သျှမ်းပြည် အရှေ့ပိုင်း မိုင်းဆတ်ခရိုင် မိုင်းတုံမြို့နယ်ရှိ Mytel တာဝါတိုင်များကို ကာကွယ်ရန်အတွက် ဒေသတွင်းရှိ စစ်ကောင်စီတပ်ဖွဲ့ဖြစ်သည့် စစ်တပ်နှင့် ရဲစခန်းတို့က အင်အားတိုးချဲ့နေကြောင်း သတင်း သိရသည်။
ယခုလ စက်တင်ဘာလ လဆန်းပိုင်းမှ စတင်ပြီး မိုင်းတုံမြို့နယ်အတွင်းအရှိ မိုင်းတုံမြို့မ ရဲစခန်းမှ ရဲတပ်ဖွဲ့ ဝင်များကို သေနတ်ထုတ်ပေးကြောင်း နှင့် လုံခြုံရေး အတွက် ကင်းလှည့်နေသည့် အင်အားများလည်း ထပ်မံ တိုးချဲ့ထားကြောင်း မိုင်းတုံမြို့ ဒေသခံ တစ်ဦးက သျှမ်းသံတော်ဆင့်ကို ပြောသည်။
“အရင်ကလည်း ရံဖန်ရံခါ ကင်းလှည့်တာမျိုးလည်း ရှိပါတယ်၊ တစ်ခေါက်ပဲလှည့်တာပေါ့နော်၊ အခုတော့ အင်အားလည်းတိုးထားတယ်၊ ပြီးတော့ တစ်မြို့လုံးကို ပတ်တာ၊ ရဲတပ်ဖွဲ့ဝင်တွေကိုလည်း သေနတ်နဲ့ ကျည် တောင့်တွေ ပေးထားတာတွေရှိတယ်လို့လည်း ကြားရတယ်” ဟု လုံခြုံရေးအရ နာမည်မဖော်လိုသည့် မိုင်းတုံ မြို့ဒေသခံ တစ်ဦးက သျှမ်းသံတော်ဆင့်ကို ပြောသည်။
ယင်းကဲ့သို့ ရဲတပ်ဖွဲ့များကို သေနတ်များကျည်တောင့်များ ထုတ်ပေးခြင်းသည် PDF များလာရောက်တိုက်ခိုက် ပါ က အဆင်သင့်ဖြစ်ရန်အတွက်ဟုဆိုကာ ရဲတပ်ဖွဲ့ဝင်များကို သေနတ်များထုတ်ပေးထားသည်ဟု ရဲစခန်း နှင့် နီးစပ်သူ တစ်ဦးက သျှမ်းသံတော်ဆင့်ကို ပြောသည်။
“PDF တွေကို လာရင်လည်း တိုက်ခိုက်ဖို့အတွက် အဆင်သင့်ဖြစ်အောင်ဆိုပြီး သေနတ်ကိုထုတ်ပေးတယ်လို့ လည်း ကြားမိပါတယ်၊ ဒါပေမဲ့ ကျနော်တို့ဖက်မှာက စစ်တပ်တွေ ဒီလောက်ပေါများပြီး တိုင်းရင်းသားလက် နက်ကိုင်တွေကလည်း ဒီလောက်များနေတာ PDF တွေနဲ့ တိုက်ပွဲဖြစ်ပေါ်လာဖို့ဆိုတာ လွယ်တော့ မလွယ်ဘူး၊ သူတို့ ဖုန်းတိုင်ကို ကာကွယ်ချင်လို့ပဲ ဖြစ်မယ်” ဟု အထက်ပါ ပုဂ္ဂိုလ်က ပြောသည်။
စစ်တပ်မှ နိုင်ငံတော် အာဏာသိမ်းပြီးနောက်ပိုင်းတွင် နိုင်ငံနှင့် တဝှမ်းလုံး၌ စစ်တပ်တို့၏ ဆူပူအကြမ်း ဖက်များရှိနေသည့် အပြင် သျှမ်းပြည် အရှေ့ပိုင်းဖြစ်သည့် တာချီလိတ်နှင့် မိုင်းတုံကဲ့သို့ မြို့ကြီးများမှာလည်း ပြည်သူ့လုံခြုံရေးထက် ရဲစခန်း နှင့် စစ်တပ်လုံခြုံရေးကို အဓိကထား၍ လုပ်ဆောင်နေကြပြီး ညပိုင်းများတွင် လမ်းများပိတ်ခြင်း၊ လမ်းကြားများတွင် စစ်ဆေးခြင်းများ လုပ်ဆောင်နေလျက်ရှိသည်။
Leave a Comments