တောင်ကြီးမြို့နယ် တောင်လေးလုံးကျေးရွာရှိ ညောင်ရွှေအကျဉ်းထောင်တွင် ယမန်နေ့ ( သြဂုတ် ၂၂) ရက်တွင် စစ်ကောင်စီမှ ဖမ်းဆီးထိန်းသိမ်းထားသည့် ကျောင်းဆရာ တစ်ဦး သည် ကိုဗစ် ကြောင့် သေဆုံးသွားကြောင်း စုံစမ်းသိရသည်။
အဆိုပါ အကျဉ်းထောင်ထဲတွင် သေဆုံးသွားသည့် ကျောင်းဆရာ ဦးစိုးလွင်လွင်သည် အသက် (၂၆)နှစ်အရွယ်ရှိပြီး တောင်ကြီးမြို့နယ် သိမ်ကုန် ကျေးရွာတွင် မူလတန်းပြ ကျောင်းဆရာတစ်ဦးဖြစ်ပြီး၊ စစ်ကောင်စီမှ မတရားဖမ်းဆီးခဲ့ပြီး အကျဉ်းထောင်ထဲတွင် ကိုဗစ် -၁၉ ကူးစက်ခံရပြီး သေဆုံးသွားကြောင်း သိရသည်။
“ဟုတ်ပါတယ်၊ သိမ်ကုန်းကျေးရွာကပါ၊ ၂၂ ရက်နေ့က အဖမ်းခံရတယ်၊ ဘာကြောင့် ဖမ်းသွားရလဲဆိုတာ မသိရဘူး၊ နောက်မကြာဘူး ကိုဗစ် ကြောင့် သေဆုံးသွားပြီလို့ မိသားစုဝင်တွေကို ဆက်သွယ်အကြောင်း ကြားလာပါတယ်၊ ဒါပေမဲ့ ဖြစ်စဉ်အသေး စိတ်ကို မသိရသေးဘူး” ဟု နီးစပ်သူ ဒေသခံတစ်ဦးက ပြောသည်။
ဦးစိုးလွင်လွင်သည် ဖမ်းဆီးခြင်းမခံရသည့် ကာလများတွင် ကျန်းမာရေးကောင်းမွန်သူတစ်ဦးဖြစ်သည့် အပြင် ကိုဗစ်-၁၉ ရောဂါ လက္ခဏာမရှိကြောင်း လည်း ၎င်း ကပြောသည်။
မတရား ဖမ်းဆီးခံရ၍ အကျဉ်းကျနေစဉ် ဩဂုတ်လ ၂၂ ရက်တွင် ကွယ်လွန်သွားသည့် ကျောင်းဆရာ ဦးစိုးလွင်လွင်အတွက် တောင်ကြီးမြို့နယ် အခြေခံကျောင်းသားများသမဂ္ဂက ယမန်နေ့ ညပိုင်းမှာ ဝမ်းနည်းကြောင်း သဝဏ်လွှာ ထုတ်ပြန်ရေးသားထားပါသည်။
အဆိုပါ အခြေအနေနှင့် ပတ်သက်၍ ရှမ်းပြည်နယ် အကျဉ်းဦးစီးဌာန တာဝန်ရှိသူ ထံသို့ ဆက်သွယ် မေး မြန်းရာတွင် ” မနေ့က နှလုံးရောဂါ အခံနဲ့ အသက် ၂၅ နှစ်အရွယ် တစ်ယောက်၊ အဲဒီကို (ထောင်သို့) ရောက်တော့ ဆုံးသွားတယ်။ နေပူဆာ လှုံနေတဲ့ အချိန်မှာ ရုတ်တရက် လဲကျပြီး ဆုံးသွားတာ၊ ကျန်တာတော့ မသိပါဘူး” ကမ္ဘောဇတိုင်းမီဒီယာက ဖော်ပြထားသည်။
စစ်ကောင်စီလက်အောက်ရှိ အကျဉ်းထောင်များတွင် COVID-19 ရောဂါ ဖြစ်ပွားမှုမြင့်မားလျှက် ရှိပြီး ထိန်းသိမ်းခံထားရသူများအတွက် လုံလောက်သည့် ကျန်းမာရေးစောင့်ရှောင့်မှုများလည်း မရရှိကြောင်း ကုလသမဂ္ဂအပါအဝင် နိုင်ငံတကာအဖွဲ့အစည်းများက ပြောဆိုထားသည်။
နိုင်ငံရေးအကျဉ်းသားများ ကူညီစောင့်ရှောင့်ရေးအဖွဲ့ AAPP ၏ ထုတ်ပြန်ချက်အရ စစ်ကောင်စီတို့ကြောင့် ပြည်သူ ငါးထောင်ကျော်မှာ ဖမ်းဆီးချုပ်နှောင်ခံထားရပြီး နှစ်ထောင်နီးပါး ဖမ်းဝရမ်းအထုတ်ခံထားရ ကြောင်း သိရသည်။
