သျှမ်းမြောက် ကျောက်မဲမြို့ တွင် သြဂုတ် ၃ ရက်(ယမန်နေ့)က တရက်တည်း သေဆုံးသူ (၁၂)ဦးထိ ရှိခဲ့ပြီး ကိုဗစ်အတည်ပြုလူနာ (၂)ဦးပါဝင်ကြောင်း စုံစမ်းသိရသည်။
“အများအားဖြင့် သက်ကြီးပိုင်းနဲ့ ဆီးချို၊ သွေးတိုး တို့လို ရောဂါအခံရှိတဲ့သူတွေ သေတာများတယ်၊ အောက်ဆီဂျင်ရှူနေရတဲ့ လူနာတွေလည်း ပါတယ်၊ မနေ့ကတော့ ကိုဗစ်အတည်ပြုလူနာထဲက (၂)ဦးသေတယ်” ဟု နာရေးကူညီနေသူ ဒေသခံတစ်ဦး က သျှမ်းသံတော်ဆင့်ကို ပြောသည်။
ကျောက်မဲမြို့တွင် တစ်ရက်လျှင် ပျမ်းမျှ သေဆုံးသူ (၇)ဦးခန့် ရှိနေပြီး ကိုဗစ်လက္ခဏာဖြင့် သေဆုံးသူများရှိသော်လည်း နေအိမ်ကန့်သတ်ခြင်းနှင့် ကြပ်မတ်စစ်ဆေး ကုသပေးမှုများ မရှိကြောင်း သိရသည်။
“နေအိမ်မှာ ကိုဗစ်လက္ခဏာနဲ့ သေဆုံးသွားပေမယ့် အမှန်အတိုင်းမပြောပဲ သာမန်သေဆုံးတာလို့ပဲ ပြောကြတယ်၊ အဲ့လိုသေဆုံးမှုရှိနေတဲ့ အိမ်တွေကို ကန့်သတ်တာလည်း မရှိဘူး၊ ကိုဗစ်စစ်ဆေးတာလည်း မရှိဘူး” ဟု အဆိုပါ ဒေသခံ က ပြောသည်။
ဆေးရုံတွင် ကုသပေးမှု အားနည်းခြင်းကြောင့် ကျန်းမာရေးမကောင်းသူတစ်ချို့သည် နေအိမ်တွင်သာ ကုသနေမှုများ ပြုလုပ်နေကြကြောင်းနှင့် သေဆုံးသူ များလာကြောင်း ဒေသခံများထံမှ စုံစမ်းသိရသည်။
“ခုက ရာသီတုပ်ကွေးနဲ့လည်း တိုက်နေတော့ နေမကောင်းတဲ့သူ၊ အားပျော့တဲ့သူတွေ ပိုများလာတယ်၊ သက်ကြီးရွယ်အိုတွေ ဖြစ်တာ အများဆုံးပဲ၊ ဆေးရုံဆေးခန်းသွားပြဖို့ကိုလည်း ကြောက်နေကြတာဆိုတော့ သေဆုံးသူက ပိုများလာတာပေါ့” ဟု လူမှုကူညီရေးတွင် ပါဝင်ဆောင်ရွက်နေသူ ဒေသခံတစ်ဦးက သျှမ်းသံတော်ဆင့်ကို ပြောသည်။
အိမ်တွင်း ကုသနေမှုများအား ထိန်းချုပ်နိုင်ရန်အတွက် ခရိုင်ပြည်သူ့ဆေးရုံရှေ့ရှိ မူကြိုကျောင်းတွင်း Fever Clinic အခမဲ့ဆေးခန်း ဖွင့်လှစ်ထားပြီးဖြစ်ကြောင်း သိရသည်။
ကျောက်မဲတွင် ယမန်နေ့အထိ ကိုဗစ်အတည်ပြုလူနာ (၅၀၀)ကျော်ရှိနေပြီး၊ ဆေးရုံဆင်းခွင့်ရသူ (၃၀၀)ကျော်နှင့် သေဆုံးသူ (၃၀)ဝန်းကျင်ရှိနေကြောင်း သိရသည်။
