သျှမ်းပြည်မြောက်ပိုင်း နောင်ချိုမြို့နယ် နှင့် မန္တလေးတိုင်းဒေသကြီး ပြင်ဦးလွင်မြို့ နယ်စပ်‌ဂိတ်တွင် Mask ( နှာခေါင်းစည်း) မတပ်သူများကို ဖမ်းဆီးပြီး တရားစွဲဆိုကြောင်း စုံစမ်းသိရှိရသည်။

နောင်ချိုမြို့နယ် နှင့် ပြင်ဦးလွင်မြို့နယ် အစပ် ဝက်ဝံရဲစခန်းရှေ့တွင် စစ်ကောင်စီ အုပ်စု က ရပ်တန့်ပြီး Mask မတပ်သူများကို ဖမ်းဆီးကာ အမှုဖွင့် တရားစွဲဆိုကြောင်း၊ လက်ရှိမှာ ဖမ်းဆီးခံရသူ (၁၈)ဦးခံရှိကြောင်း နောင်ချိုမြို့နယ် ဒေသခံများ ပြောပြချက်အရသိရသည်။

လွန်ခဲ့သည့် သြဂုတ် (၆)ရက် ည ၆နာရီခွဲတွင် နောင်ချိုမြို့နယ် ဘန်းဘွေ့ကျေးရွာတွင်နေထိုင်သည် အမျိုးသား (၃)ဦးသည် Mask မတပ်ဘဲ ဆိုင်ကယ်မောင်းသွားသဖြင့် စစ်ကောင်စီ လက်အောက်ခံ ဝက်ဝံရဲစခန်းရှေ့တွင် ဖမ်းဆီးခံရပြီး၊ လက်ရှိအချိန်ထိ မိသားစုဝင်များနှင့်တွေ့ခွင့်မရကြောင်း ဖမ်းဆီးခံရသည့် မိသားစုဝင် တဦးက သျှမ်းသံတော်ဆင့်ကို ပြောသည်။

“ အဲနေညက ကားပျက်လို့ ဝက်ရှော့ဆရာသွားခေါ်ခိုင်းတာ။ ဆိုင်ကယ်မောင်းပြီး Mask မပါလို့ဆိုပြီးတော့ ဖမ်းသွားတယ်။ (၃) ဦးကို ဖမ်းသွားတယ်။ ကျမရဲ့သားနဲ့ လိုက်သွားတဲ့ သူ ၂ ယောက်ပါ။ အခု သူတို့ကို သဘာဝဘေးအန္တရာယ်နဲ့ တရားစွဲထားတယ်” ဟု ဖမ်းဆီးခံထားရသည့် မိသားစုဝင်က သျှမ်းသံတော်ဆင့်ကို ပြောသည်။

ထိုဖမ်းဆီးခံထားရသည့်သူများသည် အသက် (၂၃) သာရှိပြီး၊ ပြင်ဦးလွင်ရဲစခန်းတွင် ထိန်းသိမ်းထားကာ မိသားစုဝင်များနှင့်လည်း တွေ့ခွင့်မပေးကြောင်း ၎င်း က ပြောသည်။

“သူအဖေ ထမင်းသွားပို့တာတောင် အပြင်မှာပဲချထားပေးရတာ။ အထဲပေးမဝင်ဘူး။ ကျမတို့သားက ကိုဗစ်ဖြစ်ပြီး သက်သာခါစပဲရှိသေးတယ်။ ကျန်းမားရေးအခြေနေက သိပ်မကောင်းဘူး။ ပြန်လွှတ်လာစေချင်တယ်။” ဟု ဖမ်းဆီးခံထားရသည့် မိသားစုဝင်က ပြောသည်။

ထိုနည်းတူ ထိုစစ်ဆေးရေးဂိတ် တွင် Mask မတပ်သူများနှင့် ဆိုင်ကယ်လိုင်စင်မပါရှိသူများကို ရပ်တန့်စစ်ဆေးပြီး ဖမ်းဆီးနေလျက်ရှိကြောင်း နောင်ချိုမြို့ ဒေသခံ အမျိုးသားတဦးက ပြောသည်။

“ ဟုတ်ပါတယ်။ အဲနေရာမှာ သူတို့ စစ်ဆေးပြီးဖမ်းနေတာ။ တချို့က Mask( နှာခေါင်းစည်း) မတပ်တဲ့သူနဲ့ ပြီးတော့ ဆိုင်ကယ်လိုင်စင်မရှိတဲ့သူတွေကို စစ်ဆေးပြီးတော့ ဖမ်းသွားတယ်။ ဖမ်းပြီး တရားစွဲလိုက်တယ်။ ၁၈ ယောက်လောက်ဖမ်းခံရပြီး။ လူငယ်တွေပဲ ” ဟု နောင်ချိုမြို့ ဒေသခံအမျိုးသား တဦးက ပြောသည်။

ထိုဝက်ဝံစစ်ဆေးရေးဂိတ်တွ်င ဖမ်းဆီးခံထားရသူ စုစုပေါင်း (၁၈) ဦးရှိနေပြီး လူငယ်များဖြစ်ကြောင်း ဒေသခံများထံမှ သိရသည်။ သို့သော် မည်မျှဖမ်းဆီးခံထားရသည်ကို သျှမ်းသံတော်ဆင့် အနေဖြင့် သီးခြားအတည်မပြုနိင်သေးပေ။