သျှမ်းပြည်မြောက်ပိုင်း လာရှိုးမြို့ ရှိ အမျိုးသားညီညွတ်ရေး အစိုးရ( NUG ) ၏ ယာယီသမ္မတ ဒူဝါလရှီးလ၏ နေအိမ်တွင် စစ်ကောင်စီတပ်ဖွဲ့ လာရောက်ရှာဖွေမှု ပြုလုပ်ခဲ့ကြောင်း စုံစမ်းသိရှိရသည်။
လွန်ခဲ့သည့် စက်တင်ဘာ (၇) ရက်နေ့က ည (၁၁) နာရီဝန်းကျင်အချိန်တွင် စစ်ကောင်စီ တပ်ဖွဲ့များ ကား(၅) စီးဖြင့် ဒူဝါလရှီးလ နေအိမ်ကို လာရောက်စစ်ဆေးခဲ့ကြောင်း လာရှိုးမြို့ ဒေသခံတဦးက ပြောသည်။
ထိုသို့ သွားရောက်စစ်ဆေးရာတွင် နေအိမ်တွင် တံခါးဖွင့်ပေးခြင်းမရှိသောကြောင့် ခြံခုန်ကျော်ပြီး အထဲသို့ ဝင်ရောက်သွားကြောင်းသိရသည်။
“ ည အချိန်မှာလာစစ်ကြတာ။ အိမ်းဝင်းတံခါးကို မဖွင့်ပေးလို့ ဘေးခြံနဲ့ နောက်ခြံကနေ ကျော်ဝင်သွားတယ်။ မေးမြန်နေတာတော့တွေ့ရတယ်။ ခေါ်သွားမသွားတော့ ကျနော်တို့ မသိရတော့ဘူး” ဟု မျက်မြင်တွေ့ရှိသူက ပြောသည်။
ထိုသို့ လာရောက်စစ်ဆေးရာတွင် အိမ်စီးကား (၅) စီးနှင့် အတူ စစ်သားများ၊ ရဲများ၊ အုပ်ချုပ်ရေးမှူးများ အတူလာရောက်စစ်ဆေးခဲ့ကြောင်းသိရသည်။
“ ရဲတွေ၊ စစ်သားတွေကောပါတယ်။ သေနတ်တွေနဲ့ လည်းပါတယ်။ အိမ်ကတံခါးတွေ မဖွင့်ပေးလို့ ဘေးက ကျော်ဝင်သွားသေးတယ်။ အဲမှာ လူ၂ ယောက်ထွက်လာတာ။ သူတို့မြို့တော်ခန်းမကို ခေါ်သွားမယ်ထင်တယ်။ သေချာတော့မသိရဘူးလေ။ ညအချိန်ဆိုတော့ မတွေ့ရဘူးလေ” ဟု မျက်မြင်တွေ့သူက ပြောသည်။
လာရှိုးမြို့ရှိ ဒူဝါလရှီးလ၏အိမ်ကို လက်ရှိအချိန်မှာ အိမ်စောင့်အနေဖြင့် အမျိုးများက လာရောက်နေထိုင်လျက်ရှိကြောင်း သိရသည်။
လက်ရှိတွင် ထိုနေအိမ်တွင် လူနေထိုင်မှုရှိကြောင်း၊ မရှိကြောင်းကို မသိရှိရကြောင်း အိမ်နီးချင်နေထိုင်သူက ပြောသည်။
ထိုအပြင် ဒူဝါလရှီးလ၏ အိမ်ပတ်ဝန်းကျင်တွင် အရပ်ဝတ်နှင့်သူများ ပတ်ပတ်လည်စောင့်ကြည့်နေမှုရှိကြောင်း သိရသည်။
“ ဒီဖက်မှာ မျက်နှာစိမ်းနဲ့သူတွေသွားလာနေတာတွေ့နေရတယ်။ အရင်က ဒီရပ်ကွက်မှာမတွေ့ဖူးဘူး။ သွားလာနေကြတာ” ဟု အိမ်နီးချင်နေထိုင်သူက ပြောသည်။
စစ်အာဏာမသိမ်းခင်တွင် ဦးဒူလဝါရှီးသည် လာရှိုးမြို့တွင် ပုံမှန်နေထိုင်လျက်ရှိကြောင်း ဒူဝါလရှီးလ နှင့်တွေ့ဆုံခဲ့ဖူးသူ ကပြောသည်။
“ သူတို့အိမ်မှာက တံခါးပိတ်ပြီးနေကြတာ။ အထဲမှာလူရှိလား၊ မရှိဘူးလား မသိဘူး။ အရင်ကတော့ ဦးဒူလဝါရှီးက တွေ့ကြပါတယ်။ အာဏာသိမ်းလိုက်တာ့ မတွေ့ဖြစ်တော့ဘူးလေ။ အရင်ကတော့ ကျနော်တို့ လာရှိုးမှာတွေ့ဖြစ်ကြပါတယ်” ဟု အထက်ပါလူကပြောသည်။
စက်တင်ဘာ (၇) ရက်နေ့တွင် အမျိုးသားညီညွတ်ရေးအစိုးရ NUG မှ စစ်ကောင်စီတပ်ဖွဲ့ကို အပြီးတိုင်ချေမှုန့်ရန်အတွက် မိန့်ခွန်ပြောကြားပြီးနောက် စစ်ကောင်စီတပ်ဖွဲ့များက ဒူဝါလရှီးလ၏ နေအိမ်ကို သွားရောက်စစ်ဆေးခဲ့ကြောင်းသိရသည်။
Leave a Comments