သျှမ်းမြောက် မိုင်းရယ်မြို့တွင် ကိုဗစ်ကာကွယ်ဆေး (၂)ကြိမ်ထိုးထားသည့် ကျန်းမာရေးဝန်ထမ်း(၁)ဦး ကိုဗစ်ပိုး စစ်ဆေးတွေ့ရှိခဲ့ကြောင်း သိရသည်။
ပြီးခဲ့သည့် စက်တင်ဘာလ (၈)ရက်နေ့က မိုင်းရယ်မြို့ ကိုဗစ်ကူးစက်ခံရသူ (၃)ဦး တွေ့ရှိခဲ့တာဖြစ်ပြီး ကိုဗစ်ကာကွယ်ဆေး(၂)ကြိမ်ထိုးထားသည့် ကျန်းမာရေးဝန်ထမ်း(၁)ဦး ပါဝင်နေတာဖြစ်ကြောင်း သိရသည်။
“ကျန်းမာရေးဝန်ထမ်းထဲမှာ မနေ့က တစ်ယောက် ထပ်ပြီးကူးစက်တယ်၊ အားလုံး (၃)ယောက်ရှိသွားပြီ၊ ပြီးခဲ့တဲ့ (၂)လပိုင်းကတည်းက ကိုဗစ်ကာကွယ်ဆေး နှစ်ကြိမ် ထိုးပြီးသားဝန်ထမ်းတွေပါ” ဟု မိုင်းရယ် ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
မိုင်းရယ် ကျန်းမာရေးဦးစီးဌာနမှ ဝန်ထမ်းများသည် ပြီးခဲ့သည့် ဇန်နဝါရီလနှင့် ဖေဖော်ဝါရီလ ကတည်းက (Covishield) ကိုဗစ်ကာကွယ်ဆေး(၂)ကြိမ်ထိုးပြီးသူများဖြစ်ကြောင်း၊ သို့သော် ကိုဗစ်အတည်ပြုလူနာနှင့် အမြဲတမ်း ထိတွေ့ကုသနေသူများဖြစ်သည့်အတွက် ကိုဗစ်ကူးစက်ခံရတာဖြစ်ကြောင်း သိရသည်။
“ကိုဗစ်ကာကွယ်ဆေးထိုးတာကလည်း (၂)လပိုင်းကတည်းကပဲ ပြီးတော့ ကိုဗစ်လူနာနဲ့ အမြဲတမ်း ထိတွေ့ကုသနေရတာဆိုတော့ ကိုဗစ်ကူးစက်သွားတာပါ၊ ကျန်းမာရေးဆိုးရွာတာတော့ မရှိဘူး” ဟု ဒေသခံ အမျိုးသား တစ်ဦးက ဆိုသည်။
မိုင်းရယ်တွင် နေအိမ်တွင်းကြိတ်ကုနေမှုများရှိနေသည့်အတွက် ကျန်းမာရေးမကောင်းပါက ဆေးရုံဆေးခန်းသို့ အမြန်ဆုံးလာပြသင့်ကြောင်း အဆိုပါဒေသခံမှ တိုက်တွန်းထားသည်။
မိုင်းရယ်မြို့နယ်တွင် စက်တင်ဘာ (၈)ရက် ယမန်နေ့အထိ ကိုဗစ်ကူးစက်ခံရသူ (၁၈၈)ဦးရှိပြီး သေဆုံးသူ (၃)ဦးနှင့် ဆေးရုံဆင်းခွင့်ရသူ (၁၅၀)ကျော်ရှိကြောင်း သိရသည်။
Leave a Comments