် ရွာအဝင်တွင် ပစ်ခတ်ခံရတာဖြစ်ကြောင်း စုံစမ်းသိရသည်။
“သူတို့က ကျောက်မဲကို လူနာလာပို့ပြီး ဟူးကွက်ကို ပြန်တာ၊ ရွာထဲမရောက်ခင်မှာ ပစ်ခံထိတာ၊ ရွာဥက္ကဌရဲ့ ပေါင်မှာ ထိသွားတယ်၊ ဒဏ်ရာက တော်တော်ပြင်းတယ်၊ ကျန်တဲ့တစ်ယောက်တော့ မထိဘူး” ဟု ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ လူမှုရေးအသင်းကားသည် ကျောက်မဲမှ ဟူးကွက်ရွာသို့ အပြန် ရွာအဝင် သင်္ချိုင်းကုန်းအနီးတွင် ပစ်ခတ်ခံရတာဖြစ်ပြီး ရွာဥက္ကဌ ညာဖက်ပေါင်တွင် ထိမှန်ခဲ့ကြောင်း၊ ပစ်ခတ်သူကို အတည်မပြုနိုင်ကြောင်း အဆိုပါဒေသခံက ဆိုသည်။
ထိုနေရာသည် တိုင်းရင်းသားလက်နက်ကိုင်များဖြစ်သည့် RCSS/SSA နှင့် SSPP/SSA ၊ TNLA တို့ တိုက်ပွဲဖြစ်ပွားခဲ့သည့် နေရာဖြစ်ပြီး ခုရက်ပိုင်းတွင် တိုက်ပွဲဖြစ်ပွားမှု မရှိကြောင်း ဒေသခံများထံမှ သိရသည်။
ပြီးခဲ့သည့် စက်တင်ဘာလ (၁၅)ရက်နေ့ နံနက်ပိုင်းက ဟူးကွက်ကျေးရွာ ဒေသခံ (၂)ဦး ရွာအနီး မိုင်းနင်းမိပြီး ဒဏ်ရာရရှိခဲ့တာဖြစ်ကြောင်း၊ အဆိုပါ လူနာအား ဟူးကွက်ကျေးရွာမှ ဂရုဏာ လူမှုကူညီရေးအသင်းကားဖြင့် ကျောက်မဲဆေးရုံသို့ ပို့ဆောင်ခဲ့တာဖြစ်ကြောင်း သိရှိရသည်။
Leave a Comments