နွေဦးတော်လှန်ရေး ကာလအတွင်း စစ်ကောင်စီက မတရားဖမ်းဆီးထားသည့် တောင်လေးလုံးထောင်ရောက်နေသည့် အမျိုးသမီးသည် ရုံးချိန်း (၁၀) ကြိမ်ခန့်တက်ပြီးသော်လည်း အမိန့်ချမှတ်မှု မရှိသေးကြောင်း စုံစမ်းသိရှိရသည်။
အဆိုပါ ဖမ်းဆီးခံရသည့် အမျိုးသမီးသည် ဆန္̔ဒပြမှုမှာ ပါဝင်ခြင်း မရှိခြင်း၊ နိုင်ငံရေး လှုပ်ရှားသူ မဟုတ်ဘဲ မတ်လက လာရောက်ဖမ်းဆီးသွားပြီး ယနေ့ချိန်ထိ ရုံးချိန်း (၁၀) ကြိမ် နှင့် မိသားစု တွေ့ဆုံခွင့် (၂) ကြိမ်သာ ရှိသေးကြောင်း မိသားစု တစ်ဦး က သျှမ်းသံတော်ဆင့်ကို ပြောသည်။
“သူက ၅၀၅ နဲ့ အဖမ်းခံရတယ်။ ၅ လကျော်ပြီ။ ဒီလ ၂၇ ရက်နေ့ဆိုရင် ၆ လပြည့်ပြီ။ နေကောင်းတယ်လို့တော့ သိရတယ်။ ကိုယ်မှ မမြင်ရတာ။ ၂ ကြိမ်လောက်ပဲ တွေ့ဆုံခွင့်ရခဲ့တယ်။သွားရောက် တွေ့ဆုံခွင့်မရဘူး” ဟု မိသားစုဝင်တစ်ဦးကပြောသည်။
လက်ရှိမှာ ကိုဗစ်-၁၉ ကူးစက်မှုနှုန်းမြင့်တက်နေသည့် အကြောင်းပြချက်ဖြင့် အမှုကို ဆက်လက်စစ်ဆေးခြင်း မပြုတော့ကြောင်း၊ မိသားစုဝင်များနှင့်လည်း တွေ့ခွင့်မရကြောင်း သိရသည်။
“အမှုက ဆက်မစစ်တော့ဘူး။ ဒီတိုင်းပဲ ထားထားတယ်။ ကိုဗစ် ကို အကြောင်းပြပြီး မစစ်တော့တာထင်တယ်။ အမိန့်တော့ မချသေးဘူး” ဟု တောင်လေးလုံးမှာ ဖမ်းဆီးခံရသည့် မိသားစုဝင် တစ်ဦး က ဆိုသည်။
မြန်မာနိုင်ငံသည် ကိုဗစ်-၁၉ တတိယလှိုင်းဖြစ်ပေါ်ပြီးနောက် မတရားဖမ်းဆီးသည့် အပြစ်မဲ့ ပြည်သူများကို စစ်ကောင်စီက ထောင်ဝင်စာ ပိတ်ပင်ခြင်း ရုံးချိန်းများကို ရပ်နားထားခြင်းများ ပြုလုပ်ခဲ့သည်။
ကိုဗစ်-၁၉ တတိယလှိုင်း ထိန်းချုပ်နိုင်ရန်အတွက် စစ်ကောင်စီက အစိုးရရုံးများကို ဇူလိုင်လ မှစတင်ပြီး စက်တင်ဘာ (၁၀) ရက်နေ့ထိ အစိုးရ ရုံးပိတ်ရက်အဖြစ် စစ်ကောင်စီ က ထုတ်ပြန်ထားသည်။
“အစိုးရရုံးတွေ (စစ်ကောင်စီ) တရားဝင် ပြန်ဖွင့်တဲ့ရက်မှ ရုံးချိန်းတွေ ပုံမှန်ပြန်ပေါ်သွားမယ်။ ရုံးတွေ ပုံမှန်ပြန်ဖွင့်ရင်တော့ ကျမတို့ အမှုတွေ စစ်လို့ရမယ်။ အမှုတွေ မစစ်ရရင် သူတို့အတွက် ပိုကြာသွားမှာပေါ့။ အမှုရဲ့ တိုးတက်မှုတွေ ရပ်နေတာပေါ့။ ကိုဗစ်ကြောင့် ရပ်တာပေါ့နော်”ဟု သျှမ်းပြည်တွင်း အမှုလိုက် ရှေ့နေတစ်ဦး က သျှမ်းသံတော်ဆင့် ကိုပြောသည်။
သျှမ်းပြည်တစ်ဝှမ်းသည် စစ်အာဏာရှင်မှ မတရားဖမ်းဆီးထားသည့် ပြည်သူများ စုစုပေါင်း (၅၀၀) နီးပါး ခန့်ရှိကြောင်း စုံစမ်းသိရှိရသည်။
ထိုအထဲတွင် ညောင်ရွှေမြို့နယ် အကျဉ်းထောင်မှာ အချုပ်သား (၃) ဦး ကိုဗစ်ကြောင့် ကွယ်လွန်ခဲ့ပြီး လက်ရှိ အကျဉ်းထောင် အတွင်းရှိ အချုပ်သား အချို့တို့လည်း ကိုဗစ်-၁၉ ကူးစက်ခံနေရကြောင်း သိရသည်။
Leave a Comments