သျှမ်းပြည်မြောက်ပိုင်း နမ့်ခမ်းမြို့ရှိ စရဖရုံးအနီးတွင် ယနေ့(သြဂုတ် ၉ )ရက် မနက် ၁၀နာရီ ဝန်းကျင်တွင် ဗုံးဖောက်ခွဲခံရကြောင်း စုံစမ်းသိရဥည်။
ဖြစ်စဉ်မှာ ယနေ့ သြဂုတ် (၉) ရက် မနက် ၁၀ နာရီ ဝန်းကျင်တွင် နမ့်ခမ်းမြို့ရှိ ကောင်းနောင်မိုရပ်ကွက်ရှိ စရဖရုံးအနီး လူ၂ ဦးသည် ဆိုင်ကယ်တစ်စီးဖြင့် လာရပ်ပြီး ဗုံးဖောက်ခွဲခဲ့ကြောင်း ဒေသခံများ ပြောပြချက် အရသိရသည်။
“ ဆိုင်ကယ်တစ်စီး လူ(၂)ယောက်လာတယ်။ ပြီးတော့ စရဖ ရုံးထဲ ပစ်လိုက်တယ်။ တစ်လုံးပဲ ကြားလိုက်တယ်။ လူထိတာတော့ မကြားဘူး” ဟု နမ့်ခမ်းဒေသခံ တစ်ဦး က သျှမ်းသံတော်ဆင့် ကိုပြောသည်။
အဆိုပါ ပစ်ခတ်လိုက်သည့် အနီးဝန်းကျင်မှာ ကိုဗစ်-၁၉ ကာကွယ်ဆေး လာရောက်ထိုးနှံသည့် သူများလည်း ရှိကြောင်း သိရှိရသည်။
“ကျားဖြူ ခန်းမ မှာ ကာကွယ်ဆေး လာထိုးတဲ့သူတွေလည်း ရှိတယ်။့ လာပစ်တဲ့ နေရာနဲ့ ကိုဗစ်ကာကွယ်ဆေးထိုးတဲ့နေရာနဲ့ (၁၀) အိမ်ကျော် လောက်ပဲ ဝေးတယ်” ဟု နမ့်ခမ်းဒေသခံ တစ်ဦး ကပြောသည်။
နမ့်ခမ်းမြို့တွင် ဗုံး မကြာခဏ ပေါက်ကွဲမှု ဖြစ်ပွားသောကြောင့် ဒေသခံများလည်း စိုးရိမ်ထိတ်လန့်မှု မရှိတော့ကြောင်း ဒေသခံများက ပြောဆိုကြသည်။
“ဗုံးက မကြာခဏ ကွဲတာတွေရှိတော့ ဒေသခံတွေလည်း သိပ်ပြီး မထိတ်လန့်ကြတော့ဘူး။” ဟု နမ့်ခမ်းဒေသခံ တစ်ဦး ကပြောသည်။
သြဂုတ် (၈) ရက်နေ့တွင် နမ့်ခမ်းမြို့နယ်ရှိ နမ့်မရွာ-ဟိုပုံရွာ နှင့် ဝိန်းကန်းရွာ တို့ ကြား TNLA နှင့် စစ်ကောင်စီ တပ်တို့ တိုက်ပွဲဖြစ်ပွားခဲ့ပြီး ဒေသခံ တစ်ဦး ထိခိုက်ဒဏ်ရာ ရရှိခဲ့ပြီး စစ်ကောင်စီဘက်က တစ်ဦး သေဆုံးခဲ့သည်။
Leave a Comments