သျှမ်းပြည် မြို့တော် တောင်ကြီးမြို့ရှိ မိုးကုတ်ဝိပဿနာ စာသင်တိုက်တွင် ကွာရန်တင်းဝင်နေသည့် စစ်ကောင်စီ လက်အောက်ခံ တပ်သားတို့သည် ကျန်းမာရေး ဝန်ထမ်းများနှင့် စေတနာ့ဝန်ထမ်းများကို ဆဲဆိုပြောကြောင်း ြ သတင်းသိရသည်။
မိုးကုတ်ဝိပဿနာ ကျောင်းတိုက်မှ ကိုဗစ် – ၁၉ ကွာရန်တင်း ဝင်နေသည့် စစ်ကောင်စီလက်အောက်ခံ ရဲတပ်ဖွဲ့ဝင်များက စင်တာတွင် တာဝန်ကျသည့် စေတနာ့ဝန်ထမ်းများနှင့် ကျန်းမာရေး ဝန်ထမ်း များကို ရမ်းသမ်းစော်ကားပြောဆိုမှုများရှိနေသည့် အပြင် ပစ္စည်းများကိုလည်း ရိုက်ခွဲဖျက်ဆီးမှုများလည်း ပြုလုပ်ကြောင်း အမည်မဖော်လိုသည့် စေတနာ့ဝန်ထမ်းတစ်ဦးက သျှမ်းသံတော်ဆင့်ကို ပြောသည်။
“အရက်သောက်ပြီးတော့ ရမ်းကားကြတာပါ၊ သူတို့တွေက စည်းကမ်းလိုက်နာမှုလည်း မရှိဘူး၊ ရဲတွေ ဖြစ်ပြီးတော့ တခြား Q ဝင်နေသူတွေကိုလည်း ထိခိုက်ဒဏ်ရာရအောင်လုပ်တယ်၊ အနိုင်ကျင့်တာပေါ့၊ ပစ္စည်းတွေကိုလည်း ရိုက်ခွဲသေးတယ်” ဟု အထက်ပါ ပုဂ္ဂိုလ်က ပြောသည်။
ယင်းကဲ့သို့ သောက်စားပြီး မူးသည့်အချိန်တွင် ရမ်းကားကြသည့် စစ်ကောင်စီလက်အောက်ခံ ရဲတပ်သား များကို အရေးယူပြီးရန် အထက်သို့ တင်ပြသော်လည်း အရေးယူဆောင်ရွက်ခြင်းများမရှိသည့်အတွက် လက်ရှိတွင် ကျန်းမာရေးဝန်ထမ်းများနှင့် စေတနာ့ဝန်ထမ်းများအတွက် အနှောင့်အယှက်ဖြစ်နေကြောင်း လည်း တောင်ကြီးမြို့တွင် ပရဟိတလုပ်ဆောင်နေသည့် အသက် ၂၀ ကျော် အရွယ် လူငယ်တစ်ဦးက သျှမ်းသံတော်ဆင့်ကို ပြောသည်။
“အထက်ကို တင်ပြပါတယ်၊ သူတို့က ရဲတွေဖြစ်နေတယ်ဆိုတော့လူကြီးတွေကလည်း သိပ်မပြောရဲကြဘူး ထင်တယ်၊ သက်ဆိုင်ရာဌာနတွေကိုတင်ပြတော့လည်း သူတို့လူ အချင်းချင်းဆိုတော့ အရေးမယူကြဘူး။ အခုဆို သူတို့နဲ့ Q ဝင်နေတဲ့ သူတွေကလည်း ကြောက်နေတယ်၊ ကျနော်တို့ စေတနာ့ဝန်ထမ်းတွေအနေနဲ့ လည်း အနှောင့်အယှက် ဖြစ်စေတယ်” ဟု ၎င်းက ပြောသည်။
လက်ရှိတွင် တောင်ကြီးမြို့ မိုးကုတ်ဝိပဿနာ စာသင်တိုက်တွင် ကွာရန်တင်းဝင်နေသည့် သူများအနက် စစ်ကောင်စီ လက်အောက်ခံ ရဲတပ်သား ၂၀ ကျော် ရှိနေကြောင်း သတင်းသိရသည်။
