သျှမ်းပြည် တောင်ပိုင်း ကလောမြို့နယ် အောင်ပန်းမြို့တွင် စစ်အာဏာရှင်ဆန့် ကျင်ရေးလှုပ်ရှားသည့် ပြည်သူ့ကာကွယ်ရေးတပ်ဖွဲ့ PDF တပ်ဖွဲ့ဝင်ဟု စွပ်စွဲခံရသည့် လူငယ်များအား အာဏာသိမ်းစစ်ကောင်စီက ဖမ်းဆီးမှု ဆက်တိုက် ပြုလုပ်လာနေသည်ဟု သတင်းသိရသည်။
ပြီးခဲ့သည့် သြဂုတ်လ ၂၃ ရက်နေ့ ညနေ ၆ နာရီဝန်းကျင်တွင် အောင်ပန်းမြို့ရှိ မြို့ဟောင်းရပ်ကွက် နယ်မြေ ၈ တွင် နေထိုင်သည့် အသက် ၁၇ နှစ်ခန့် လူငယ် အမျိုးသားတစ်ဦးကို အရပ်ဝတ်နှင့် လူတစ်စုက လာရောက် ဖမ်းခေါ်သွားကြောင်း အဆိုပါ ရပ်ကွက်တွင် နေထိုင်သူ အမည်မဖော်လိုသည့် ပြည်သူတစ်ဦးက သျှမ်းသံတော်ဆင့်ကို ပြောသည်။
“အဲ့နေ့ည ၆ နာရီဝန်းကျင်လောက်မှာ အရပ်ဝတ်နဲ့ လူတစ်စုက ရပ်ကွက်ထဲကိုလာတယ်၊ ပြီးတော့ အဲ့ကောင် လေး အိမ်ကိုသွားပြီးတော့ ဆူလားဆဲလားတွေ လုပ်သေးတယ်၊ ကျနော်တို့ အိမ်ဝိုင်းနဲ့ သိပ်မဝေး တော့ ကြားနေရတယ်၊ ပြီးတော့ သေနတ်သံ သုံးချက်ကြားလိုက်ရတယ်၊ ကောင်လေးကိုလည်း ကြိုးတုပ်ပြီး ခေါ်သွားတာ” ဟု အထက်ပါ ပုဂ္ဂိုလ်က ပြောသည်။
အောင်ပန်းသူအောင်ပန်းသားများပြောပြချက်အရ လက်ရှိချိန်အထိ စစ်ကောင်စီတပ်မှ အောင်ပန်း လူငယ်များ ၆ ဉီးထက်မနည်း ဖမ်းဆီးသွားပြီးဖြစ်ကြောင်း၊ သာမန်ကျောင်းသားလေးများလည်း ပါဝင်ကြောင်း ပြောဆိုကြသည်။
“အောင်ပန်းမှာ သတင်းကသိပ်မထွက်ပေမယ့် မတရားဖမ်းဆီးခံရတဲ့ လူငယ်တွေက ရှိနေပါတယ်၊ သူတို့က PDF ဖြစ်တယ် ဆိုပြီးတော့ ဖမ်းခေါ်သွားကြတာ၊ အသက်မပြည့်သေးတဲ့ ကောင်လေးတွေပါတယ်၊ အမှန်ဆို သူတို့က ရိုးရိုးကျောင်းသားတွေပဲ၊ စစ်ကောင်စီတပ်သားတွေက လာရင် အရပ်ဝတ်နဲ့ပဲ လာကြတာများ တယ်” – ဟု အောင်ပန်းမြို့ မိုးကောင်းရပ်ကွက်တွင် နေထိုင်သူ အသက် ၃၈ နှစ်အရွယ် အမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ PDF ဟု စွပ်စွဲခံရပြီး ဖမ်းဆီးခြင်းခံရသော လူငယ်များကို အောင်ပန်းမြို့ရှိ ရဲစခန်းတွင် ဖမ်းဆီးထိန်း သိမ်း ထားခြင်းဟု ဒေသခံများက စုံစမ်းသိရှိရသော်လည်း အတည်ပြုချက်များ မသိရှိရကြောင်းလည်း အထက်ပါ ပုဂ္ဂိုလ်က ပြောသည်။
“အပစ်မရှိတဲ့ လူငယ်တွေကို စွပ်စွဲချက်တွေနဲ့ဖမ်းတယ်၊ ဘယ်နေရာမှာ ဖမ်းထားလဲ ဆိုတာလည်း မပြောပြဘူး၊ တချို့ဆို အသက်မပြည့်သေးတဲ့ ကလေးတွေပါတယ်လို့တောင်ပြောတယ်၊ မိဘတွေက စိတ်ပူနေတာ အမှန်ပဲ” ဟု ၎င်းကပြောသည်။
ယခုရက်ပိုင်းအတွင်းတွင် အောင်ပန်းမြို့အပါအဝင် သျှမ်းပြည် အတွင်းရှိ မြို့များသို့ NUG နှင့် PDFတပ်ဖွဲ့ များကို ဆက်သွယ်ထောက်ပံ့မှုများ ပြုလုပ်ပါက ဖမ်းဆီးအရေးယူမည်ဟုလည်း စစ်ကောင်စီတို့က ခြိမ်းခြောက်ပြောဆိုနေကြောင်း သိရသည်။
Leave a Comments