သျှမ်းပြည်မြောက်ပိုင်း လားရှိုးမြို့နယ် နားကွမ်းလုံကျေးရွာအုပ်စု နားဟွယ်ရွာတွင် ယမန့်နေ့ ဩဂုတ် (၃၁) နေ့လည် ၁ နာရီဝန်းကျင်က PDF ဟုထင်ခံရသည့် လူငယ် (၇) ဦးကို စစ်ကောင်စီက ဖမ်းဆီးသွားကြောင်း စုံစမ်းသိရှိရသည်။
ထိုလူငယ် (၇) ဦးကို စစ်ကောင်စီ အင်အားအလုံးအရင်းဖြင့် လာရောက်ဖမ်းဆီးသွားကြောင်း၊ လူငယ်များ ထမင်းစားနေချိန်တွင် ဖမ်းဆီးခံရကြောင်းသိရသည်
ထိုဖမ်းဆီးခံရသည့် လူငယ်တချို့သည် (PDF) တပ်ဖွဲ့ဝင်များ ဖြစ်ကြောင်း ဒေသခံများပြောပြချက်အရသိရသည်။
“ စစ်အင်အားက ၃၀ လောက်ရှိတယ်။ ပြီးတော့ စရဖတွေနဲ့လာတာ။ စရဖတွေလဲ အင်အားများတယ်။ သူတို့က ကား ၃စီး။ စစ်သားတွေက အပြင်မှာ ကားနဲ့ လုံခြုံရေးယူပေးပြီးစောင့်နေတာ။ ကျမတို့ရွာဒေသခံက ၂ ယောက်လောက်ဘဲ။ ကျန်တဲ့သူတွေကတစ်ခြားကနေပေါ့။ တစ်ချို့ကလည်း PDF ဖြစ်တယ်။ ” ဟု မျက်မြင်တွေ့ရှိသူ တစ်ဦး က သျှမ်းသံတော်ဆင့် ကို ပြောသည်။
ထိုသို့ ဖမ်းခံရသည့် နေအိမ်တွင် ရှိသည့် ပစ္စည်းများကိုပါ စစ်ကောင်စီတပ်ဖွဲ့တို့က ယူဆောင်သွားကြောင်း မျက်မြင်တွေ့သူတွေက ဆိုသည်။
စစ်ကောင်စီမှ သိမ်းဆည်းသွားသည့် ပစ္စည်းများသည် စုစုပေါင်း သိန်း (၁၀၀) နီးပါးထိရှိကြောင်းသိရသည်။
“ သူတို့အိမ်က ရေမော်တာ၊ ကား (၂)စီး၊ ဆိုင်ကယ် (၃)စီး၊ ရွှေကတန်ဖိုး သိန်း (၆၀) နဲ့၊ ငွေသားက (၅၀) လောက်ရှိတယ်လို့ပြောတယ်။ အဲတာတွေကို သူတို့ယူသွားတာတဲ့။ ပြီးတော့ PDF တွေရဲ့ ပစ္စည်းတွေကိုလည်း သူတို့သိမ်းယူသွားတယ်” ဟု ၎င်းက ပြောသည်။
ထိုသို့ ကျေးရွာထဲထိ ပြည်သူများကို လာရောက်ဖမ်းဆီးတာကြောင့် ပြည်သူများက စိုးရိမ်ကြောက်ရွံ့နေရပြီး ယမန့်နေ့တွင် ပြည်သူများ အားလုံးက ဘုန်းကြီးကျောင်းသို့ သွားရောက်အိပ်စက်ရကြောင်း နာဟွယ်ရွာဒေသခံတဦးက ပြောသည်။
“ မနေ့ညက အကုန်လုံး ဘုန်းကြီးကျောင်းမှာ သွားအိပ်ရတယ်။ တစ်ရွာလုံး ဘုန်းကြီးကျောင်းမှာသွားအိပ်တာ။ စိုးရိမ်တယ်။ကြောက်တယ်လေ။ ကျမတို့က သာမန်ပြည်သူပဲလေ။ စစ်ဖြစ်မှာလားဆိုပြီးတော့စိုးရိမ်ပြီးနေကြရတယ်” ဟု နာဟွယ်ကျေးရွာ ဒေသခံတဦးက ပြောသည်။
ဖေဖော်ဝါရီ ၁ ရက်နေ့ စစ်အာဏာသိမ်းယူပြီးနောက်ပိုင်း စစ်ကောင်စီမှ ပြည်သူ ၁၀၄၀ သတ်ဖြတ်ခဲ့ပြီး ဖမ်းဆီးခံထားရသူ ၇၇၀၁ ဦး ရှိကြောင်း နိုင်ငံရေး အကျဉ်းသားကူညီစောင့်ရှောက်ရေးအသင်း (AAPP) က ယမန့်နေ့ ဩဂုတ် (၃၁) ရက်နေ့က ထုတ်ပြန်ထားသည်။
Leave a Comments