သျှမ်းပြည်မြောက်ပိုင်း ကျောက်မဲမြို့ရှိ ပရဟိတ အဖွဲ့ တစ်ချို့ စစ်ကောင်စီမှ ထိုးပေးသည့် ကိုဗစ်-၁၉ ကာကွယ်ဆေး ကို အယုံအကြည်မရှိကြောင်း စုံစမ်းသိရှိရသည်။
သျှမ်းပြည်အတွင်းရှိ မြို့နယ်တစ်ချို့မှာ ဇူလိုင် (၃၀) ရက်မှ စတင်ပြီး တရုတ်နိုင်ငံထုတ် (Sinopharm) ကာကွယ်ဆေးများကို (၆၅) နှစ်အထက် အသက်ကြီးသူများ၊ ဌာနဆိုင်ရာဝန်ထမ်းများ၊ ပရဟိတအဖွဲ့များ၊ ဈေးသည်များ စစ်ကောင်စီက စတင်ထိုးပေးနေကြောင်း သိရသည်။
“ကာကွယ်ဆေးက ယုံရတာမှ မဟုတ်တာ။ ဆေးက မှန်ပေမယ့် သယ်ဆောင်နည်းမှ မမှန်တာ။ ကျနော်တို့ အဖွဲ့ကတော့ တစ်ယောက်မှ ကို မထိုးဘူး။ မိသားစုတွေအပါအဝင်။ သယ်ဆောင်နည်း မမှန်တော့ ဆေးထိုးလည်း အာနိသင်ရှိမှာ မဟုတ်လို့ မထိုးတာပါ။” ဟု ကျောက်မဲပရဟိတ အဖွဲ့ တစ်ဖွဲ့က သျှမ်းသံတော်ဆင့် ကိုပြောသည်။
တရုတ်နိုင်ငံံထုတ် ကိုဗစ်-၁၉ ကာကွယ်ဆေးကို ယုံကြည်မှု မရှိသောကြောင့် ပြည်သူတစ်ချို့ ကာကွယ် ဆေးသွားထိုးသွင်းခြင်း မရှိခဲ့ကြောင်း သိရှိရသည်။
“လူတိုင်းကို ပိုးရှိတဲ့သူတွေလိုပဲ ဆက်ဆံပြောဆိုပါတယ်။ အတည်ပြုလူနာတွေ သံသယလူနာတွေ ကိုင်တွယ်တဲ့ နေရာမှာ အကာအကွယ် အပြည့်အစုံနဲ့ပဲ အရာရာကို သတိထားပြီး လုပ်ဆောင်နေတာပါ။ ပထမလှိုင်းစကတည်းက ကျနော်တို့ အသင်းကလည်း အခုချိန်ထိ အသိတသိနဲ့ လုပ်ခဲ့လို့လား ကံကောင်းလွန်းလို့လားတော့မသိဘူး။ ခုချိန်ထိ ပိုး တစ်ယောက်မှ မထိသေးပါဘူး”ဟု ကာကွယ်ဆေး မထိုးသည့် ကျောက်မဲ ပရဟိတ အဖွဲ့ တစ်ဖွဲ့ ကပြောသည်။
အဆိုပါ စစ်ကောင်စီမှ ထိုးပေးသည့် ကာကွယ်ဆေးသည် ကာကွယ်ဆေးထားသည့် အနေအထားမမှန်ကြောင်း နှင့် အယုံအကြည်မရှိကြောင်း ဒေသခံ တစ်ချို့က ပြောဆိုကြသည်။
“ကာကွယ်ဆေးကို အအေးခန်းမှာ ထားရမယ်။ ဆေးရုံမှာ စနစ်တကျထားရမှာကို သူတို့က ဟောခန်းမှာ လာထားပြီး ထိုးပေးတယ်။ အခန်းခန်းမှာ မထားဘူး။ ကျနော်တို့လဲ အယုံအကြည်မရှိဘူး” ဟု ကျောက်မဲဒေသခံ တစ်ဦးကပြောသည်။
တရုတ်ထုတ် ကိုဗစ်-၁၉ ကာကွယ်ဆေး (Sinopharm) သည် ၂ ကြိမ် ထိုးရမည်ဖြစ်ပြီး ယခု စက်တင်ဘာ ပထမပတ်မှာ စတင်ထိုးနှံပေးနေပြီဖြစ်သည်။
စစ်ကောင်စီမှ ပြည်သူများကို ထိုးပေးသည့် ကာကွယ်ဆေးသည် တရုတ်နိုင်ငံထုတ် (Sinopharm Vaccine) ဖြစ်ပြီး ကာကွယ်ဆေးထိုးပြီးချိန်တွင် ကိုက်ခဲခြင်း၊ ယောင်ခြင်း၊ ဆေးထိုးနေရာမှာ နီခြင်း၊ ခေါင်းကိုက်ခြင်း၊ အကြောကိုက်ခြင်း၊ အရေပြားပေါ် အနီးစက်များ ထွက်ပေါ်ခြင်း၊ အဖျားရှိခြင်း များ ဖြစ်ပွားလာနိုင်ကြောင်း သိရှိရသည်။
Sinopharm Vaccine ကာကွယ်နိုင်မှုစွမ်းအားသည် ၇၉.၃ ရာခိုင်နှုန်းဖြစ်ပြီး ဆေးကို ၂ ပတ်ခြား ခြင်းဖြင့် (၂) ကြိမ်ထိုးရမည်ဖြစ်ကြောင်း သိရှိရသည်။
