သျှမ်းမြောက် လားရှိုး − မိုင်းယော် − မိုင်းကျက်လမ်းမကြီးပေါ်တွင် ယမန်နေ့ (သြဂုတ် ၄)ရက် နေ့လည်ပိုင်းတွင် ဗုံးပေါက်ကွဲမှုဖြစ်ပွားခဲ့ပြီး စစ်ကောင်စီတပ်သားအပါအဝင် (၃)ဦးခန့် ဒဏ်ရာရှိခဲ့ကြောင်း သိရသည်။
“စကစတပ်ဖွဲ့ဝင်တွေ လိုက်ပါလာတဲ့ ကားနှစ်စီး လာနေတဲ့အချိန် ဗုံးကွဲသွားတာပါ၊ ရှေ့ကားတစ်စီး မိုင်းစ ထိမှန်ပြီး နောက်ကားတစ်စီးကတော့ မှောက်သွားတယ်” ဟု ဒေသခံတစ်ဦးက သျှမ်းသံတော်ဆင့်ကို ပြောသည်။
မိုင်းယော်မြို့အရှေ့ဘက် မိုင်ဝက်ခန့်အကွာ မွန်းတည့် (၁၂)ဝန်းကျင်တွင် ပေါက်ကွဲခဲ့တာဖြစ်ပြီး စစ်ကောင်စီတပ်ဖွဲ့ဝင်တစ်ဦး၊ ကားဆရာနှင့် အသက်(၆၀)ခန့်ရှိ ဒေသခံ အမျိုးသမီးတစ်ဦးတို့ ဒဏ်ရာရရှိခဲ့ကြောင်း သိရသည်။
အဆိုပါ ကားပေါ်တွင် အရပ်ဝတ်ဖြင့် လိုက်ပါလာသူများလည်းရှိပြီး တပ်သားဝတ်စုံဝတ်ထားသူများလည်း ပါဝင်ကြောင်း၊ ဗုံးပေါက်ကွဲမှုသည် ကျေးရွာအနီးတွင် ဖြစ်ပွားခဲ့သည့်အတွက် ဒေသခံများ စိုးရိမ်ထိတ်လန့်ခဲ့ရကြောင်း သိရသည်။
“ခုက ကျေးရွာအနီးမှာပေါက်ကွဲတာဆိုတော့ အရမ်းကို ထိတ်လန့်သွားတယ်၊ ဘယ်လက်နက်ကိုင်အဖွဲ့မဆို ကျေးရွာအနီးမှာ ဗုံးထောင်တာတွေတော့ မပြုလုပ်စေချင်ဘူး” ဟု ဒေသခံတစ်ဦးက သျှမ်းသံတော်ဆင့်ကို ပြောသည်။
ဒေသခံများပါ ထိခိုက်မှုတွေ ရှိနေသည့်အတွက် မည်သည့်လက်နက်ကိုင်တပ်ဖွဲ့မဆို ကျေးရွာအနီးတွင် ဗုံးထောင်ဖောက်ခွဲမှုများ မပြုလုပ်စေလိုကြောင်း ဒေသခံပြည်သူများက လိုလားနေကြတာဖြစ်သည်။
ပြီးခဲ့သည့် ရက်ပိုင်းတွင် မိုင်းယော်မြို့အစွန် ယခင် ရဲစခန်းဟောင်းနေရာတွင် စစ်ကောင်စီ တပ်ဖွဲ့တစ်ဖွဲ့ လာရောက် စခန်းချနေတာ ရှိကြောင်း ဒေသခံများထံမှ သိရသည်။
အဆိုပါ ဗုံးထောင်ဖောက်ခွဲမှုသည် မည်သည့်အဖွဲ့အစည်းက ပြုလုပ်သည်ဆိုတာ သေခြာမသိရသေးပါ။
သျှမ်းမြောက်ရှိ အဆိုပါ ဒေသတွင် သျှမ်းပြည်ပြည်လည်ထူထောင်ရေးကောင်စီ သျှမ်းပြည်တပ်မတော် RCSS/SSA ၊ သျှမ်းပြည်တိုးတက်ရေးပါတီ သျှမ်းပြည်တပ်မတော် SSPP/SSA၊ တအာင်းအမျိုးသားလွတ်မြောက်ရေးတပ်မတော် TNLA ၊ ကချင်လွတ်မြောက်ရေးတပ်မတော် KIA တို့ သွားလာလှုပ်ရှားနေသည့် နယ်မြေဖြစ်သည်။
