သျှမ်းပြည်မြောက်ပိုင်း ကျောက်မဲမြို့တွင် စစ်ကောင်စီ အုပ်စုသည် ပြည်သူနေအိမ်ထဲသို့ ဝင်ရောက်ရှာဖွေပြီး နေအိမ်ထဲရှိ ပစ္စည်းများကိုပါ ရိုက်ချိုးဖျက်ဆီးခဲ့ကြောင်း စုံစမ်းသိရှိရသည်။
ဖြစ်စဉ်မှာ သြဂုတ် ၈ ရက် ည (၁၁) နာရီ ဝန်းကျင်တွင် ကျောက်မဲမြို့ ရပ်ကွက် (၇) ရှိနေအိမ်တလုံးအတွင်းသို့ စစ်ကောင်စီ အုပ်စု လက်အောက်ခံ ရဲများသည် အင်အား အလုံးအရင်းဖြင့် လာရောက်ရှာဖွေစစ်ဆေးခဲ့ပြီး၊ ထိုအိမ်ထဲတွင် လူတဦးတယောက်မျှ မရှိသဖြင့် ဆိုင်ကယ်တစ်စီးနှင့် နေအိမ်အတွင်းရှိ ပစ္စည်များကို ဖျက်ဆီးခဲ့ကြောင်း ကျောက်မဲမြို့ ဒေသခံ အသက် (၄၅)ကျော် အမျိုးသား တစ်ဦး က သျှမ်းသံတော်ဆင့်ကို ပြောသည်။
“ အဲ့အိမ်မှာက လူမရှိထားဘူး။ အိမ်ထဲက ပစ္စည်းတွေဝင်ရှာတယ်။ ပြီးတော့ ဆိုင်ကယ်တစ်စီးကိုလည်း ဖျက်ဆီးလိုက်တယ်။ နေအိမ်ထဲဝင်ရှာပြီးတော့ ပစ္စည်းတချို့ကိုလည်း ဖွသွားတယ်” ဟု ၎င်း အမျိုးသားကဆိုသည်။
ထိုနေအိမ်တွင် လွန်ခဲ့သည့် သြဂုတ် ၆ ရက် တွင် စစ်ကောင်စီ က အင်အားအလုံးအရင်းဖြင့် ၅၀၅ ဖြင့် အမှုဖွင့်ခံထားရသည့် လူငယ်ကိုသွားရှာဖွေခဲ့သည့် အိမ်ဖြစ်လည်းဖြစ်သည်။
ထိုနေ့တွင် ၅၀၅ က ဖြင့် အမှုဖွင့်ခံထားရသည့် လူငယ်ကို မတွေ့ရှိခဲ့သဖြင့် နေအိမ်တွင် ကျန်ရှိနေသည့် အသက် (၂၂) အရွယ်ရှိ လူငယ်တဦးကို ဖမ်းဆီးသွားပြီး ရိုက်နှက်စစ်ဆေးရာတွင် ခြေထောက်ကျိုးသွားခဲ့ကြောင်း ကျောက်မဲဒေသခံများပြောပြချက် အရသိရသည်။
ကျောက်မဲမြို့တွင် စစ်ကောင်စီများက မြို့တွင်းအရပ်ဝတ်ဖြင့် လှည့်လည်နေပြီး စစ်အာဏာရှင်ဆန့်ကျင် သူများကို ညအချိန်တွင် ဝင်ရောက်ဖမ်းဆီးရိုက်နှက်လေ့ရှိကြောင်း သိရသည်။
“ ကျနော်တို့မြို့မှာက အရပ်ဝတ်တွေနဲ့သွားလာတာများတယ်။ သူတို့စောင့်ကြည့်နေတာ။ သူတို့ရဲ့ အာဏာရှင်ကို ဆန့်ကျင်တဲ့သူတွေ၊ PDF လို့ထင်ရတဲ့သူတွေကို လိုက်ရှာပြီး ဖမ်းယူဖို့လုပ်နေကြတာ” ဟု အမည်မဖော်လိုသည့် ကျောက်မဲမြို့ဒေသခံ လူငယ်တဦးက ပြောသည်။
ဖေဖော်ဝါရီ ၁ ရက်နေ့ စစ်အာဏာသိမ်းယူပြီးနောက်ပိုင်း ကျောက်မဲမြို့တွင် စစ်ကောင်စီမှ ဖမ်းဆီးထားသူ စုစုပေါင်း ၂၀ ကျော်ရှိပြီး ၎င်းတို့ကို မိသားစုဝင်များနှင့် အဆက်သွယ်ဖြတ်တောက်ထားကာ မည်သည်နေရာတွင် ဖမ်းဆီးထားကြောင်းလည်း မသိရှိရကြောင်းသိရသည်။
Leave a Comments