သျှမ်းပြည် မြောက်ပိုင်း သိန္နီမြို့တွင် စစ်ကောင်စီ တပ်သားများ ပါရှိသည့် ကားများ ထွက်သွားပြီးနောက် ဗုံး(၂)လုံး ပေါက်ကွဲပြီး အနီးရှိ နေအိမ်များ၏ ပြတင်းပေါက်မှန်များနှင့် တံခါးများကို ဗုံးစများ ထိမှန်ကာ ပျက်စီးခဲ့မှုများ ရှိခဲ့ကြောင်း သတင်းရရှိသည်။
ယနေ့ စက်တင်ဘာလ ၆ ရက်နေ့ ညသန်းခေါင် ၁ နာရီဝန်းကျင်အချိန်တွင် သိန္နီဈေးအောက်ဖက်ရှိ လမ်းမ ကြီး ဘေးတွင် တပ်ဆင်ထားသည့် ဗုံးနှစ်လုံးသည် ပေါက်ကွဲပြီး အနီးရှိ နေအိမ်မှ ပြတင်းပေါက်များ တံခါး များကို ဗုံးစများ ထိမှန်သော်လည်း လူနှင့် တိရစ္ဆာန်များ ထိခိုက်မှု မရှိကြောင်းသတင်းသိရသည်။
“ဟုတ်ပါတယ်၊ ည ၁ နာရီဝန်းကျင်အချိန်မှာ ပေါက်ကွဲတာပါ၊ ဖြစ်ချင်တော့ အဲ့ချိန်မှာ စစ်ကားနှစ်စီးက ဖြတ် သွားတယ်၊ အဲ့စစ်ကား မရှေ့မနှောင်းမှာပဲ ဗုံးက ပေါက်ကွဲတာ၊ အနီးမှာ ရှိတဲ့ အိမ်တစ်လုံးရဲ့ ပြတင်းပေါက်နဲ့ တံခါးတွေကို ဗုံးစတွေက ထိမှန်သွားတယ်၊ လူနဲ့ တိရစ္ဆာန်တွေကတော့ ထိခိုက်မှု မရှိဘူး” ဟု သိန္နီမြို့နေ ဦးစိုင်းပွမ်ဝမ်းက သျှမ်းသံတော်ဆင့်ကို ပြောသည်။
ဗုံးများပေါက်ကွဲခြင်းသည် သိန္နီမြို့တွင်းတွင် ဖြစ်လေ့ဖြစ်ထမရှိသည့်အပြင် ယခုလို နိုင်ငံရေး မကောင်းသည့် အချိန်မှာ ဖြစ်လာသည့်အတွက် မြို့ခံပြည်သူများ ထိတ်လန့်နေပြီး နောက်အကျိုးဆက်များ ဖြစ်လာမှာကိုလည်း စိုးရိမ်နေကြောင်း သိန္နီမြို့နေ လူငယ်တစ်ဦးက သျှမ်းသံတော်ဆင့်ကို ပြောသည်။
“အရင်တုန်းက သိန္နီမြို့က ငြိမ်းချမ်းပါတယ်၊ အခုတော့ နိုင်ငံရေးကလည်းမကောင်းတော့ ဒီလိုတွေ ဖြစ်လာရ တယ်၊ ဒီလို ပေါက်ကွဲမှုတွေရှိလာတော့ မြို့တွင်းအစစ်အဆေးတွေ ကြမ်းလာမယ်လေ၊ အခုတောင် မြို့ထဲမှာ စကစတွေ စစ်ဆေးမေးမြန်းနေကြတယ်၊ သူတို့ အဲ့လို လုပ်တော့ ပြည်သူတွေက သွားရဲလာရဲ မရှိကြတော့ ဘူး” ဟု သိန္နီမြို့နေ လူငယ်တစ်ဦးက သျှမ်းသံတော်ဆင့်ကို ပြောသည်။
သိန္နီမြို့နယ် အတွင်းတွင် အာဏာသိမ်း စစ်ကောင်စီ တပ်ဖွဲ့အပြင် တခြားသော တိုင်းရင်းသားလက်နက်ကိုင် များ ဖြစ်ကြသည့် ကချင်လွတ်မြောက်ရေးတပ်မတော် (KIA)၊ သျှမ်းပြည်တိုးတက်ရေးတပ်မတော် (SSPP/SSA) နှင့် တအာန်း(ပလောင်) အမျိုးသားလွတ်မြောက်ရေးတပ်မတော်(TNLA) ကဲ့သို့သော လက်နက် ကိုင် အဖွဲ့အစည်းများလည်း သွားလာ လှုပ်ရှားမှုများရှိနေကြာင်းသိရသည်။
Leave a Comments