သျှမ်းမြောက် ကျောက်မဲမြို့နယ် မိုင်းငေါ့မြို့ရှိ မြို့မရိပ်သာကျောင်းတိုက်ဆရာတော် ကိုဗစ်ပိုးကူးစက်မှုကြောင့် စက်တင်ဘာလ (၅)ရက်နေ့က ပျံလွန်တော်မူသွားကြောင်း သိရသည်။
မိုင်းငေါ့မြို့ မြို့မရိပ်သာကျောင်းတိုက် ဆရာတော် ဘဒ္ဒန္တ ဦးဝိရိယသည် ပြီးခဲ့သည့် စက်တင်ဘာလ (၃)ရက်နေ့က ကိုဗစ်ပိုးစစ်ဆေးတွေ့ရှိခဲ့တာဖြစ်ပြီး ကျန်းမာရေးအခြေအနေ ဆိုးရွားလာမှုကြောင့် မိုင်းငေါ့မှ ကျောက်မဲဆေးရုံသို့ သယ်လာစဥ် လမ်းတဝက်တွင် ပျံလွန်တော်မူသွားတာဖြစ်ကြောင်း ဒေသခံများထံမှ သိရသည်။
“နေမကောင်းဖြစ်တာတော့ကြာပြီလို့ကြားတယ်၊ မနေ့က ကျန်းမာရေးအခြေနေ ဆိုးလာလို့ ကျောက်မဲဆေးရုံကို သယ်လာတာ၊ လမ်းတစ်ဝက်မှာပဲ ပျံလွန်တော်မူသွားတယ်” ဟု မိုင်းငေါ့ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
မြို့မရိပ်သာ ကျောင်းတိုက်ဆရာတော် ဘဒ္ဒန္တ ဦးဝိရိယ သည် သက်တော် (၅၅)ဝါ၊ ဝါတော် (၃၅)ဝါ ရှိကြောင်း၊ အဆိုပါကျောင်းတိုက်တွင် သံဃာ (၁၀)ပါးဝန်းကျင်ရှိပြီး လက်တလောတွင် သွားလာမှု ကန့်သတ်ထားကြောင်း သိရသည်။
“ဆရာတော်ရဲ့ ကျောင်းတိုက်ကိုလည်း Lock down လုပ်ထားလိုက်ပြီ၊ မိုင်းငေါ့မှာက စစ်ရှောင်တွေလည်း ရှိတယ်၊ ကိုဗစ်ကူးစက်တာတွေ အရမ်းများလာတယ်ဆိုတော့ စိုးရိမ်ရတယ်” ဟု ကျောက်မဲ ဒေသခံ အမျိုးသားတစ်ဦးက ပြောသည်။
မိုင်းငေါ့မြို့တွင် စစ်ဘေးရှောင်ပြည်သူ (၅၀၀)ဝန်းကျင်ရှိနေပြီး ပြီးခဲ့သည့် ရက်ပိုင်းက တာလုံစစ်ရှောင်စခန်းမှ ကိုဗစ်ကူးစက်ခံရသူ (၁၂)ဦး တွေ့ရှိခဲ့ရတာဖြစ်ကြောင်း၊ အဆိုပါ စစ်ရှောင်စခန်းအား ဝင်ထွက်ကန့်သတ်ထားသည့်အတွက် စားနပ်ရိက္ခာခက်ခဲမှုရှိနေကြောင်း သိရသည်။
မိုင်းငေါ့မြို့တွင် စက်တင်ဘာလ (၅)ရက် ယမန်နေ့အထိ ကိုဗစ် − ၁၉ ကူးစက်ခံရသူ (၅၇)ဦး ရှိပြီး သေဆုံးသူ (၂)ဦးရှိကြောင်း သိရသည်။
