သျှမ်းရှေ့ တာချီလိတ်မြို့နယ် ဟောင်လိတ်ကျေးရွာအုပ်စု ဝမ်ဟောင်ရွာအတွင်း ယနေ့ (စက်တင်ဘာ ၆)ရက် မနက်ပိုင်းတွင် မတရားသိမ်းယူခံရသည့် နေရာတွင် UWSA ပိုင် ဟုန်ပန်းကုမ္ပဏီက မြေညှိခြင်း ထပ်မံပြုလုပ်ကြောင်း သတင်းရရှိသည်။

ထိုဒေသတွင် UWSA ပိုင် ဟုန်ပန်းကုမ္ပဏီက မြေတူးစက် (၂)စီး၊ လူအင်အား (၆၀)ဝန်းကျင်ဖြင့် လာရောက်ကာ မြေညှိနေတာဖြစ်ကြောင်း ဒေသခံများထံမှ သိရသည်။
“ဒီနေ့ မနက် (၉)နာရီလောက်မှာ စပြီးတော့ မြေညှိတာ၊ လူအင်အားကလည်း (၆၀)ကျော်လောက်ရှိမယ်၊ မြေတူးစက် က (၂)လုံးနဲ့ မြေလာညှိတာ” ဟု ဝမ်ဟောင်ကျေးရွာ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် မေလတွင်လည်း ထိုကုမ္ပဏီမှ မြေညှိနေစဉ် ဒေသခံပြည်သူတို့ စုပေါင်းကန့်ကွက်ခဲ့ကြသည့်အတွက် လုပ်ငန်းရပ်နားခဲ့ရကြောင်း၊ သို့သော် ယနေ့တွင် အဆိုပါကုမ္ပဏီမှ လူအင်အားဖြည့်တင်းကာ မြေညှိခြင်း ပြန်လည်ပြုလုပ်နေတာဖြစ်ကြောင်း သိရသည်။

ထိုဒေသတွင် မတရားသိမ်းခံရသည့် မြေဧက (၁၀၀)ကျယ်ဝန်းပြီး လက်ရှိအချိန်ထိ ဒေသခံများမှ စိုက်ပျိုးရေးလုပ်ငန်း ဆောင်ရွက်နေသည့် မြေဧက (၈၀)ကျော် ရှိနေကြောင်း ဒေသခံများထံမှ သိရသည်။

“သူတို့တွေ မြေညှိနေတာက (၁၀)ဧက ဝန်းကျင်ရှိမယ်၊ ကျန်တဲ့မြေနေရာမှာ ဒေသခံတွေ လယ်ယာစိုက်ပျိုးရေးလုပ်နေကြတုန်းပဲ၊ မြေညှိတာတွေ ဆက်ပြီးလုပ်နေရင် လယ်ယာစိုက်ပျိုးရေး တွေကိုလည်း လုပ်နိုင်တော့မှာမဟုတ်ဘူး” ဟု ဝမ်ဟောင်ဒေသခံတစ်ဦးက ပြောသည်။

ထိုဒေသတွင် လယ်ယာစိုက်ပျိုးရေးကို အဓိက လုပ်နေကြသည့်အတွက် လယ်ယာလုပ်ငန်း မလုပ်ရပါက ဒေသခံများ စားဝတ်နေရေးအခက်ခဲ ရှိလာနိုင်ကြောင်း၊ ထို့အပြင် လယ်ယာမြေ မတရားသိမ်းခံရသူ (၅၀)ဝန်းကျင်ရှိပြီး လက်ရှိအချိန်ထိ ပြန်မရသေးကြောင်း ဒေသခံများထံမှ သိရသည်။

တာချီလိတ်မြို့နယ် နမ့်ဟုတ်မြစ်ဝှမ်းဒေသတွင် “ဝ” သွေးစည်းညီညွတ်ရေးတပ်ဖွဲ့ (UWSA)ပိုင် ဟုန်ပန်းကုမ္ပဏီမှ ရော်ဘာသန့်စင်စက်ရုံနှင့် မန်းဂနိစ်သန့်စင်စက်ရုံတည်ဆောက်ရန် ရှိနေကြောင်း သိရသည်။

“အဲဒီ စက်ရုံတွေ လာဆောက်ရင် လေထုညစ်ညမ်းမှုတွေကြောင့် နှစ်ဖက်နယ်စပ်က ဒေသခံတွေရဲ့ ကျန်းမာရေးတွေကို ဆိုးဆိုးရွားရွားထိခိုက်စေနိုင်တယ်၊ အဲ့တာအပြင် လယ်ယာမြေတွေကိုလည်း ပြန်ရနိုင်တော့မှာ မဟုတ်ဘူး”ဟု ရှမ်းလူ့အခွင့်အရေးမဏ္ဍိုင်(SHRF) မှ ပြောရေးဆိုခွင့်ရှိသူ စိုင်းဟော်ရှဲန် က ပြောသည်။

အဆိုပါ စက်ရုံတည်ဆောက်မည့် မြေနေရာ ဧက (၁၀၀)သည် (၁၉၉၈−၁၉၉၉)ခုနှစ်ကတည်းက စက်မှုဇုန်တည်ဆောက်ရန်ဟုဆိုကာ မြန်မာစစ်တပ်က မတရားသိမ်းယူထားသည့် ဧက (၆၀၀)ထဲတွင် တစ်စိတ်တစ်ပိုင်းပါဝင်နေတာဖြစ်ကြောင်း သိရသည်။