သျှမ်းပြည်မြောက်ပိုင်း မူဆယ်မြို့ ဟိုနားရပ်ကွက်တွင် နေထိုင်သည့် ဦးထွန်းဝင်းကို စစ်ကောင်စီက ဖမ်းဆီးခေါ်ဆောင်သွားပြီး (၅၀၅) က ဖြင့် အမှုဖွင့်ထားကြောင်း စုံစမ်းသိရှိရသည်။
ဦးထွန်းဝင်း၏သားသည် PDF နှင့် ပတ်သက်နေသည် ဟုဆိုကာ စစ်ကောင်စီအုပ်စုမှ ဩဂုတ် ၂၀ ရက်တွင် စစ်ကောင်စီ အုပ်စုမှ ၎င်း၏ နေအိမ်ကို လာရောက်ရှာဖွေရာ သားဖြစ်သူကို မတွေ့သဖြင့် ဖခင်ဖြစ်သူကို ဖမ်းဆီးခေါ်ဆောင်သွားပြီး ယမန့်နေ့ ဩဂုတ် (၂၂) ရက်နေ့တွင် (၅၀၅) က ဖြင့် အမှုဖွင့် အရေးယူထားကြောင်း သိရသည်။
“ သားဖြစ်သူက PDF နဲ့ ပတ်သက်လို့ဆိုပြီး လာရှာဖမ်းတာ။ သားကိုမတွေ့တော့ သူ့ကိုဖမ်းသွားတယ်။ (၅၀၅) က နဲ့ အမှုဖွင့်လိုက်ပြီးလို့ကြားတယ်။ သူဖုန်းထဲက အချက်အလက်ကြောင့်မလို့ သူကို (၅၀၅) ကနဲ့ အမှုဖွင့်လိုက်တာပါ။ ပြန်မလွှတ်လာသေးပါဘူး” ဟု မူဆယ်မြို့ အမည်မဖော်လိုသည့် ဒေသခံတဦးက ပြောသည်။
ဦးထွန်းဝင်၏ သားကို စစ်ကောင်စီမှ ဖမ်းဝရမ်းထုတ်ထားသဖြင့် နေအိမ်ထိလာရောက် ရှာဖွေဖမ်းဆီးခြင်းဖြစ်ကြောင်း သိရသည်။
ဦးထွန်းဝင်းသည် အသက် (၄၆) နှစ်ရှိပြီး စစ်ကောင်စီမှ ဖမ်းဆီးခေါ်ဆောင်သွားချိန်တွင် ကျန်းမာရေး အခြေနေစိုးရိမ်ရကြောင်းသိရသည်။
မြန်မာနိုင်ငံတွင် ဖေဖော်ဝါရီ ၁ ရက်နေ့ စစ်အာဏာသိမ်းပြီးနောက်ပိုင်း စစ်ကောင်စီမှ သတ်ဖြတ်သူ (၁၀၀၉) ဦးရှိပြီး ဖမ်းဆီးခံထားရသူ (၇၄၀၁) ဦးရှိကြောင်း နိုင်ငံရေးအကျဉ်းသားများ ကူညီရေးစောင့်ရှောင်ရေးအသင်း (AAPP) က ဩဂုတ် ၂၁ ရက်က ထုတ်ပြန်ထားသည်။
