သျှမ်းပြည်မြောက်ပိုင်း ကျောက်မဲမြို့တွင် ကိုဗစ်-၁၉ အတည်ပြု လူနာအပါအဝင် သေဆုံးသူ တစ်ရက်တည်း (၁၀) ဦးရှိကြောင်း စုံစမ်းသိရှိရသည်။
သြဂုတ် (၁၀) ရက်နေ့က ကျောက်မဲပြည်သူ့ဆေးရုံမှာ အတည်ပြု လူနာ (၂) ဦးအပါအဝင် နေအိမ်တွင် သံသယ လူနာများ စုစုပေါင်း (၁၀) ဦးခန့် သေဆုံးသွားကြောင်း ပရဟိတ တစ်ဦး က သျှမ်းသံတော်ဆင့်ကိုပြောသည်။
“ကျနော်တို့ မနေ့က နာရေး လမ်းကြောင်း (၁၀) ခု လောက်ပို့ရတယ်။ နေအိမ်မှာ အောက်စီဂျင် ကျပြီး သေဆုံးတာတွေရှိတယ်။” ဟု ပရဟိတ တစ်ဦး က သျှမ်းသံတော်ဆင့် ကိုပြောသည်။
ကျောက်မဲပြည်သူ့ဆေးရုံမှာ ကိုဗစ်-၁၉ ကြောင့် အတည်ပြု လူနာ သြဂုတ် (၁၀) ရက်နေ့ထိ သေဆုံးသူ စုစုပေါင်း (၃၀) ဦး ရှိသွားပြီဖြစ်ကြောင်း သိရှိရသည်။
“မနေ့ကထိ အတည်ပြု လူနာ သေဆုံးသူ (၃၀) ဝန်းကျင်လောက်ရှိတယ်။ အဲ့လိုပုံစံမျိုးပဲ မြို့ထဲမှာ သေဆုံးတဲ့သူ အများကြီးရှိတယ်” ဟု နာရေး ကူညီသူ တစ်ဦးကပြောသည်။
ကျောက်မဲမြို့တွင် တစ်ရက်လျှင် ပျှမ်းမျှ သေဆုံးသူ (၇) ဦးခန့်ရှိနေပြီး ကိုဗစ် လကဏဖြင့် သေဆုံးသူများရှိသော်လည်း နေအိမ်ကန့်သတ်ခြင်း နှင့် ကြပ်မတ်စစ်ဆေး ကုသပေးမှုများ မရှိကြောင်း သိရသည်။
ဆေးရုံတွင် ကုသပေးမှု အားနည်းခြင်းကြောင့် ကျန်းမာရေးမကောင်းသူ တစ်ချို့သည် နေအိမ်တွင်သာ ကုသနေမှုများ ပြုလုပ်နေကြကြောင်း နှင့် သေဆုံးသူများလာကြောင်း ဒေသခံများက ပြောဆိုကြသည်။
ကျောက်မဲမြို့တွင် ကိုဗစ် – ၁၉ အတည်ပြု လူနာ (၅၀၀) ကျော်ရှိနေပြီး သေဆုံးသူ (၃၀) ဝန်းကျင်ရှိနေကြောင်း သိရသည်။
