မြန်မာနိုင်ငံတွင် စစ်အာဏာသိမ်းပြီး (၇) လအကြာတွင် သျှမ်းပြည်မြောက်ပိုင်း မူဆယ်မြို့တွင် တရုတ်ငွေလှဲလှယ်မှုနှုန်း သည် ငွေကျပ် (၁) သိန်းကို တရုတ်ယွမ် (၃၅၀) သာရရှိကာ မြန်မာငွေဈေး ကျဆင်းလာခဲ့ကြောင်း သိရသည်။
ထိုသို့မြန်မာငွေကျဆင်းလာသည့် အပြင် ကုန်စည်စီးဆင်းမှုကို တရုတ်နိုင်ငံဘက်က လမ်းများကိုပိတ်ထားသောကြောင့် မြန်မာနိုင်ငံတွင်းရှိ ကုန်ဈေးနှုန်း တချို့က မြင့်တက်လာနေလျက်ရှိကြောင်း မူဆယ်မြို့ဒေသခံတဦးက ပြောသည်။
“ ကုန်ဈေးနှုန်းမြင့်တက်တာလည်း ဒီငွေဈေးတွေနဲ့ ပတ်သက်တယ်။ မြန်မာငွေတွေကျလာလို့ ကျနော်တို့ ပစ္စည်းတွေက ဈေးတက်လာတာ။ မြန်မာနိုင်ငံက ကုန်ပစ္စည်းထုတ်တာသိပ်မရှိဘူးလေ။ သူများနိုင်ငံက ယူတာများတယ်” ဟု မူဆယ်မြို့ ဒေသခံတဦးက ပြောသည်။
မူဆယ်မြို့တွင် ယခုကိုဗစ် -၁၉ ကြောင့်လည်း ပြည်သူများက စားဝတ်နေရေးအတွက် ပိုပြီးချွေတာ သုံးစွဲနေရကြောင်း သိရသည်။
“ အခုရက်ပိုင်တော့ ချွေတာနေရတယ်။ ချွေတာစားသောက်နေရတာ။ ပစ္စည်းဝယ်ပြီးဆိုရင်လည်း တကယ်လိုမှပဲ ဝယ်ဖြစ်တော့တယ်။ မလိုအပ်ရင်တော့ သိပ်မဝယ်တော့ဘူး။ ချွေတာစားသောက်နေရတာပေါ့။” ဟု အထက်ပါ မူဆယ်မြို့ ဒေသခံကပြောသည်။
မူဆယ်မြို့တွင် ယခင်က မြန်မာငွေ တစ်သိန်းကို တရုတ်ငွေ (၅၀၀) ယွမ် ထိ လှဲလှယ်နိုင်ပြီး အာဏာသိမ်းယူပြီးနောက် တစ်သိန်းကို တရုတ်ယွမ် (၃၀၀) အထိ ကျဆင်းလာခဲ့ကြောင်းသိရသည်။
အလားတူ ထိုင်- မြန်မာငွေလှဲလှယ်မှုနှုန်းတွင်လည်း ယခုတွင် မြန်မာငွေ (၁) သိန်းကို ထိုင်းဘတ် (၁၇၀၀)သာ ရရှိပြီး ၁ ဒေါ်လာကို (၁၆၅၀) ထိ ဈေး ရှိကြောင်း သိရသည်။
