သျှမ်းပြည် တောင်ကြီးမြို့နယ်ရှိ တောင်လေးလုံး အကျဉ်းထောင်ရှိ နိုင်ငံရေး အကျဉ်းသားများ ကိုဗစ် -၁၉ ရောဂါပိုး ကူးစက်ခံနေရကြောင်း သတင်းသိရသည်။

နွေဦးတော်လှန်ရေးကာလအတွင်း စစ်ကောင်စီတို့၏ မတရားဖမ်းဆီးခြင်းကို ခံရပြီး ညောင်ရွှေ အကျဉ်း ထောင် (တောင်လေးလုံး) အကျဉ်းထောင်တွင် အကျဉ်းချထားခြင်း ခံရသည့် နိုင်ငံရေး အကျဉ်းသားများ တချို့သည် ကိုဗစ် -၁၉ ကူးစက်ခံရကြောင်း မိသားစုဝင်များက သျှမ်းသံတော်ဆင့်ကို ပြောသည်။

“အိမ်ကို တိုက်ရိုက်အကြောင်းကြားပေးတာ မဟုတ်ပါဘူး၊ ကျမတို့ ရှေ့နေကနေ တစ်ဆင့်နဲ့ပဲ ဖုန်းဆက် အကြောင်းကြားလာတယ်၊ ဘာမှတော့ သေချာမသိရဘူး၊ ကျမကလည်း ကြားကြားချင်း နောက် တစ်နေ့ ထောင်ဝင်စာသွားတွေ့တယ်၊ ဒါပေမဲ့ မတွေ့ခဲ့ရပါဘူး” ဟု တောင်လေးလုံးမှာ ဖမ်းဆီး ထိန်းသိမ်း ခြင်းခံထားရသူ စိုင်းမျိုး ( နာမည်လွဲ ) ၏ အမျိုးသမီး ဖြစ်သူက သျှမ်းသံတော်ဆင့်ကို ပြောသည်။

စိုင်းမျိုး(နာမည်လွဲ) သည် နွေဦးတော်လှန်ရေးတွင် ပါဝင်လှုပ်ရှားသူဖြစ်သည် ဟူသည့် စွပ်စွဲချက်ဖြင့် ပြီးခဲ့ သည့် မေလ ၁၆ ရက်နေ့ ညသန်းခေါင်ယံ အချိန်တွင် နေအိမ်ခန်းထဲထိ အကြမ်းဖက် ဖမ်းဆီးခေါ်ဆောင် သွားခြင်း ခံရသူ ဖြစ်ပြီး လက်ရှိမှာတော့ အကျဉ်းထောင်ထဲတွင် ကိုဗစ် – ၁၉ ကူးစက်ခံနေရပါသည်။

လက်ရှိ တောင်လေးလုံး အကျဉ်းထောင်တွင် ကိုဗစ် – ၁၉ ကူးစက်ခံနေရသည့် အကျည်းသားများသည် သိရှိရသည့် စာရင်းအရ ၁၀ ဦးထက်မနည်း ရှိနေပြီး အကျဉ်းထောင်မှ တာဝန်ရှိသူများကို မေးမြန်းရာ ကောလဟလများဖြစ်ကြောင်း ပြောခဲ့သည်။

“တချို့က ကောလဟလတွေပါ၊ အကျဉ်းသားတွေ အားလုံးက ကိုဗစ် ကာကွယ်ဆေးအားလုံးထိုးပြီးကြပါပြီ၊ တကယ်လို့ နေမကောင်းဖြစ်လာပြီဆိုရင်လည်း ကျနော်တို့ဖက်က သက်ဆိုင်ရာအလိုက် ကုသပေးပါတယ်၊ အရမ်းကြီးလည်း စိတ်ပူစရာ မရှိပါဘူး” ဟု တောင်လေးလုံး အကျဉ်းထောင်မှ တာဝန်ရှိသူ တစ်ဦးက ပြောပါသည်။

အကျဉ်းထောင်များသည် ပြီးခဲ့သည့် ၇ လပိုင်း ၁၈ ရက်နေ့မှ ၈ ပိုင်း ၁၈ ရက်နေ့ အထိ တစ်လတိတိ ထောင်ဝင်စာ ပို့ခွင့် ပိတ်ပင်ထားပြီး ထောင်ဝင်စာ ပို့ခွင့် ပြန်လည် ခွင့်ပြုပေးပြီး အချိန်မကြာသေးခင်မှာ ယခုလို သတင်းမျိုး ကြားရကြောင်းလည်း ထောင်လေးလုံးအကျဉ်းထောင်ရှိ သားတစ်ဦး၏ ဖခင်ကလည်း သျှမ်းသံတော်ဆင့်ကို ပြောသည်။

“ဒီလိုတွေ မဖြစ်ခင် အရင်ကဆို ထောင်ဝင်စာပို့ဖို့လည်း ပိတ်ထားတယ်လေ၊ ခုပြန်ပို့ခွင့်ပြုတာဖြင့် မကြာ သေးဘူး၊ သားက ထောင်ထဲမှာ ကိုဗစ် – ၁၉ ကူးစက်ခံနေရပြီတဲ့၊ စိတ်မကောင်းဘူးပေ့ါ၊ ပြီးတော့ စိတ်ပူ တယ်၊ အပြင်မှာ ရောဂါဖြစ်နေရင်တောင် ကုသဖို့ ခက်ခဲနေကြရတာပဲ၊ ထောင်ထဲမှာ ရှိနေတဲ့ သူတို့လေးတွေ ဘယ်လောက်ထိ ခက်ခဲနေမလဲဆိုတာ တွေးကြည့်ရုံနဲ့ မျက်ရည်ကျရတယ်” ဟု ထောင်လေး လုံး အကျဉ်းထောင်မှာ ဖမ်းဆီးထိန်းသိမ်းခြင်းခံထားရသည့် သားတစ်ဦး၏ ဖခင်က ပြောသည်။

ရှမ်းပြည်နယ် အတွင်းရှိ အကျဉ်းထောင် အသီးသီးမှ အကျဉ်းသား/အချုပ်သား အားလုံးကို ကိုဗစ် -၁၉ ကာကွယ်ဆေး ထိုးနှံပေးပြီး ဖြစ်သည်ဟု ရှမ်းပြည်နယ်အကျဉ်းဦးစီးဌာန တာဝန်ရှိသူက အတည်ပြု ပြောဆိုထားသည်။

ညောင်ရွှေအကျဉ်းထောင်မှ အချုပ်သား ၃ ဦးသည် ပြီးခဲ့သော ရက်ပိုင်းတွင် ကိုဗစ် – ၁၉ ကြောင့် ကွယ်လွန်ခဲ့ရသည့် အပြင် လက်ရှိအကျဉ်းထောင် အတွင်းရှိ အချုပ်သားအချို့တို့လည်း ကိုဗစ် – ၁၉ ကူးစက်ခံနေရကြောင်း သိရသည်။