သျှမ်းပြည်မြောက်ပိုင်း ကွတ်ခိုင်မြို့နယ် မိုင်းယုလေး စစ်ရှောင်စခန်းတွင် နေထိုင်သည့် အမျိုးသား (၂) ဦးကို စစ်ကောင်စီလက်အောက်ခံ ပြည်သူ့စစ်တပ်ဖွဲ့က အကြောင်းမဲ့ ရိုက်နှက်ခဲ့ကြောင်း စုံစမ်းသိရှိရသည်။
ယမန်နေ့ (သြဂုတ် ၂၃)ရက် နေ့လည် ၁နာရီဝန်းကျင်တွင် ကွတ်ခိုင်မြို့နယ် မိုင်းယုလေး စစ်ရှောင်စခန်းတွင် နေထိုင်သည့်အမျိုးသား(၂)ဦးသည် စစ်ကောင်စီ လက်အောက်ခံ ပြည်သူ့စစ်တပ်ဖွဲ့က အကြောင်းမဲ့ ရိုက်နှက်ခဲ့ပြီး၊ ရိုက်ခံရသည့် ညီအောင်ဆာသည် ဒဏ်ရာဖြင့် စစ်ရှောင်စခန်းသို့ ပြန်ရောက်လာပြီး ကျန်တစ်ဦးဖြစ်သည့် မောင်ယိုင်းငြိမ်းမှာ စစ်ရှောင်စခန်းသို့မရောက်လာဘဲ ပျောက်ဆုံးနေကြောင်း သတင်းရရှိသည်။
ရိုက်ခံရသည့် ညီအောင်ဆာသည် ဟိုခိုစစ်ရှောင်စခန်းတွင်နေထိုင်သည့် ဖခင်ထံ တိုင်းရင်းဆေးကို သွားယူရန်အတွက် လတ်ခုလတ်တနေရာ ပန်းဆေးပြည်သူစစ် တပ်ဖွဲ့နှင့် တွေ့ဆုံးကာ စစ်ဆေးမေးမြန်းပြီး လက်သီးဖြင့်ထိုးခြင်း၊ သေနတ်ဖြင့် ထုခြင်းတို့ ခံခဲ့ရကြောင်း ညီအောင်ဆာ နှင့် နီးစပ်သူ ဆွေမျိုး တစ်ဦးက သျှမ်းသံတော်ဆင့် ကို ပြောသည်။
“ သူတို့ ကလေးက နေမကောင်းလို့ ဟိုခိုစစ်ရှောင်စခန်းမှာရှိတဲ့ သူအဖေနားမှာ ဆေးသွားယူတာ။ တိုင်းရင်းဆေးသွားယူမလို့၊ အဲမှာ ဘောလုံးကွင်းဖက်မှာရောက်တော့ ပြည်သူစစ်တပ်ဖွဲ့တွေက စစ်ဆေးမေးမြန်ပြီး ရိုက်တာ။ သူတို့နောက်ဆုတ်ခိုင်းလိုက်ပြီးတော့ သေနတ်နဲ့ လက်သီးနဲ့ထိုးတာ” ဟု ် နီးစပ်သူဆွေမျိုး တဦးက ပြောသည်။
ထိုရိုက်ခံရသည့် အချိန်တွင် ညီအောင်ဆာ အပြင် မောင်ယိုင်းငြိမ်းသည်လည်း ရိုက်ခံခဲ့ရပြီး လက်ရှိအချိန်ထိ မောင်ယိုင်းငြိမ်းသည် စစ်ရှောင်စခန်းသို့ ပြန်ရောက်လာခြင်းမရှိကြောင်းသိရသည်။
“ သူတို့ က စစ်ရှောင်စခန်းက (၂)ယောက်လုံးပဲ။ ဒါပေမယ့် သွားတဲ့နေရာမတူဘူး။ ရိုက်ခံခဲ့ရတဲ့နေရာက တူတယ်။ အခု ချိန်ထိ မောင်ယိုင်းငြိမ်းကတော့ စစ်ရှောင်းစခန်းကို မရောက်လာသေးဘူး။ ဘယ်ပျောက်သွားတာလဲမသိဘူး။” ဟု မိုင်းယုလေ စစ်ရှောင်စခန်းက တာဝန်ရှိသူ တစ်ဦး က သျှမ်းသံတော်ဆင့်ကိုပြောသည်။
စစ်ရှောင်စခန်းသို့ ပြန်ရောက်လာသည့် ညီအောင်ဆာသည် ဒဏ်ရာ ဒဏ်ချက်များရရှိသဖြင့် ဆေးကုသခံယူနေကြောင်း သိရသည်။
အလားတူ ဇူလိုင် ၂၆ ရက်နေ့က တာမိုးညဲ ပြည်သူစစ်က ကိုဗစ် ၁၉ ရောဂါကူးစက်ကာလတွင် ဖြတ်သန်းသွားလာသည့် ပြည်သူများကို တုတ်ဖြင့် ရိုက်နှက် ဒဏ်ပေးခဲ့ကြောင်းသိရသည်။
ပြည်သူ့စစ်တပ်ဖွဲ့များသည် အရပ်ဝတ်ဖြင့် သွားလာနေပြီး လမ်းသွားလမ်းလာသူများကို တွေ့ရင် အပြစ်မရှိ အကြောင်းမဲ့ ရိုက်နှက်နေလျက်ရှိကြောင်း သိရသည်။
