သျှမ်းပြည်တောင်ပိုင်း တောင်ကြီးမြို့တွင် ကိုဗစ်-၁၉ သံသရာလူနာအဖြစ်သေဆုံးသူ နေ့စဉ်ရှိနေကြောင်း စုံစမ်းသိရှိရသည်။
ထိုလူနာများသည် ကိုဗစ်-၁၉ သံသယ လူနာအနေဖြင့် နေအိမ်တွင် ဆေးကုသမှုခံယူနေပြီး သေဆုံးသွားကြောင်း သိရသည်။
“ သံသရာ လူနာအနေနဲ့သေဆုံးနေတာတော့ ရှိတယ်။ သူက ကိုဗစ် ကြောင့်သေတာလား။ ဘာကြောင့်သေတာလဲတော့မသိရဘူး။ ဆေးမစစ်ရဘူး။ ကိုဗစ် ဖြစ်ပြီးအိမ်မှာကုသနေတာရှိတယ်” ဟု တောင်ကြီးမြို့ ပရဟိတ ကိုဝင်နိုင်စိုးက ပြောသည်။
တောင်ကြီးမြို့တွင် ကိုဗစ်-၁၉ သံသယလူနာအနေဖြင့် သေဆုံးသူ တရက်လျှင်ပျမ်းမျှ (၃) ဦးလောက် ရှိကြောင်း သိရသည်။
လက်ရှိတွင် တောင်ကြီးမြို့တွင် ကိုဗစ် -၁၉ ကြောင့် သေဆုံးသူများကို သချိုင်းသို့ ပို့ဆောင်ရာတွင် အသင်းခွဲ များရှိနေသောကြောင့် စာရင်းအတိကျကိုမသိရှိရကြောင်းသိရသည်။
တောင်ကြီးမြို့တွင် တရက်တည်း ကိုဗစ်-၁၉ ကြောင့် သေဆုံးသူ ၁၀ ယောက်အထိရှိခဲ့ဖူးကြောင်း နမ့်ခုံးပရိဟိတ အသင်းက ပြောသည်။
“ပုံမှန် တရက်ကို (၂)(၃) ယောက်လောက် သင်္ချိုင်းကို ပို့ပေးနေတယ်။ တခြား အသင်းကလည်း ရှိတယ်။အဲကြောင့် တစ်ရက်ထဲကို ၁၀ ယောက်ထိသေတာလဲရှိနိုင်တယ်” ဟုနမ့်ခုံးပရိဟိတ အဖွဲ့က ပြောသည်။
စစ်အာဏာသိမ်းယူပြီးနောက်ပိုင်း တတိယလှိုင်း ကိုဗစ်-၁၉ ပိုးတွေ့လူနာများကို ဆေးရုံတွင် အလုံအလောက်မထားနိုင်သောကြောင့် ပြည်သူများ တချို့ နေအိမ်တွင်ကုသမှုခံယူနေရ ကြောင်း ပရဟိတအသင်းအဖွဲ့ တစ်ဦးက ပြောသည်။
“ ခုချိန်က နိုင်ငံရေးလဲမကောင်းဘူးလေ။ ကိုဗစ်- ၁၉ ပိုးတွေ့လူနာတွေကို ဆေးရုံးမှာအလုံအလောက်မထားနိုင်လို့ တချို့လည်း နေအိမ်မှာဆရာဝန်တွေနဲ့ တိုင်ပင်ပြီး ကုနေရတာရှိတယ်။ အဲလို့ ကုနေရင်းနဲ့လဲ သေဆုံးသွားတာတွေရှိတယ်” ဟု တောင်ကြီးမြို့ ပရဟိတ တစ်ဦးက ပြောသည်။
မြန်မာနိုင်ငံတွင် ကိုဗစ်- ၁၉ ပထမလှိုင်းနှင့် ဒုတိယလှိုင်းကို ကောင်းစွာထိန်းချုပ်နိုင်ခဲ့သော်လည်း လက်ရှိ ကိုဗစ် -၁၉ တတိယလှိုင်းတွင် ထိန်းချုပ်နိုင်မှုမရှိကာ ပြည်သူများနေ့စဉ်သေဆုံးနေရကြောင်း သိရသည်။
တောင်ကြီးမြို့တွင် ယမန့်နေ့ ( သြဂုတ် ၃ )ထိ ကိုဗစ် ၁၉ ပိုးတွေ့လူနာစုစုပေါင်း (၁၁၃၉) ဦးရှိပြီး ဆေးရုံဆင်းခွင့်ရလူနာ (၅၂၈) ဦးနှင့်၊ သေဆုံးသူ( ၆၂ )ဦးထိရှိကြောင်း သိရသည်။
