တောင်လေးလုံးအကျဉ်းထောင်တွင် ဖမ်းဆီးထိန်းသိမ်းခံရထားသည့် အသက် ၂၀ အရွယ် တောင်ကြီး G-Z တဉီး ကိုဗစ်ရောဂါဖြင့် သေဆုံးသွားသည့်အကြောင်း မိသားစုဝင်ထံ အကြောင်းကြားလာသည်ဟု သိရသည်။

သျှမ်းပြည်တောင်ပိုင်း ညောင်ရွှေမြို့နယ် တောင်လေးလုံးအကျဉ်းထောင်မှာ စစ်ကောင်စီတို့၏ ဖမ်းဆီးထိန်းသိမ်းခြင်းကို ခံရထားသော တောင်ကြီးမြို့ ကျောင်းကြီးစုရပ်နေ မောင်မျိုးမင်းသန့် (ခေါ်) သားငယ်သည် ယမန်နေ့ သြဂုတ်လ ၂၉ ရက်နေ့တွင် ကိုဗစ် ၁၉ ကူးစက်ခံရပြီး သေဆုံးသွားကြောင်း ထောင်တာဝန်ရှိက မိသားစုထံ အကြောင်းလာသည်ဟု မိသားစုနှင့် နီးစပ်သူများက ပြောသည်။

“ကိုဗစ် နဲ့ ဆုံးတယ်ဆိုပြီးတော့ အိမ်ကို အကြောင်းကြားလာတယ်၊ အဲ့ဟာပဲ ပြောတယ်၊ ကျန်တာတွေ ဘာမှ မသိရဘူး၊ စဝ်စံထွန်းဆေးရုံကိုလည်း မေးကြည့်ပါသေးတယ်၊ ဒါမယ့် ဘာမှ အကြောင်းမပြန်ဘူး” -ဟု မိသားစုဝင် နီးစပ်သူ တစ်ဦးက သျှမ်းသံတော်ဆင့်ကို ပြောသည်။

ကိုမျိုးမင်းသန့် ခေါ် ကိုသားငယ်သည် ပြီးခဲ့သည့် မတ်လ ၂၇ ရက်က တောင်ကြီးမြို့မှာ ဖမ်းဆီးခံရပြီး ရာဇသတ်ကြီးပုဒ်မ ၅၀၅-က ဖြင့် အမှုဖွင့် ခံထားရသူ ကိုမျိုးမင်းသန့်သည် ထောင်ထဲတွင် ကိုဗစ် – ၁၉ ကူးစက်ခံရပြီး ညောင်ရွှေအကျဉ်း ထောင်မှ စဝ်စံထွန်းဆေးရုံသို့ ပြောင်းရွေ့ကုသစဉ် သေဆုံးသွားကြောင်း ထောင်မှ တာဝန်ရှိသူတစ်ဦးက မိသားစုဝင်ကို အကြောင်းကြားခဲ့တယ်လို့ သိရသည်။

“သူအဖမ်းခံရတဲ့နေ့က မတ်လ ၂၇ ရက်နေ့ကပါ၊ ဖမ်းသွားပြီးတော့ ၅၀၅ တွေတပ်ပြီး အမှုဖွင့်တယ်ပေါ့၊ အခုတော့ မိသားစုတွေကို အကြောင်းကြားလာတာက သူဆုံးပြီတဲ့” – ဟု အထက်ပါ ပုဂ္ဂိုလ်က ပြောသည်။

လက်ရှိတွင် ကိုမျိုးမင်းသန့်၏ ရုပ်အလောင်းသည် ဘယ်နေရာတွင်ရှိပြီး မည်ကဲ့သို့ သေဆုံးရသည် ဆိုသည့် အတည်ပြုချက်များလည်း မသိရသေးကြောင်း မိသားစုဝင်များနှင့် ဆွေမျိုးများက ရုပ်အလောင်းကို ပြန်လိုချင်ကြောင်းလည်း သိရသည်။

“အပြင်လူနဲ့ ထိတွေ့ခွင့်မရှိဘဲနဲ့ ကိုဗစ် ကူးစက်ခံရတယ်၊ ကိုဗစ်ကြောင့်သေတယ် ဆိုတာ သံသယဖြစ်စရာပဲ၊ အခုဆို တောင်လေးလုံးမှာ သေတာ ၃ ယောက် ရှိသွားပြီ။ အထဲရောက်နေသူတွေအတွက်လည်းပိုပြီး တော့ စိုးရိမ်ရတယ်၊ ရုံးထုတ် ရုံးချိန်းတွေလည်း မရှိတော့ ဘာမှကို မသိရတော့ဘူး ” ဟု ဖမ်းဆီးခံရသူ များကို လိုက်လံကူညီပေးနေသည့် ရှေ့နေတစ်ဦးက သျှမ်းသံတော်ဆင့်ကို ပြောသည်။

ညောင်ရွှေအကျဉ်းထောင်(တောင်လေးလုံး)တွင် ဖမ်းဆီးထိန်းသိမ်းခံထားရသူများအနက် ဩဂုတ်လ ၂၂ ရက်တွင် မူလတန်းပြဆရာ ဦးစိုးလွင်လွင် ၊ သြဂုတ်လ ၂၇ ရက်တွင်လည်း ဆီဆိုင်မြို့နယ် NLD ပါတီဝင် ခွန်ဗွာထိုသွေး နှင့် ယခုကိုမျိုးမင်းသန့် အပါအဝင် ဖမ်းဆီးခံထားရစဉ် ကွယ်လွန်သူ စုစုပေါင်း ၃ ဦး ရှိနေပြီ ဖြစ်သည်။