သျှမ်းတောင် ပင်လောင်းမြို့နယ်တွင် ကိုဗစ်ကူးစက်မှု လျော့ကျသော်လည်း ကျေးရွာများတွင် ကိုဗစ် ကူးစက်မှု ပိုများလာကြောင်း သိရသည်။

ပင်လောင်းမြို့နယ်တွင် စက်တင်ဘာ (၈)ရက် ယနေ့ တွင် (၁၇၅)ဦး စစ်ဆေးရာ ကိုဗစ်ပိုးကူးစက်ခံရသူ (၄၄)ဦး တွေ့ရှိခဲ့ကြောင်း၊ မြို့ပေါ်ထက် ကျေးရွာများတွင် ကူးစက်မှု ပိုများနေကြောင်း သိရသည်။

“မြို့ပေါ်မှာ ကိုဗစ်ကူးစက်မှုက လျော့တယ်၊ ဒါပေမယ့် ကျေးရွာတွေမှာတော့ ပြန်များလာတယ်၊ ပေါင်းလောင်းမြို့ တောင်ကျရွာမှာဆို ပိုးတွေ့တာများတယ်၊ တခြားရွာတွေမှာလည်း များနေတယ်” ဟု ပင်လောင်းမြို့နယ် ကိုဗစ်ကုသရေးစင်တာမှ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။

ယနေ့တွင် RTD ဖြင့် (၄၆)ဦး စစ်ဆေးရာ (၁၄)ဦးတွေ့ရှိခဲ့ပြီး PCR ဖြင့် (၁၂၉) ဦးစစ်ဆေးရာ (၃၀)ဦး တွေ့ရှိခဲ့ကြောင်းသိရသည်။

ထို့အပြင် ယခင်က PCR စက်ဖြင့် စစ်ဆေးမှုတွင် ထက်ဝက်နီးပါး ကိုဗစ်ပိုး တွေ့ရှိခဲ့သော်လည်း ယခုတွင် သိသိသာသာလျော့နည်းသွားကြောင်း၊ ပင်လောင်းမြို့နယ်အတွင်းပါဝင်သည့် နောင်တရားမြို့တွင်လည်း ကိုဗစ်ကူးစက်မှု လျော့နည်းသွားကြောင်း ဒေသခံထံမှ သိရသည်။

“အရင်က PCR နဲ့ (၂၀၀)လောက်စစ်ရင် ပိုးတွေ့တာ (၁၀၀)လောက်ထိရှိခဲ့တယ်၊ နောင်တရားမြို့ ရပ်ကွက်(၁)မှာဆိုရင်လည်း အရင်က ကိုဗစ်ကူးစက်မှု တော်တော်များတယ်၊ ခုတော့ လျော့ကျသွားပြီ” ဟု အဆိုပါ တာဝန်ရှိသူက ဆက်ပြောသည်။

ပင်လောင်းမြို့နယ်တွင် ပင်လောင်းပြည်သူ့ဆေးရုံ၊ နောင်တရားတိုက်နယ်ဆေးရုံ၊ တီကျစ်တိုက်နယ် ဆေးရုံ၊ ဆောင်းပြောင်းတိုက်နယ်ဆေးရုံနှင့် ပေါင်းလောင်းတိုက်နယ်ဆေးရုံတို့တွင် ကိုဗစ်ကုသရေး စင်တာဖွင့်လှစ်ထားပြီး ကုသပေးနေကြောင်း သိရသည်။

ပင်လောင်းမြို့နယ်တွင် စက်တင်ဘာလ (၈)ရက် (ယနေ့)အထိ ကိုဗစ် − ၁၉ ရောဂါကူးစက်ခံရသူ (၁၁၃၆)ဦးထိ ရှိပြီး ဆေးရုံဆင်းခွင့်ရသူ (၉၈၄)ဦးနှင့် သေဆုံးသူ (၁၄)ဦး ရှိနေကြောင်း သိရသည်။